“Biatak Thlarau” Kha Na Hmu Cang Maw?
“Ka Pa [nih] . . . Bawmtu a dang, biatak Thlarau cu an pek hna lai.”—JOHAN 14:16, 17.
1. Inncung khan ah Jesuh nih a zultu hna he a hmanung bik an umṭi lioah zeibantuk a biapimi thawng dah a rak chimh hna?
“Bawipa, khuazei ahdah na kal lai?” Mah cu Jesuh lamkaltu pakhat nih Jerusalem inncung khan ah an sin i hmanungbik a rak um lio i Jesuh a rak halmi biahalnak pakhat a si. (Johan 13:36) Mah an i pumh lio caan ahkhan, Jesuh nih ka Pa sinah ka kir ṭhan lai nak caan a phan cang tiah a rak ti hna. (Johan 14:28; 16:28) Anmah kha lamhruai in an biahalnak kha leh awkah an sinah a um ti lai lo. Asinain, hitin an hna a ngamter ṭhan hna: “Ka Pa kha ka hal lai i Bawmtu [asiloah, hnemhtu] a dang, biatak Thlarau cu an pek hna lai i nan sinah a zungzal in a um lai.”—Johan 14:16, footnote.
2. Jesuh nih a kaltak hna hnu in a zultu hna sinah zei thlah te dingah dah bia aa rak i kam?
2 Jesuh nih mah bawmtu kha fiang tein a rak langhter i mah nih khan zeitindah a zultu hna kha a rak bawmh hna lai ti kha a fianter. Hitin a rak ti hna: “Keimah kha nan sin i ka rak um ko caah khan hi bia hi a hramthawk ah khan ka rak in chim hna lo. Sihmanhsehlaw atu cu a ka thlahtu sinah khan ka kal cang lai . . . Ka kal hi nan caah a ṭha deuh, zeicahtiah keimah ka kal lo ahcun Bawmtu kha nan sinah a ra kho lai lo. Ka kal ahcun amah cu nan sinah ka ratter lai. . . . Biatak thlarau cu a rat tikah biatak chungah cun an luhpi hna lai.”—Johan 16:4, 5, 7, 13.
3. (a) Hmasa Krifa hna sinah “thlarau biatak” cu zeitik ahdah thlah a rak si? (b) Thlarau cu an caah “bawmtu” a sinak a biapimi lam pakhat cu zeidah a si?
3 Lamkaltu Piter nih a rak langhter bantukin, C.E. 33 Pentekos ni ah mah biakamnak cu a rak tling: “Pathian nih hi Jesuh hrimhrim hi mithi hna sin cun a thawhter i hi thil tehte a khaang tu cu kanmah hi kan si. Pathian orhlei kam ah khan ṭhutter a si i a Pa nih bia a kam bantuk khan Thiang Thlarau cu a Pa sin khan a hmuh; cun atu i nan hmuhmi le nan theihmi hi kannih a kan toihmi a laksawng kha a si.” (Lamkaltu 2:32, 33) A hnu ah kan zoh te lai bantuk in, Pentekos ni ah thiang thlarau toihnak nih hmasa Krifa hna caah thil tampi a tlam a tlinter. Sihmanhsehlaw Jesuh nih “biatak thlarau” nih ‘a chimhmi vialte hna kha an lung a pemter’ ṭhan hna lai tiah bia a kamh hna. (Johan 14:26) Mah nih khan Jesuh a rianṭuannak, a cawnpiaknak le Jesuh a chimmi biafang ning te hmanh khan a hngalhter ṭhan hna i mah hna kha a ṭialter ko hna lai. C.E. kum zabu pakhat nak a dongh lei ah tarpa Johan nih a Thawngṭha cauk kha ṭial hram a rak thawk tikah mah nih khan a hlei in a rak bawmh ko lai. Mah chungah khan Jesuh nih a thihnak Ruahnolhnak a rak tuahpi hna lioah a rak pekmi hna a sunglawi ngaimi ruahnak cheuhnak aa tel.—Johan, angan 13-17.
