Na Inkhawhnak Ah Khan Pathian Ṭihzahnak Chap
“Nan zumhnak ah khan . . . inkhawhnak i chap u; inkhawhnak ah khan Pathian ṭihzahnak i chap u.”—2 PITER 1:5, 6.
1, 2. (a) Ngakchia pakhat kongah zeibantuk phun ṭhannak kha dah ruahchan a si? (b) Thlarau lei ṭhannak cu zeitluk biapi dah a si?
NGAKCHIA pakhat a ṭhanmi cu a biapi tuk ko nain pumsa lei ṭhannak menmen lawngin a za lo. Thinlung lei le ruahnak lei ṭhannak zong kha a herh. A caan a zat tikah, ngakchia nih a ngakchia zia hna kha a hun hlawt hna lai i nutling asiloah patling a hung si lai. Lamkaltu Paul nih hi kong kha fianter in hitin a rak ṭial: “Ngakchia ka rak si lioah cun ka biachim le ka thil hmuhning le ka ruahnak cu an rak ngakchia ngai. Atu cu upa ka hung si cang i ngakchia ruahning in thil ruah kha cu ka duh ti lo.”—1 Korin 13:11.
2 Paul a bia hna nih thlarau lei ṭhannak a biapi ti kha a langhter. Khrihfa hna cu thlarau lei ngakchia sinak in ‘khuaruah ning ah nutling patling a simi’ ah ṭhancho an herh. (1 Korin 14:20) “Khrih tlinnak a sanning taktak” an phanh awk a si i phak awkah an i zuam awk a si. Cuticun annih cu “cawnpiaknak tilet le thlichia bantuk a simi nih a kenkip ah a choihmi ngakchia,” an si lai lo.—Efesa 4:13, 14.
3, 4. (a) Thlarau lei upa si awkah zeidah kan tuah awk a si? (b) Zeibantuk Pathian lei ziaza hna kha dah kan langhter awk an si i, mah hna cu zeitluk biapi dah an si?
3 Zeitindah thlarau lei upa kan si khawh lai? A si tawnmi thil sining ah pumsa lei cu amah tein a ṭhang ko, sihmanhsehlaw thlarau lei ṭhannak cu thazang chuahnak a herh. A hmaanmi Pathian Bia hngalhnak kawlnak in thawkin kan cawnmi he aa tlak in tuahnak a herh. (Hebru 5:14; 2 Piter 1:3) Hitin tuahnak thawngin Pathian a ziaza hna kha kan langhter kho. Pumsa lei ṭhannak he aa pehtlaimi a dangdang hna bantuk in, Pathian ziaza a phunphun ah ṭhannak zong a tambik in cun hmakkhat te ah a si tawn ve. Lamkaltu Piter nih hitin a rak ṭial: “Nan zumhnak i ṭhatnak chap kha fakpi in i zuam u; cun nan ṭhatnak ah khan hngalhnak i chap u; nan hngalhnak ah khan mah le mah i uk khawhnak i chap u; mah le mah i uk khawhnak ah khan in khawhnak i chap u; inkhawhnak ah khan Pathian ṭihzahnak i chap u; Pathian ṭihzahnak ah khan unau bantuk in i dawtnak i chap u law unau bantuk in i dawtnak ah khan zawnruahnak i chap u.”—2 Piter 1:5-7.
4 Piter nih aa chang chang tein a ṭialmi ziaza pakhat cio kip hi a biapi i, zeihmanh hi hlawt khawh a si lo. Hitin a peh rih: “Hi thil hi nan herhmi an si i tampi in nan ngeih hna ah cun Bawipa Jesuh Khrih nan hngalhnak ah khan ṭhawnnak an pek hna lai i rian tampi an ṭuanter khawh hna lai.” (2 Piter 1:8) Kan inkhawhnak ah khan Pathian ṭihzahnak chap a herhnak kha zoh hna hmanh u sih.
