Pennak Hmu Ding Tlak Tiah Ti An Si

“Hi nih hin Pathian biakhiahnak a dinning cu a langhter. Sifahnak nan in hnawhchanmi Pathian Pennak he khan aa tlakmi an siter hna lai.”—2 Thes. 1:5.

1, 2. Biaceihnak he aa tlaiin Pathian tinhnak cu zeidah a si, aho nih dah bia a ceih lai?

A.D. 50 hrawngah lamkaltu Paul cu Athens khua a phan. Cuka ah siasal biaknak in a khatmi a hmuh tikah a awlok a chong i hmual ngei ngai in phung a chimh hna. Siasal a biami hna an lungthin a la khomi hi bia hin a phungchimnak kha a donghter: “Atu cu khuazeika i a ummi mi-​nung hmanh, nan nuncan ṭhalo kha mertak cang hna u, tiah [Pathian nih] a ti hna. Zeicahtiah a thimmipa thawngin vawlei cung dihlak hi dinnak in biaceih awkah ni a khiah cang. Cucu a si ṭheo lai ti kha mi vialte sin i langhternak caah cu mipa cu thihnak in a thawhter.”—Lam. 17:30, 31.

² Pathian nih minung bia a ceih hna lai ni a khiah cang timi kha biapi in ruah le tuak ding a si! Athens khua i phung a chim lioah bia a ceihtu ding min kha Paul nih a chim lo nain cu pa cu a thoṭhanmi Jesuh Khrih a si kha kan hngalh. Jesuh biaceihnak nih nunnak asiloah thihnak a chuahter khawh.

3. Jehovah nih Abraham he zeicah biakamnak a tuah, cu biakam tlinnak ah ahodah biapi bik in aa tel?

³ Mah Biaceih Ni cu kum 1,000 a rau lai. Jesuh cu kum thongkhat chung Pathian Pennak ah Siangpahrang a ṭuan lai i Jehovah min in a uk lai, asinain amah lawng uktu a si lai lo. Amah he uktu le biaceihtu ṭuan awkah minung chungin a thim hna. ( Luka 22:29, 30 he tahchunh.) A luancia kum 4,000 hrawng ah Jehovah nih zumhawktlak a sal Abraham he biakamnak a tuahnak in mah Biaceih Ni caah hram a rak thlak. (Genesis 22:17, 18 rel.) Cu biakamnak cu B.C. 1943 ah fehter a si. Minung caah zeitluk in dah sullam a ngeih kha Abraham nih ṭha tein a rak hngal lo. Asinain minung biaceihnak kong i Pathian tinhmi tlinnak ah Abraham tefa biapi bik in aa tel kha atu ah kan hmuh khawh.

4, 5. (a) Abraham tefa chung in biapi bik cu ahodah a si, Pennak he aa tlaiin zeidah a rak chim? (b) Pennak chungah aa telmi si ruahchannak kha zeitik ah dah an hmuh?

⁴ Abraham tefa chung in biapi bik cu Jesuh a si. A.D. 29 ah thiang thlarau in chiti thuh a si i biakammi Messiah asiloah Khrih a hung si. (Gal. 3:16) Cu hnu ah Jesuh nih Judah mi hna kha Pennak thawng ṭha kum thum le cheu a rak chimh hna. Midang zong Pennak chung telmi an si kho ti kha tipil petu Johan an tlaih hnu ah hitin a rak chim: “Johan nih a rat ri in nihin ni tiang vancung Pennak hi tonghmang loin tuknak a ing i tonghmang loin khua a sami hna nih cun lak an timh.”—Matt. 11:12.

⁵ Hngalh duh awk cu vancung Pennak ‘lak aa timmi’ hna kong a chim hlan ah Jesuh nih hitin a chim: “Nu chungin a chuakmi lakah vawlei cungah hin Johan tlukin a nganmi aho-​hmanh an um lo; sihmanhsehlaw Vancung Pennak chung i a ummi hna lak i a hme bik hmanh Johan nakin a ngan deuh.” (Matt. 11:11) Zeicah cutin a si? Zeicahtiah A.D. 33 Pentekos ni i thiang thlarau toih an si hlan tiang cu zumhawktlakmi hna cu Pennak chung telmi si awk ruahchannak an ngei rih lo. Cu caan ah tipil petu Johan cu a rak thi cang.—Lam. 2:1-4.

Abraham Tefa Cu Miding Tiah Thanh An Si

6, 7. (a) Abraham tefa cu zeitindah “van i arfi” bantuk an si? (b) Zei thluachuah dah Abraham nih a rak hmuh, a tefa zong nih aa lomi zei thluachuah dah a hmuh ve?

⁶ Na tefa cu an karh lai i “van i arfi zat” le rili kam i thetse zat an si lai tiah Pathian nih Abraham kha a ti. (Gen. 13:16; 22:17) Curuangah tefa ah zeizat dah an i tel lai kha Abraham chan i a nungmi nih an hngal kho lo. Asinain tefa ah zeizat set dah an i tel lai kha Pathian nih a rak phuan. Annih cu Jesuh tel loin 144,000 an si.—Biat. 7:4; 14:1.

⁷ Abraham ngeihmi zumhnak kong ah Baibal nih hitin a chim: “[Abraham] nih Pathian a zumh i cu a zumhnak ruangah cun Pathian nih miding ah a cohlan.” (Gal. 3:6) A ding dih hirhiarmi minung ahohmanh an um lo ti cu a hmaan ko. (Jeim 3:2) Asinain Jehovah nih Abraham kha aa thleidangmi a zumh-​nak ruangah miding in a cohlan i ka hawi ti hmanh in a auh. (Isa. 41:8) Jesuh Khrih he Abraham tefa chung telmi hna cu mi-​ding in thanh an si i cu nih cun Abraham hmuhmi thluachuah nakin a ngan deuhmi thluachuah kha a pek hna lai.

8. Abraham tefa chung telmi caah zei thluachuah dah a um?

⁸ Chiti thuhmi Khrihfa hna cu Jesuh tlanhnak man an zumh kha an langhter caah miding tiah thanh an si. (Rom 3:24, 28) Jehovah hmuhnak ah, annih cu an thiang i Pathian thlarau fale le Jesuh Khrih naule in thiang thlarau in chiti thuh khawh an si. (Johan 1:12, 13) Annih cu biakam thar chungah an lut i ‘Pathian Israel’ timi miphun thar an hung si. (Gal. 6:16, Nw; Luka 22:20) Cu vialte cu a ṭha ngaingaimi tinvo a si! Pathian pekmi cu tinvo sung ruangah chiti thuhmi Khrihfa hna cu vawlei cungah zungzal nun ding an i ruahchan lo. Biaceih Ni chungah Jesuh he an um ṭinak le vancung ah amah he uktu an ