‘Pathian Bia Baibal Hmaante In Hmannak’
“A rian a zahpi lomi, Pathian biatak hmaante in [“a hmang i, NW] mi a cawnpiaktu saya bantuk in Pathian hna tlaknak kha na hmuh khawhnak hnga fakpi in i zuam.” —2 TIMOTE 2:15.
1, 2. (a) Zeiruang ah rianṭuantu nih hriamnam a herh? (b) Khrihfa hna cu zei rian dah pek an si i, Pathian Pennak hmasa bik an kawl kha zeitindah an langhter?
Rianṭuantu hna cu an rian an lim nakhnga hriamnam an herh. A si nain, zei hriamnam paoh i ngeih lawng in a za lo. Rianṭuantu nih aa tlakmi hrimnam kha aa tlak ning in hman a herh. Tahchunhnak ah, thil chiahnak inn sak lioah, thingpheng kha hmun khat ah khenh na duh ahcun, sobul le thirkhenh leng in ngeih na herhmi a um ko lai. Thing ah thir kawiter lo in na khenh thiam awk a si lai. Sobul hman thiam lo in thirkhenh naa zuamlen ahcun a har ngaingai lai i, pakpalawng hmanh a si ko lai. Sihmanhsehlaw hriamnam ṭha tein na hman thiam ahcun na rian lungsite in na lim lai.
2 Kannih Khrihfa hna zong ṭuan awk rian kan ngei. Cu rian cu a biapi bikmi rian a si. Jesuh nih ‘Pathian Pennak kha hmasa bik ah kawl u’ tiah a zultu kha a rak forh hna. (Matthai 6:33) Cucu zeitindah kan tuah khawh lai? Lam khat cu Pennak kong chim le zultu siternak rian lungtho tein ṭuannak thawngin a si. A dang lam khat cu Baibal ah kan phungchimnak a hram kan bunhnak thawngin a si. Lam thumnak cu a ṭhami ziaza langhternak a si. (Matthai 24:14; 28:19, 20; Lamkaltu 8:25; 1 Piter 2:12) Khrihfa rian ṭuannak ah hlawhtlinnak le lawmhnak kan hmuh nakhnga, aa tlakmi hrimnam le mah khakha aa tlak tein zeitindah hman awk a si ti hngalh a herh. Hi kong ah hin, Lamkaltu Pawl nih Khrihfa rianṭuantu pakhat in a langngaimi zohchunh awk a rak langhter i, ka nawl ka cawng u tiah zumtu hawi kha a rak forh hna. (1 Korin 11:1; 15:10) A si ahcun, kan rianṭuan hawi Pawl sin in zeidah kan cawn khawh?
PawlLungthomi Pennak Thawngthanhtu
3. Ziruang ah Lamkaltu Pawl cu lungthomi Pathian Pennak rianṭuantu a rak si?
3 Pawl cu zeibantuk rianṭuantu dah a si? “Lungthomi” rianṭuantu a si taktak. Pawl nih cun Mediterranean eria velchum leng tiang thawngṭha karhter awkah lungtho ngai in a rak chim. Teimami Pawl nih lungtho ngai in Pathian Pennak a thanhnak a ruang kha hitin a chim: “Thawngṭha ka chim ruang menmen ah hin kaa porhlawt awk a si lo. A ngaite ti ahcun, va chim, tiah fial pei ka si cu. Thawngṭha cu chim lo in rak um ning law zeitluk in dik ka caah a poi hnga!” (1 Korin 9:16) Pawl nih amah nunnak khamhnak ca lawng maw a ruah? A si lo. Amah cu mah zawn lawng a ruatmi a si lo. Midang zong thawngṭha thawng in ṭhathnemnak hmu ve hna seh ti a duh. Hitin a rak ṭial: “Hi vialte hiti in ka tuah cu thawngṭha ruang ah khan a si, cu thawngṭha cu mi vialte ka hrawm khawh hna nakhnga ka duh caah a si.”—1 Korin 9:23.
4. Khrihfa hna nih zeidah biapi bik an chiah?
4 Lamkaltu Pawl cu mah thiamnak lawng bochan khawh a si lo ti a hngalmi toidormi rianṭuantu ṭha pakhat a si. Lehtama pakhat nih thir khenhnak sobul a hman bantuk in Pathian bia a ngaitu hna lungchung lut lak in cawn piak awkah aa tlakmi hriamnam kha Pawl nih a hman awk a si ve. Zei hriamnam dah biapi in a rak hman? Pathian bia, a thiangmi Baibal hi a si. Cubantuk in, zultu siternak caah biapi in kan hman dingmi cu Baibal hi a si.
5. Hmual a ngei mi phungchimtu si awkah, Baibal chung ummi hun sawh leng in zeidah tuah a herh rih?
5 Hmaante in Baibal hmannak ah hin a chung ummi hun sawh lawng a za lo ti kha Pawl nih a rak hngalh. “leemnak” kha a rak hman. (Lamkaltu 28:23) Zeitindah a rak hman? Pathian Pennak biatak kha mi tampi nih an cohlan khawh nakhnga lung fiang lakin chim awkah Baibal kha hlawhtling tein a rak hman. Anmah he ṭha tein an rak i ruah. Pawl cu Efesa khua pumhnak ah khan thlathum chung ‘Pathian Pennak kong a rak ruah hna i a leem hna.’ “cheukhat cu an lung a khong i an zum duh lo” lioah a dang nih cun an zumh. Efesa khua i Pawl phungchimnak thawng in “Bawipa bia cu a karh chin lengmang i a ṭhang i a thawng chin lengmang.”—Lamkaltu 19:8, 9, 20.
6, 7. Pawl nih a phungchimnak kha zeitindah a sunparter i, cutin zeitindah tuah khawh a si ve?
6 Lungthomi Pennak thawngthanhtu pakhat in, Pawl nih ‘a phungchimnak kha a rak sunparter.’ (Rom 11:13) Zeitin dah? Mah le mah aa rak hlorh lo; cun Pathian rianṭuan hawi pakhat in zapi hngalh zong kha a ning a rak zak lo. Cucan ah, a phungchimnak rian kha a sang bikmi upat awk rian in a rak hmuh. Pawl nih Baibal kha thiam ngai le hmual ngei ngai in a rak hman. Thei tampi a tlaimi a rian nih midang lung kha a thawhter i an rian kha tling deuh in ṭuan awkah a rak bawmh hna. Cuti zong in, a phungchimnak rian kha a rak sunparter.
7 Lamkaltu Pawl bantuk in, Baibal kha atu le atu hmual ngei ngai in hmannak thawng in kan phungchimnak rian kha kan sunparter khawh ve. Lohmun rianṭuannak phunphun ah kan i tinhmi cu mi tam khawh chung tam in Baibal hngalhter kha a si awk a si. Cutin tuah tikah zeitindah mi kan leem khawh hna lai? Hi a biapimi lam thum hi ruat hna: (1) Baibal kha a upatter hngami lamin lungtak in zohter. (2) Baibal chimmi kha fimhring tein fianter law aa tlaihning kha fianter. (3) A cohlan khawh hngami lam in Baibal khan tuaktan.
8. Nihin Pennak phungchimnak caah zei hriamnam dah kan ngeih i, khakha zeitindah na hman cang?
8 Pawl phungchim lioah a rak um lomi hriamnam tuchan Pennak thawngthanhtu hna nih an ngeih mi a um. Cu chungah cauk, mekazin, brochure, weisa, cauk hme tete, audio le video an i tel. A luan cia kumzabu chungah, tehte khannak catlap hna, thingkuang holh thiammi hna, thawngthanhnak mawtawka hna le radio in biachimnak zong kha an rak hman hna. Kan caah a ṭha bikmi hriamnam cu Baibal hi a si, cun um loin a si kho lomi hriamnam kha ṭha te le tlak tein hman a herh.
Kan Phungchimnak Cu Baibal Ah A Hram Aa Bunh Lai
9, 10. Baibal hmannak kong he pehtlai in, Timote sin i Pawl ruahnak cheuhmi in zeidah kan i cawn khawh?
9 Hmual a ngeimi hrimnam pakhat bantuk in Baibal hi zeitindah hman khawh a si? Pawl nih a rian ṭuanhawi Timote sinah a chimmi hi bia hna hi ṭha tein zohnak thawngin a si: “A rian a zahpi lomi, Pathian biatak hmaante in mi a cawnpiaktu saya bantuk in Pathian hna tlaknak kha na hmuh nakhnga fakpi in i zuam.” (2 Timote 2:15) ‘Pathian biatak hmante in hman’ awkah zeidah kan tuah lai?