Inkhawhnak A Herhnak
5. Inkhawhnak cu zeiruang ahdah kan herh?
5 Piter he Paul he inkhawhnak le Pathian ṭihzahnak kha an pehtonh. (1 Timote 6:11) Inkhawhnak ngeih timi cu harnak kha in chih in fekte in hmunhnak menmen kha a chim duhmi a si lo. Mah ah khan hneksaknak, dawnhnak, tukforhnak, asiloah hremnak hna ton tikah lungsaunak, ralṭhatnak, le ruahchannak kha thlau lo in fehnak hna aa tel. “Khrih Jesuh he i pehtlaih i Pathian nunning in,” a nungmi kan si caah hremnak in awkah kan i ruahchan. (2 Timote 3:12) Jehovah kan dawtnak langhter kan duh i khamhnak caah a herhmi ziaza hna kha ṭhanchoter kan duh a si ahcun inkhawhnak kan ngeih hrimhrim awk a si. (Rom 5:3-5; 2 Timote 4:7, 8; Jeim 1:3, 4, 12) Inkhawhnak lo incun, zungzal nunnak kan hmu kho lai lo.—Rom 2:6, 7; Hebru 10:36.
6. A dongh tiang inkhawhnak nih zeibantuk tuahnak kha dah a chim duh?
6 A hram kan thawknak cu zei tluk ṭha a si hmanh ah, a biapi bikmi cu inkhawhnak kan ngeihmi kha a si. Jesuh nih hitin a ti: “A dongh tiangin a fekmi cu khamh an si lai.” (Matthai 24:13) A si, atu kan nunnak a dongh tiang asilole hi thil hna ningcang ṭhalo a dongh tiang inkhawhnak kan ngeih hrimhrim awk a si. Zei kong hmanh a si ah, Pathian sinah kan zumhfehnak kha a hmunh hrimhrim awk a si. Asinain, kan inkhawhnak ah khan Pathian ṭihzahnak kan chap lo a si ahcun, Jehovah a lung kan lawmhter lai lo i zungzal nunnak kan hmu lai lo. Sihmanhsehlaw Pathian ṭihzahnak cu zeidah a si?
Pathian Ṭihzahnak Timi A Sullam
7. Pathian ṭihzahnak cu zeidah a si i, mah nih khan zeidah tuah awkah a kan hnek?
7 Pathian ṭihzahnak cu Pathian i universal a nawlngeihnak kha zumh awk tlak tein cohlannak thawngin a chuakmi pumpak upatnak, biaknak, le Jehovah a rian ṭuannak kha a si. Jehovah upatnak he Pathian ṭihzahnak kha langhter awkah, amah kha le a lam hna kha a hmaan tein hngalh a herh. Pathian kha pumpak pakhat in, i hawikom ngai tein hngalh kha kan duh awk a si. Mah nih khan kan tuahnak hna le kan nunnak lam in a langhter mi, amah he thinlung tak tein i pehtlaihnak kha ṭhanchoter awkah a kan forh lai. Jehovah kha a si khawh chungin lawh—a lam hna le a ziaza le a sining hna i cawn kha kan duh awk a si. (Efesa 5:1) Angai tein, Pathian ṭihzahnak nih kan tuahnak kip ah Pathian kha a lung lawmhter awkah a kan forh.—1 Korin 10:31.
8. Zeitindah Pathian ṭihzahnak le zeihmanh ngaan lomi pumpeknaknak cu an i pehtlaih?
8 Pathian kha ṭihzah taktak awkah, Jehovah lawnglawng kha kan biak awk a si, kan lung chungah amah a umhmun a rawlhtu zei thil hmanh kha kan awnh awk a si lo. Kan sertu a si caah, zeihmanh a ngaan lomi pumpeknak pek awkah aa tlak. (Deuteronomi 4:24; Isaiah 42:8) Asinain, Jehovah nih amah kha biak awkah hramhram in a kan hnek lo. Kanmah lungtho tein kan biakmi kha a duh. A hmaan tein amah kan hngalhnak cungah aa hngatmi, Pathian kan dawtnak nih kan nunnak kha i thianh awkah le amah sinah zeihmanh ngaan lomi pumpeknak kha tuah awkah le mah ningte in nun awkah a kan forh.
Pathian He I Pehtlaihnak kha Dirh
9, 10. Zeitindah Pathian he naih tein i pehtlaihnak kha kan dirhkhawh i kan hmunhter khawh?