4. Hmasa chiti thuhmi Krifa hna kha “biatak thlarau” nih zeitindah a rak bawmh hna?
4 Jesuh nih mah hmasa a zultu hna kha thlarau nih ‘zeizong vialte kha an cawnpiak’ hna lai i ‘biatak vialte chungah khan an hruai hna’ lai tiah bia a rak kamh hna. Thlarau nih Baibal ca i a thuk deuhmi thil kha hngalhthiam awkah le an ruahnak, an hngalhnak le an timhnak i an i rualnak kha kilven awkah a rak bawmh ngai ko hna lai. (1 Korin 2:10; Efesa 4:3) Cuti cun thiang thlarau nih hmasa Krifa hna kha “zumh awk a tlakmi le a fimmi sal” timi bu pakhat in ṭuan in chiti thuhmi Krifa pakhat cio kha thlarau lei ‘acaan hmaan tein rawl a petu’ dingah nawl a rak pek hna.—Matthai 24:45.
Thlarau Nih Tehte A Khan
5. (a) C.E. 33, Nisan 14 zan ah, Jesuh nih a zultu hna sinah zeibantuk ruahchannak thar dah a rak pek hna? (b) Jesuh biakamnak a tlinnak ah thiangthlarau cu zeitindah aa tel?
5 C.E. 33, Nisan 14 zan ah, Jesuh nih a zultu hna kha a hnu deuh ah amah he vancung ah um ṭi dingin amah le a Pa nih kan in cohlan te hna lai tiah a rak chimh chung hna. Hitin a rak ti hna: “Ka Pa inn chungah cun khaan tampi a um ko i cuka i nan caah hmun va timh awkah ka rak kal lai. Cuti cun asi lo ah cun hi ti hin kan chim hna hnga lo. Cun ka va kal lai i nan ca i ka va timh hnu ah ka ra kir ṭhan lai i ka sinah kan lak hna lai, cun ka umnak ah nannih zong nan um ve lai.” (Johan 13:36; 14:2, 3) A Pennak ah amah he an uk ṭi lai. (Luka 22:28-30) Hi vancung ruahchannak hi an hmuh nakhnga annih cu Pathian i thlarau lei a fa si awkah “thlarau in hrin” an si lai i siangpahrang le tlangbawi in Kri he vancung ah ṭuan awkah chiti thuh an si lai.—Johan 3:5-8; 2 Korin 1:21, 22; Titus 3:5-7; 1 Piter 1:3, 4; Biathlam 20:6.
6. (a) Zeitik ahdah vancung kawhnak cu aa thawk i, zeizat nihdah mah kawhnak cu an hmuh? (b) Kawh a simi hna cu zei ahdah tipil an in?
6 Hi ‘vancung lei kawhnak’ hi C.E. 33 Pentekos ni ah a rak i thawk i, a biapibik in 1930 a laifang ah khan a dong. (Hebru 3:1) Thlarau Israel mi si awkah “minung hna lakin tlanh” in thiang thlarau in cakhenhmi cu 144,000, kha an si. (Biathlam 7:4; 14:1-4) Mah hna cu Kri thlarau pum ah, a krifabu ah le a thihnak ah tipil an ing. (Rom 6:3; 1 Korin 12:12, 13, 27; Efesa 1:22, 23) Ti ah tipil an in hnu ah, thlarau in chiti thuh an si i an thih tiang zumhfek tein nunnak a simi raithawinak lam an zulh.—Rom 6:4, 5.