10 ‘Hmaante in’ tiah lehmi Krik biafang cu a biafangning in “dingte in tannak” ti a si. Khrihfa Krik Baibal chungah Pawl nih Timote sin forhnak bia a rak chimmi lawng ah cu biafang kha a hman. Lei dingte in thuannak ah cu biafang cu hman khawh a si. Lei thuan a thiammi pakhat nih a thuanmi a ngawi ah cun a lung a ṭha hrimhrim lai lo. ‘A rian a zahpi lomi cawnpiaktu pakhat’ si awkah Baibal biatak cawnpiaknak khan pial khawh a si lo tiah Timote cu ralrinnak pek a rak si. Amah hmunhning in cawnpiaknak nawl a ngei lo. A cawnpiaknak le a phungchimnak cu Baibal ah a hram a bunh hrimhrim awk a si. (2 Timote 4:2-4) Cuticun, mi dingmi hna cu vawlei ruahnak i laak loin, Jehovah thil hmuhning in hmuh awk ah lamhruainak an hmu lai. Nihin zong cutin a si ve.
Kan Ziaza A Ṭha Lai
11, 12. Pathian Bia hmaante in hmannak cungah ka umtu nih zei ṭhatnak dah a chuahter khawh?
11 Baibal biatak kan thanhnak in Baibal hmaante in hman lawng a za lo. Kan umtuziaza nih a zulh awk a si. ‘Kannih cu Pathian he rian a ṭuan ṭimi kan si’ caah chungthu lengnal rianṭuantu kan si awk a si lo. (1 Korin 3:9) Cathiang nih hitin a ti: “Nannih midang a cawn a piaktu saya hna, zeicahdah nanmah cu nan i cawnpiak kun lo? ‘Fir hlah u’ tiah phung a chimtu hna, zeicahdah nan fir kun? ‘Va cung in pa i duh hlah u’ a ti tu hna, zeicahdah nan i duh kun? Siasal a fihmi hna, zeicahdah siasal biakinn cu nan ramh kun hna?” (Rom 2:21, 22) Cucaah, nihin Pathian rianṭuantu in, hmaante in Baibal hmannak lam khat cu hi chimhhrinnak kan zulhnak thawng in a si: “Bawipa kha na lungchung dihlak in i bochan law nangmah fimnak kha i rinh hlah. Na kalnak kip ah amah kha hngal law amah nih na lam kha a tluanter lai.”—Phungthlukbia 3:5, 6.
12 Baibal hmaante in kan hmannak thawng in zei ṭhatnak dah kan hmuh khawh? Mi dingmi hna nunnak ah ṭhatnak a chuak khomi Pathian Bia a ṭhawnnak kha ruat hmanh.
Baibal Nih Thlen Khawhnak Ṭhawnnak A Ngeih
13. Mi pakhat cu Baibal a zulhnak nih zei ah dah a canter khawh?
13 Pathian bia kha bochan awk tlakmi in cohlan tikah, cu a bia cu chingchiah awk tlak in minung nunnak kha thlen khawhnak ṭhawnnak a ngei. Pathian Bia rianṭuannak kha Pawl nih a rak hmuh. Cun hlan lio Thesalon khua in Khrihfa a hung cangmi hna cung i ṭhatnak a chuahnak zong kha a rak hmuh. Cucaah annih kha hitin a ti hna: “Cun kan Pathian sin i kan i lawmhnak zong a dang a um rih: Pathian bia nan sin kan phakpi tikah khan minung bia bantuk in si lo in Pathian bia bantuk in nan rak cohlan—Pathian bia cu a si taktak, nan sin kan phak pimi cu. Cu ti cun zeitindah a si khawh tiah, Pathian nih a zummi nan lakah rian a ṭuan caah a si.” (1 Thesalon 2:13) Kha Khrihfa hna ca lawng ah si lo in, Khrih zultu taktak a simi vialte ca zong ah, minung ruah khawhnak hmete cu, Pathian ngeihmi a sang bikmi fimnak he tahchunh khawh a si lo. (Isaiah 55:9) Thesalon khuami hna cu ‘temh innak tampi an huat nain thiang thlarau sinin a rami bia kha lawm tein an cohlan’ i a dang zumtu caah zohchunh awk an rak si.—1 Thesalon 1:5-7.
14, 15. Baibal bia cu zeitluk in dah a ṭhawn i, zeiruang ah?