9 Tipil innak thawngin Pathian sinah kan i pumpeknak kha kan langhter hnu ah, amah he pumpak tein kan i pehtlaih deuh nakhnga fehter rih kan herh. Cucaah mahkha kha tuah awkah le zumh awk tlak tein Jehovah kha biak awk kan duhnak nih a Bia kha cawn peng awkah le mah kha fakpi in ruah awkah a kan forh. Pathian thlarau kha kan lungthin le kan ruahnak ah rian kan ṭuanter a si ahcun, Jehovah kan dawtnak cu a thuk deuh lai. Amah he kan i pehtlaihnak cu kan nunnak ah a herhbikmi thil a si peng lai. Jehovah kha kan hawikom ṭhabik bantuk in kan pehtlaih i zeitik caan paoh ah amah a lunglawmhter kha kan duh. (1 Johan 5:3) Pathian he kan i pehtlaihnak a ṭhanmi kha kan i lawm i, cun a herhnak ah dawtnak he a kan cawnpiakmi le a kan chimhhrinhmi kha kan i lawm.—Deuteronomi 8:5.
10 Jehovah he a sunglawimi kan i pehtlaihnak kha fehter awkah kan i zuam peng lo ahcun, a zor kho. Cutin a si a si ahcun, mahcu cu Pathian palh a si lai lo, zeitintiah “Pathian cu aho kan sin hmanh in aa hlat lo.” (Lamkaltu 17:27) Jehovah nih amah naih kha a harmi ah a siter lo caah lunglawmh awk a va si dah! (1 John 5:14, 15) Cu a si caah, Jehovah he pumpak i pehtlaihnak kha fehter awkah kan i zuam hrimhrim awk a si. Asinain, Pathian ṭihzahnak kha dirh awk le hmunh ter peng awkah kan herhmi bawmhnak dihlak hna kha a kan pek nak thawngin amah kan naih khawh deuh nakhnga a kan bawmh. (Jeim 4:8) Hi dawtnak in a kan khaanpiakmi dihlak hna hi tlamtling tein zeitindah kan hman khawh hna lai?
Thlarau Lei ah Na Thaṭhawng Peng Ko
11. Pathian kan ṭihzahnak a langhtermi cheukhat hna cu zei hna dah an si?
11 A hram bunhmi Pathian kan dawtnak nih khan Pathian kan ṭihzahnak zeitluk tiang a si ti kha langhter awkah a kan forh, mahcu cu Paul nih hitin ruahnak cheuhnak bia a rak chimmi he aa tlak ngaingai: “A rian a zahpi lomi, Pathian biatak hmaan tein mi a cawnpiaktu saya bantuk in Pathian hnatlaknak kha na hmuh khawh nakhnga fakpi in i zuam.” (2 Timote 2:15) Hitin tuahnak ah Baibal cawnnak hmaan tein tuahnak, pumhnak kainak, le lohmun rian ṭuannak ah i telnak timi tuahtawn zungzalmi phung hna kha hmunhter awkah a herh. “A zungzal in thlacam,” nak zongin Jehovah he kan i naih kho. (1 Thesalon 5:17) Hi hna cu Pathian kan ṭihzahnak a sullam ngei in a langhtermi hna an si. Mah hna lak i pakhat khat kha kan daithlanh a si ahcun thlarau lei zawtnak kha a chuahter khawh i Satan a zernak ah a kan tlakter khawh.—1 Piter 5:8.
12. Hneksaknak hna kha zeitindah hlawhtling tein kan tei khawh hna?
12 Thlarau lei thazang ṭhawnnak le i zuamnak nih hneksaknak tampi hna kha tei khawh awk zongah a kan bawmh. Hneksaknak hna cu fakpi in a kan hneksak khomi a hrampi hna in a ra kho. Zeirel lonak, ralchanhnak, le hremnak hna cu aa naihmi inchungkhar chungmi hna, rualchan cingla hna, asiloah innpa hna sinin a rat tikah inkhawh awkah a har khun kho. Kan rianṭuannak hmun ah asiloah sianginn ah a chuak khomi hlenthawinak nih kan Khrihfa phunglam hna kha ṭhumh awkah a kan hnek khawh. Hnabei donghnak, zawtnak, le lungretheihnak hna nih pumsa lei ah kan tha a kan derter khawh i zumhnak hneksaknak hna kha tei awkah a harter deuh khawh. Sihmanhsehlaw ‘Pathian ni kan hngah lioah hin kan nuning cu a thiangmi le Pathian sin i pekmi a si” nakhnga fakpi in kan i zuam ahcun hneksaknak dihlak kha hlawhtling tein kan tei khawh ko hna. (2 Piter 3:11, 12) Cun Pathian thluachuahnak kha kan hmuh hrimhrim lai tiah zum in, cutin kan tuahnak ah kan i lawm peng kho.—Phungthlukbia 10:22.