7. Chiti thuhmi Krifa hna lawnglawng nih zeiruang ahdah Ruahnolhnak ah eidin nak an hmuh?
7 Hi chiti thuhmi Krifa hna cu thlarau Israel mi in, Jehovah le “Pathian Israel” mi hna nih an tuahmi biakam thar ahkhan an um. (Galati 6:16, NW; Jeremiah 31:31-34) Biakam thar cu Kri nih a thletmi thisen in fehter a si. Jesuh nih a thihnak Ruahnolhnak a rak tuah lio ah mah hi a rak fianter. Luka nih hitin a rak ṭial: “Cun chang kha a lak i Pathian sinah lawmhnak bia a chim hnu ah a cheu i annih cu a pek hna i, ‘Hihi ka pum a si (nan ca i kan pekmi cu. Keimah philhlonak ah run tuah u,’ tiah a ti. Cu bantuk ṭhiamṭhiam in zanriah an ei dih hnu ah hrai zong kha a pek hna i, ‘Hi hrai hi nan caah ka thletmi ka thi in khenhchihmi Pathian biakamnak cu a si.’)” (Luka 22:19, 20) Vawlei cung i 144,000 chungin a tang rihmi hna cu Kri thihnak Ruahnolhnak hmelchunhnak a simi changreu le mitsur hang kha eidin awkah aa tlak taktakmi an si.
8. Zeitindah chiti thuhmi hna nih vancung kawhnak an hmuh nak kha an i hngalh?
8 Zeitindah chiti thuhmi hna nih vancung lei kawhnak an hmuh kha an i hngalh khawh lai? Thiang thlarau i a palh kho lomi tehte khannak kha an hmuh. Lamkaltu paul nih cu bantuk mi hna sinah cun hitin a rak ṭial: “Pathian thlarau nih a hruaimi hna cu Pathian fale an si. . . . Pathian fa kan si kha tehte a khan; fa kan si ahcun rocotu zong kan si colh. . . . Kri ro co hawi kan si; zeicahtiah Kri temhinnak kha kan i hrawm ahcun a sunparnak zong kha kan i hrawm ve lai.” (Rom 8:14-17) Hi thlarau tehte khannak cu a hmual a ṭhawng tukmi a si i vancung kawhnak a hmuhmi he aa tlaiin zumhlonak tlawmpal a ngeimi cu auh kan si lo tiah aa tlak ningin an ruah khawh, cucaah Ruahnolhnak ah hmelchunhnak eidinnak kha an hrial lai.
Thlarau le Tuu Dang
9. Thawngṭha le Biathlam cauk ah zeibantuk aa thleidangmi bu hnih kong dah a chim?
9 Thlarau Israel mi in kawh a simi hna, rikhiahmi Krifa hna kha a lung chungah chia in, Jesuh nih annih kha “tuu run hmete” tiin a langhter hna. Annih cu biakam thar i “turun” chungah luhter an si i Jesuh nih annih zong kha ka rat pi ve hrimhrim hna lai tiah a timi hna, rel cawk lomi “tuu dang” hna he an i thleidang. (Luka 12:32; Johan 10:16) Donghnak caan ah khawmh a simi tuu dang hna cu vawlei cung pasadis ah zungzal nunnak ruahchannak he “harnak nganpi” a luatmi “mibu nganpi” ah an i tel lai. Khuaruahhar awk cu, C.E. kum zabu pakhatnak a donghnak ah Johan nih a hmuhmi langhnak nih, mibu nganpi le thlarau Israel 144,000 cu a thleidan. (Biathlam 7:4, 9, 14) Tuu dang hna nih thiang thlarau kha an hmu ve maw, an hmuh ve ahcun, zeitindah mah nihkhan an nunnak kha a hnorsuan?
10. Zeitindah tuu dang hna nih “Pa le Fapa le thiang thlarau min in” tipil an in?
10 Thiang thlarau cu tuu dang hna i an nunnak ah a biapimi hmun ah rian a ṭuan taktak ko. Jehovah sinah an pum an i peknak kha “Pa le Fapa le Thiangthlarau min in” tipil an innak thawngin an langhter. (Matthai 28:19) Jehovah nawlngeihnak kha an cohlan, Kri kha an Siangpahrang le an Tlanhtu in a tangah an i dor i, an nunnak ah Pathian thlarau, asiloah a rianṭuan ṭhawnnak i rianṭuannak kha an cohlan. “Dawtnak, lawmhnak, daihnak, lungsaknak, zangfahnak, ṭhatnak, zumh awk tlakmi si nak, toidornak le mah le mah i tei khawhnak” te hna a simi “thlarau theitlai,” kha ni fate an nunnak ah langhter an i zuam.—Galati 5:22, 23, NW.