14 Baibal hrampi a simi Jehovah, bantuk in Baibal ca cu ṭhawnnak a ngei. Cucu “van khi” a sertu, “a nungmi Pathian” sinin a ra mi bia a si i cu a bia cu ‘a thlah hnawh chanmi thil ah khan a tlam a tling’ zungzal. (Hebru 3:12; Salm 33:6; Isaiah 55:11) Baibal thiammi pakhat nih hitin a fianter: “Pathian nih Amah le amah kha a bia he a ṭhen lo. Amah he aa pehtlai lo bantuk in an i pehtlaihnak kha a hlaw lo. . . . Cucaah cucu a thimi a si bal lo, a chim dih hnu ah a sining in va si ko seh tinak a si lo; a ruang cu a nungmi Pathian he hmun khat ah ṭemmi an si caah a si.
15 Baibal bia cu zeitluk in dah a ṭhawn? A ṭhawng hringhranmi a si i Pawl nih tlak ngai in hitin a ṭial: “Pathian bia cu a nung i a ṭhawng. Kap hnih har vainam nakin a har deuh. Hlanglak in a cheu khawh, nunnak le thlarau an i tonnak tiang, hliahcang le thlek an i tonnak tiang a cheu khawh. Minung lungthin duhnak le ruahnak vialte kha a hngalh dih.” —Hebru 4:12.
16. Baibal nih minung pakhat kha tling khitkhet tein zeitindah a thlenter khawh?
16 Baibal bia cu “kap hnih har vainam nakin a har deuh.” Cu ti cun, a thil pemh khawhnak a ngan ngaingai caah minung zei hriamnam hmanh kha a lonh dih hna. Baibal nih minung chung i a thuh bik nak kha tleng lak in a chunh khawh i a chunglei kha a thlenter khawh, cun a ruahning le a duhmi cungah ṭhatnak a chuahter i cohlan awk tlak a simi, Pathian rianṭuantu pakhat a siter khawh. A ṭhawng ngaimi hriamnam a va si dah!
17. Baibal nih thlenter khawhnak ṭhawnnak a ngeihmi kha fianter.
17 Mi pakhat nih amah le amah zei ti aa hmuh ah siseh, mi hmai zeiti a um ah siseh Baibal nih cun a sining taktak in a phuan. (1 Samuel 16:7) A zeimaw caan ah, miṭhalo pakhat hmanh nih zangfahnak a ngeimi asilole Pathian lei aa pemi i siter in a chung sining kha a thuh khawh ko. Miṭhalo cu timhnak ṭhalo ngei in i titer an hmang tawn. Miporhlaw nih toidormi an i lawhter nain a ngaingai ti ahcun thangṭhat hmuh an duh caah a si. Asinain, Baibal nih lungchung sining taktak kha a phuan caah, toidormi nih mihring hlun kha hlaw in “Pathian he aa lo in sermi mi hring thar kha an i hruk . . . cucu a dingmi le a thiangmi nunning i a langmi nunnak taktak kha a si.’ (Efesa 4:22-24) Cun Baibal cawnpiaknak nih miralchia pawl kha ralṭhami Jehovah Hngaltu le teimami Pennak thawngthanhtu a siter khawh hna.—Jeremiah 1:6-9.
Baibal nih a ngeihmi thlenter khawhnak Ṭhawnnak
18, 19. Hi catlang bu hna asilole lohmun rianṭuannak i pumpak hmuhtonnak kha hram bunh in, Baibal nih minung lungputning a thlen khawhnak kong kha fianter.
18 Baibal nih a ngeihmi thlenter khawhnak ṭhawnnak nih khuazakip a ummi mi hna kha ṭhatnak a pek hna. Tahchunhnak ah, Cambodia ram, Phnom Penh khua i Pennak thawngthanhtu hna cu, Kompong Cham peng ah thla khat voihnih phung an rak chim tawn. Biaknak lamhruaitu dang nih Jehovah Hngaltu hna an doh hna ti a theih hnu ah, cu hmun i biaknak hruaitu nu pakhat nih khan kan peng an rat ṭhan tikah Jehovah Hngaltu pawl ka ton hna lai tiah aa rak i tim. Puaituah ni hna kong kha dongcat loin a hal hna i Baibal in an fiantermi kha ṭha tein a rak ngaih. Khi tikah cu minu nih hitin a ti: “Nan kong ka hawile chimmi a hmaan lo ticu atu ka hngalh cang! Baibal an hmang lo an in ti hna, sihmahsehlaw, nihin zing ah nan zate nih pei Baibal nan hman dih hi!”