13. Pathian ṭihzahnak kan ngeih nakhnga zeidah kan tuah awk a si?
13 Satan nih Pathian ṭihzahnak a langhtermi hna kha a bikin aa hmuitinh ko hna nain, kan ṭih a herh lo. Zeiruang ahdah? Zeitintiah “Pathian nih harnak an in mi chungin Pathian a ṭihmi hna khamh cu a thiam.” (2 Piter 2:9) Hneksaknak kha inkhawh awkah le cu bantuk khamhnak kha hmuh awkah, “Pathian zei rel loin kan um tawnnak le hi vawlei cung pumsa duhnak hlawt . . . i hi vawlei cungah hin mah le mah aa uk khomi si awk le ding tein nun le Pathian ṭihzah in” kan um hrimhrim awk a si. (Titas 2:12) Khrihfa in, pumsa duhnak le tuahsernak hna i tel in zeibantuk derthawmnak hmanhnih Pathian kan ṭihzahnak a rak eihmuar i a hrawh nakhnga lo kan i ralrin a hau. Hi ṭhihphaihnak cheukhat hna kha a tu ah kan i ruah hna hmanh lai.
Pathian Ṭihzahnak A Ṭhihphaihmi Hna kha I Ralring
14. Pumsa lei thilri rap in lem kan si ahcun zeidah kan i cinken awk a si?
14 Mi tampi caah thilri chawva lawng biapi chiahnak cu rap pakhat a si. Kanmah le kanmah hmanh kha kan i hleng kho men, “biaknak [Pathian ṭihzahnak] hi rumnak lam ah . . . rel,” in cu ti cun zumtu hawi hna nih an kan zumhnak kha aa tlak lomi ṭhathnemnak ah ralṭha ngai in kan i lak khawh. (1 Timote 6:5) Cham ṭhan khawh dawh kan si lo buin khuasak a ṭhami Khrihfa pakhat sinah tangka va cawi kha zei a poi lo ti hmanhin kan ruah kho men. (Salm 37:21) Sihmanhsehlaw “atu kan nunnak ca he hmailei kan nunnak ca he bia a kan kamh,” mi a kan hmuhtertu cu Pathian ṭihzahnak a si, pumsa lei thilri kawlnak kha a si lo. (1 Timote 4:8) “Zeidah vawlei ah hin kan hun i chuahpi? Zeihmanh kan i chuahpi lo. Cu bantuk in hi vawlei in kan kal tik zongah zeihmanh kan i kalpi kho lai lo,” caah ‘mah le tinvo ah lung hnangamnak he Pathian ṭihzahnak’ kha kawl awkah fak deuh in i zuam u sih law “rawl le fenhaih kan ngeih ah cun kan i zat awk a si.”—1 Timote 6:6-11.
15. Nuamhnak kawlnak nih Pathian kan ṭihzahnak kha zorter deuh awkah a ṭhihphaih a si ahcun zeidah kan tuah khawh?
15 Nuamhnak kawlnak nih Pathian kan ṭihzahnak a zorter khawh. Mah kong he aa tlai in mersannak tuah kan herhmi kha kan mersang kho lai maw? Kan mersan khawh, takpum cawlcanghnak le nuamhngaihnak in ṭhathnemnak cheukhat kan hmuh. Asinain, cu bantuk laksawng hna cu zungzal nunnak he tahchunh in cun a hmete an si. (1 Johan 2:25) Nihin ah, mi tampi cu “Pathian nakin nomhnak kha an duh deuh lai; kan biaknak phung hi a lenglei in an i tlaih, sihmanhsehlaw a chung i a ummi ṭhawnnak taktak kha cu an duh lai lo,” cu bantuk mi hna cu kan hrial hna a hau. (2 Timote 3:4, 5) Pathian ṭihzahnak a hlei in a langhtermi hna cu “hmailei an hram fehnak ding ca i ro an i khon a si ko. Cun nunnak taktak a simi nunnak cu an hmuh khawh lai.”—1 Timote 6:19.