11, 12. (a) Zeitindah chiti thuhmi hna cu a hleikhun in thianhhlimh an si? (b) Tuu dang hna kha zeiti lam indah thianhhlimh an si?
11 Tuu dang hna nih Pathian Bia le a thiang thlarau kha an i thianhter hrimhrim awk a si. Chiti thuhmi hna cu Kri nih a ṭhit laimi ngaknu in an ding i an thiang tiah thanh an si cang i a hlei khun in thianh an si cang. (Johan 17:17; 1 Korin 6:11; Efesa 5:23-27) Profet Daniel nih “minung a lomi pakhat” a simi Kri Jesuh tangah Pennak a hmumi “Cung Nung Bik mithiang hna” in a langhter hna. (Daniel 7:13, 14, 18, 27) Hmasa deuh ah, Moses le Aaron hmangin, Jehovah nih Israel miphun hna kha hitin a rak thanh hna: “Zeitintiah keimah cu BAWIPA nan Pathian ka si; cu caah i thianter u law, thianghlim u, keimah ka thian caah.”—Levitikas 11:44.
12 “Thianhhlimhnak” timi a sullam taktak cu Jehovah Pathian rianṭuan tu asiloah aa hmangmi in thiannak, i ṭhennak, a dang tein umnak; thiannak, thianternak, asiloah thianhnak kha a chim duhmi a si.” 1938 lio in, Vennak Innsang nih Jonadab, asiloah tuu dang hna nih “mibu nganpi ah aa tel i vawlei ah a um dingmi hna nih Pathian sin peknak [pumpeknak] le thianh awkah an cawn awk hrimhrim a si” tiah a rak ti. Mibu nganpi kong langhnak hmuhnak aa ṭialnak Biathlam cauk ah, annih cu “tufa thi chungah an puan kha an suk i an puan cu an vaar cang” i Jehovah rian kha “chung zan in a biakinn chungah” an ṭuan tiah a ti. (Biathlam 7:9, 14, 15) Tuu dang hna nih thiang thlarau bawmhnak thawngin Jehovah i a thiangmi a halnak he an i tlak khawh nak hnga a si khawh chungin an i zuam.—2 Korin 7:1.
Kri A Naule Sinah Ṭhatnak Tuahnak
13, 14. (a) Tuu le meheh kong Jesuh langhternak ning in, tuu pawl khamh an sinak cu zei cung ahdah aa hngat? (b) Hi donghnak caan ah, tuu dang hna nih Kri a naule kha zeitindah an bawmh hna?
13 “Thil hna ningcang donghnak hmelchunhnak” kong chimchungnak ah aa telmi langhternak ah tuu le meheh a ṭhennak ahkhan tuu dang hna le turun hmete hna karlak i a ummi a fekmi pehtlaihnak kha Jesuh nih a rak langhter. Mah langhternak ah, Kri nih tuu dang hna i an khamhnak cu amah nih “ka nau le” tiah a auhmi, chiti thuhmi hna cung i an tuahsernak he tampi aa pehtlai tiah fiang teiin a langhter. Hitin a rak ti: “Cun a orhlei i a ummi cu siangpahrang nih cun a thawh hna lai i, ‘Nannih, ka Pa nih thluachuah an pekmi hna, ra tuah u. Ra u law vawlei ser ri in nan caah timh a simi pennak cu ra co tuah u. . . . Hihi kan chimh hna; Ka unau pakhat khat cungah zeitluk hmanh in sifak le nauta si sehlaw, nan tuahmi thil paoh hi ka cung i nan tuah a si ko.’”—Matthai 24:3, NW; 25:31-34, 40.