19 Cu minu cu Jehovah Hngaltu hna he Baibal a cawng lengmang, Biaknak rian in phuah na si lai ti an tlerh zong ah zei a rak rel lo. Baibal a cawnnak kong kha a hawinu a chimh i, a rauhhlan ah a hawinu zong Baibal cawn hram aa thawk ve. Biaknak rian a ṭuanmi nu cu a cawnmi kong ah a tha a thotuk i a biaknak pumhnak pakhat ah a kal i, “Jehovah Hngaltu hna he Baibal ra cawng u!” tiah a rak ti hna. A rauhhlan ah, kha biaknak chungtel sinak in a rak chuak zau. Biaknak rianṭuantu a simi hlan deuh a hawinu le midang hna cu Jehovah Hngaltu hna he Baibal cawn hram kha an rak i thawk.
20. Ghana hmuhtonnak nih Baibal ṭhawnnak kha zeitindah a langhter?
20 Ghana khua i Paulina timi nu pakhat sining zong nih Baibal ṭhawnnak kha a rak langhter. Caan-tling Pennak thawngthanhtu pakhat cu Zungzal Nunnak ah a hruaimi Hngalhnaka cauk in Paulina he Baibal an rak cawng. Paulina cu innchung tampi a ngeimi pa he aa ṭhiummi a si i, i thlen a herh ti kha a hun hngalh, asinain a va le a rualchan vialte nih fak ngaiin an rak doh. Biaceihnak zung sang ah biaceihtu a simi, a pu nih Matthai 19:4-6 kha a ping in hman in hlemh aa rak i zuam. Biaceihtu chimmi cu a si hrimhrimmi si dawhngai a lo, sihmanhsehlaw Satan nih Jesuh a rak tukforh lioah Baibal a rak merh bantuk a si kha Paulina nih a hun hngalh colh. (Matthai 4:5-7) Pathian nih pa le nu hna si loin, pa le nu a rak ser hna i, pathum si loin cu pahnih hna cu pumkhat ah an hung cang timi ṭhitumnak kong i Jesuh fianternak kha a hun hngalh ṭhan. A biakhiahnak kha zulh i, a donghnak ah, nupi tampi a ngeimi a va he phunglam ning in an i ṭhen. Amah cu aa lawmmi, tipil a ing cangmi, Pennak thawngthanhtu pakhat a hung si zau.
Baibal Kha Hmaante In Hmang
21, 22. (a) Pennak thawnthanhtu hna in zei biakhiahnak dah tuah kan duh? (b) A hun changtu capar nih zei dah a kan ruah lai?
21 Jehovah he an i naih nakhnga an nunning thlenkhawh awk midang kan bawmh tik hna ah Baibal cu ṭhawnnak a ngei taktakmi hriamnam pakhat a si. (Jeim 4:8) Zungthiammi rianṭuantu hna nih an rian hlawhtlinnak ding ah hriamnam an hman bantuk in, Pennak thawngthanhtu kan nih zong Pathian pekmi rian ah A Bia, Baibal kha thiam ngai in hman awk biakhiaknak tuah hna u sih.
22 Zultu siternak rian ah hmual ngei deuh in Baibal kha zeitindah kan hman lai? Lamkhat cu fianglak in mi a chimthiammi kan sinak hnga kan thiamnak ṭhanternak a si. Zangfahnak in, a hun changtu article kha na lungthin pe in zoh, cuka ah cun mi nih Pathian Pennak thawngṭha an cohlan khawh nakhnga bawmhning le cawnpiak ning hna kha lam phunphun in ruahnak cheuhnak a um.
[A Tanglei Fianternak]
a Jehovah Hngaltu hna nih an rak chuah.
Naa Cinken Maw?
• Pennak thawngthanhtu hna nih zei hriamnam hna dah hman khawh a si?
• Zeibantuk lam hna in dah Pawl cu zohchunh awk tlak Pennak rianṭuantu pakhat a rak si?
• Baibal hmaante in hmannak ah zei dah aa tel?
• Jehovah ṭialmi bia cu zeitluk ṭhawngmi hriamnam dah a si?
[Cahmai 15nak i Hmanthlak]