16. Zei bantuk sual duhnak hna nihdah Pathian nih a kan halmi dinnak he aa tlakin nunnak in a kan pialter i, hi duhnak hna kha zeitindah kan tei khawh lai?
16 Zu le rit khawhmi sii ningcang loin hmannak, ziaza rawhnak le sual duhnak hna nih Pathian kan ṭihzahnak kha a hrawh khawh. Hi hna i tei ternak nih Pathian nih a kan halmi ding tein nun dingah a kan donh khawh. (1 Korin 6:9, 10; 2 Korin 7:1) Paul hmanh nih sual tuah duhnak taksa he khan i doh zungzalnak kha a rak ton. (Rom 7:21-25) A hmaan lomi duhnak hna kha a dihlak tein hloh dih cikcek awkah a fekmi ri ngeih a hau. Pakhatnak ah, lungthin lei thiannak kha kilven awkah rikhiahnak kan ngeih a hau. Paul nih hitin a kan ti: “Nan chung i rian a ṭuanmi pum duhnak: nu le pa sualnak te hna, dawhcah loin umtu khuasak te hna, hornak te hna, thin ṭhalo te hna le hakkauhnak te hna hi nan thah hrimhrim awk an si.” (Kolose 3:5) Cu bantuk sualnak thil hna he aa tlaimi kan pum chung i rian a ṭuanmi pum duhnak hna thah awkah, mah hna kha hlawt awk, hrawh awk timi rikhiahnaknak kha a herh. Pathian bawmhnak caah lungtak tein thlacamnak nih a hmaan lomi duhnak hna kha hlaw in hi thil hna ningcang ṭhalo lakah hin dinnak le Pathian ṭihzahnak kha a kan kawl ter.
17. Chimhhrinhnak kha zeitindah kan hmuh awk a si?
17 Hnabeidonghnak nih kan inkhawhnak kha a tha a derter i Pathian kan ṭihzahnak a lohter khawh. Jehovah a salle tampi cu hnabeidonghnak kha an ton. (Nambar 11:11-15; Ezra 4:4; Jonah 4:3) A hlei in hnabeidonghnak cu zeirel lonak asiloah fakpi in mawhchiat asiloah chimhhrinh kan si tiah kan ruah ruangah lungtlinlo in umnak he aa kawmh asi ahcun mah nih khan a kan hrawh khawh. Asinain, mawhchiatnak le chimhhrinhnak hna cu Pathian zawnruahnak le siaherhnak a langhnak an si. (Hebru 12:5-7, 10, 11) Chimhhrinhnak kha dantatnak in si loin Pathian dinnak lamah a kan cawnpiakmi ti in kan ruah awk a si. Toidawrnak kan ngeih a si ahcun, ruahnak cheuhnak kha a man kan sunter lai i kan cohlan lai, “mawhchiatnak cu nunnak lam a si,” tiah kan ruah lai. (Phungthlukbia 6:23, NW) Mah nih khan Pathian ṭihzahnak kawlnak ah thlarau lei ṭhanchonak ṭha kha hmuh awkah a kan bawmh khawh.
18. Pumpak i remlonak kong hna he aa tlai in thil a chuah tikah zei ṭuanvo dah kan ngeih?
18 I theihthiamlonak hna le pumpak i remlonak hna nih Pathian kan ṭihzahnak ah zuamcawhnak a chuahter kho men. Hi hna nih lungretheihnak kha a chuahter asiloah mi cheukhat cu thlarau lei an unau hna sinah um loin anmah le anmah kha a dang tein um awkah fimnak a si lomi kehlan kha lak dingin a forh hna. (Phungthlukbia 18:1) Sihmanhsehlaw lungthli i uamnak asiloah mi dang cungah huatnak lungthin ngeih peng nak hna nih Jehovah he kan i pehtlaihnak kha a hnorsuan ti kha kan philh awk a si lo. (Levitikas 19:18) A ngai tein, “a hmuhmi a unau hmanh a dawt khawh lo ahcun a hmuh lomi Pathian cu a daw kho lai lo.” (1 Johan 4:20) Jesuh nih tlangcung a cawnpiaknak ah, pumpak hnahnawhnak kong kha tei khawh awkah tuah colh awk a simi kehlan a herhnak kong kha biapi in a rak chim. A bia a ngaimi hna kha hitin a rak ti hna: “Cucaah Pathian sinah nan laksawng cu biakṭheng cung i pekchanh na zalh tikah khan, na unau pakhatkhat kha na cungah thin hunnak a ngei ti na hun hngalh ahcun, biakṭheng hmai ah cun na laksawng cu chiata ko law khulrang in va kal law na unau he khan remnak va tuah, cu hnu ah cun ra ṭhan law Pathian sinah na laksawng cu va pe.” (Matthai 5:23, 24) Zangfahnak ngei loin chimmi biafang hna asiloah tuahsernak hna thawngin a chuakmi hma kha ngaihthiam halnak nih a damter khawh. Ngaihthiamnak kha kan hal i thil kha aa tlaklo ning piin kan tonghthamh ti kha kan cohlan a si ahcun a rawkmi kha kan damh ṭhan khawh i a daimi pehtlaihnak kha kan dirh ṭhan khawh. Jesuh nih hnahnawhnak tonghthamning a dang ruahnak cheuhnak zong kha a kan pek. (Matthai 18:15-17) Harnak hna kha tei awkah thazang chuah i zuamnak in hlawhtlinnak kan hmuh tikah lunglawmh awk a va si dah!—Rom 12:18; Efesa 4:26, 27.
Jesuh Nunning Kha Zul
19. Jesuh a nunning i zohchunh cu zeiruang ahdah biapi a si?
19 Hneksaknak hna nih a kan kulh ko lai, sihmanhsehlaw mah hna nih khan zungzal nunnak tlikzuamnak in a kan pialter awk a si lo. Jehovah nih hneksaknak in a kan khamh khawh ti kha philh hlah. “Kan tlaihchanmi sualnak vialte kha hlaw hna u sih” law “kan hmai i chiahmi tlikzuamnak ah khan [“inkhawhnak he tlik,” NW] i zuam u sih. Jesuh kha fekte in i zohchih u sih, amah cungah khan kan zumhnak cu a hramthawk in a dongh tiang a um.” (Hebrews 12:1-3) Jesuh a nunning kha tling khitkhet in hlathlai u sih law biachimnak ah siseh tuahsernak ah siseh amah kha i zohchunh awkah kan i zuamnak nih Pathian ṭihzahnak kha ṭhancho ter awkah le tlamtling tein mah Pathian ṭihzahnak kha langhter nakhnga a kan bawmh lai.
20. Inkhawhnak le Pathian ṭihzahnak kawlnak thawngin zei bantuk laksawng dah hmuh a si lai?
20 Kan khamhnak a fiannak hnga inkhawhnak le Pathian ṭihzahnak cu hmunkhat ah rian an ṭuan ṭi. Hi a sunglawimi ziaza hna kan langhternak thawngin, Pathian rian kha zumh awktlak tein kan ṭuan khawh. Inkhawhnak kan ngei i Pathian ṭihzahnak kha kan langhter caah Jehovah dawt zangfahnak le thluachuahnak kha kan hun hmuh tikah hneksaknak tang hmanhah, kan lung aa lawm ko lai. (Jeim 5:11) Cu lengah, Jesuh theng nih fek tein hitin a kan ti: “Zeitikhmanh ah nan lung dong hlah u, zeicahtiah hi ti hin pei nan nunnak cu nan khamh lai cu.”—Luka 21:19.
Zeitindah Na Leh Lai?
• Zeiruang ahdah inkhawhnak cu a biapi?
• Pathian ṭihzahnak cu zeidah a si i, mahkha kha zeitindah langhter a si?
• Zeitindah Pathian he a fekmi petlaihnak kha kan ser khawh i kan hmunhter khawh?
• Pathian kan ṭihzahnak a ṭhihphaihmi thil cheukhat hna cu zeidah an si i, mahhna kha zeitindah kan hrial khawh hna?
[Cahmai 15nak i Hmanthlak]
Pathian ṭihzahnak cu lam phun tampi in langhter a rak si
Pathian na ṭihzahnak a ṭhihphaihmi thil hna kha i ralring