14 “Nan tuahmi thil paoh” timi bia nih Kri i thlarau lei a nau le sinah dawtnak in bawmhchanhnak hna kha a langhter duhmi a si, Satan vawlei nih annih cu mising pi bantukin a pehtlaih hna i, a cheukhat cu thong chung tiang ah a thlak hna. Rawl, thil puan le ngandamnak zohkhenhnak kha aa zaa in an hmu lo. (Matthai 25:35, 36, footnote) Hi caan donghnak ah, 1914 thawk in chiti thuhmi tamdeuh nih hi bantuk thil sining hi an rak ton cang. Annih cu zumh awk tlakmi an hawile, tuu danghna nih thlarau forhfialnak thawngin an bawmh hna ti kha atu chan Jehovah Hngaltu hna tuanbia nih fiang tein a langhter.
15, 16. (a) Vawlei cung i chiti thuhmi Kri a nau le kha tuu dang hna nih a biapi in zei rianṭuannak ahdah an bawmh hna? (b) Chiti thuhmi hna nih tuu dang hna cungah an i lawmhnak kha zeitindah an langhter?
15 Hi caan donghnak ah hin vawlei cung i chiti thuhmi Kri a nau le hna cu Pathian nih a pekmi hna “miphun vialte hna ca i tehte si awkah Vancung Pennak kong thawngṭha hi khuazakip ah chim” nak rian ah a hlei in tuu dang hna i rianṭuan bawmhnak kha an hmuh. (Matthai 24:14; Johan 14:12) Vawlei cung i chiti thuhmi hna cu kum fatin an zorchuk lio ah, tuudang hna cu cafang ningin a nuai in an milu a karh chin lengmang. Mah hna lak i thong tampi cu caantling phungchimtu—hmaikal le missionary kha an ṭuan—Pennak thawngṭha kha “vawlei cung khuazakip” an thanh. (Lamkaltu 1:8) Midang cu an si khawh tawk in tehte khannak rian ah an i tel i hi a biapimi rian ah phaisa tangka in lunglawm thatho tein an bawmh.
16 Chiti thuhmi Kri a naule nih an hawikom a simi tuu dang hna nih zumh awk tlak tein an bawmhnak hna hi an sunlawiter ngaingai! An lungchung i a ummi kong kha 1986 ah Pathian sal le nih an chuahmi, “Daihnak Bawi” tangah Vawlei Pumpi Himnak timi cauk ah fiang tein langhter a si. Hitin a ti: “Vawlei Ralpi II nak in, ‘hi ningcang donghnak thil’ kong Jesuh profet chimchung bia a tlinnak cu tuu dang lak i aa telmi ‘mibu nganpi’ sining ah a ngandeuh in a tling. . . . Cucaah Matthai 24:14 i [Jesuh] chimchung bia tlinnak ah ram kip, holh kip i ‘mibu nganpi’ hna fakpi in an ṭuannak ruangah lawmhnak tampi an ngei!
‘Kanmah Tel Loin Tlinnak An Hmu Kho lo’
17. Vawlei cungah a rak tho ṭhan hngami zumh awk tlakmi tar hna nih zeitindah chiti thuhmi ‘tel lo in tlinnak an hmuh khawh lo’?
17 Chiti thuhmi pakhat in lamkaltu Paul nih Kri a rat hlan i a rak nungmi zumh awk tlakmi hna kong kha hitin a rak ṭial: “Hi mi vialte hna hi an zumhnak ruangah hin zeitluk in dah thangṭhat awk an tlak? Asinain, Pathian nih a kamhmi hna thil kha a hmuh hmanh an hmu lo, zeicahtiah kan caah Pathian nih khuakhannak ṭha deuh a ngeih caah a si; annih kha kanmah he lawngin tlinnak a hmu kho ding an rak si.” (Hebru 11:35, 39, 40) Kum thongkhat chungah, Kri le chiti thuhmi a naule 144,000 cu vancung ah siangpahrang le tlangbawi an ṭuan lai i Kri khanghthawinak tlanhnak a ṭhathnemnak kha vawlei cungah an chuahter lai. Cuticun tuu dang hna cu an pum le an ruahnak kha ‘a tlingmi ah ser’ an si lai.—Biathlam 22:1, 2.
18. (a) Tuu dang an lung a tlian nak hnga zeibantuk Baibal sining hna nihdah a bawmh hna awk a si? (b) “Pathian fale hna an langh lai” caan kha tuu dang hna nih zei ruahchannak he dah an hngah?
18 Hi vialte nih hin Krifa Krik Baibal ah Kri le chiti thuhmi a naule, cun Jehovah a timhnak tlam a tlinnak a biapimi an sining kha zeicah a hlei in a langhter timi nih tuu dang hna kha an lung a suk ngaingai hna awk a si. Cucaah tuu dang hna nih Armageddon ah le kum thongkhat ah “Pathian fapale hna an langh lai” caan kha an hngah buin chiti thuhmi sal hna kha a lamkip in bawmh awkah caanṭha kha an kawl. “Thutnak sal sinak khan luatter an si lai i Pathian fale hna luatnak a sunglawimi kha an i hrawm lai,” nak caan kha an hngak kho.—Rom 8:19-21, NW.
Ruahnolhnak ah Thlarau lei Lungrualnak
19. “Biatak thlarau” nih chiti thuhmi le an hawi le caah zeidah a tuah i, March 28, zanlei sang ah a hlei in zeitindah an lung aa rual lai?
19 C.E. 33 Nisan 14, zan ah Jesuh nih a donghnak thla a camnak ah hitin a rak ti: “Annih cu an dihlak in pakhat an si nak hnga thla hi ka cam. Ka Pa, keimah cu nangmah chungah ka um i nangmah cu keimah chungah na um bantuk hin annih zong ka chungah um ve hna seh. . . . vawlei nih keimah cu nangmah thlahmi ka si . . . kha a hngalh lai.” (Johan 17:20- 23) Pathian nih dawtnak a ngeih ruangah, chiti thuhmi hna le nawlngaimi vawlei mi kha khamh awkah a Fapa a nunnak kha pek awkah a rak thlah. (1 Johan 2:2) “Biatak thlarau” nih Kri a naule le an hawikom hna kha lung a rualter hna. March 28 zanlei, ni a tlak hnu ah an phu hnih in Kri a thihnak hngalhṭhan awkah ah le Jehovah nih a dawtmi a Fapa, Kri Jesuh raithawinak thawngin an caah a tuahpiakmi vialte hna kha an hun hngalh ṭhan awkah hmunkhat ah an i pum lai. Cu a biapimi caan i an i telnak nih an lungrualnak le Pathian duhnak tuah awk i an biakhiahnak kha a ṭhawnter chin i, cu ti cun Jehovah nih a dawtmi hna lak ah aa telmi sinak an i lawmhnak kha langhter ko hna seh.
Ruahṭhannak In
• “Thlarau biatak” cu hmasa Krifa hna sinah zeitik ahdah thlah a rak si i, zeitindah “bawmtu” a sinak kha a rak langh?
• Zeitindah chiti thuhmi hna nih vancung kawhnak a hmumi an si nak kha an i hngalh?
• Pathian thlarau cu tuu dang hna cungah zeitindah rian a ṭuan?
• Zeitindah tuu dang hna nih Kri a naule sinah ṭhatnak kha an tuah i, zeiruang ahdah chiti thuhmi hna ‘tel loin tlinnak an hmuh khawh lo’?
[Cahmai 11nak i Hmanthlak]
“Thlarau biatak” cu C.E. 33, Pentekos ah zultu hna cungah toih a rak si
Tuu dang hna nih Pathian fialmi phungchimnak rian ah an bawmh hna nak thawngin Kri a naule cungah ṭhatnak an tuah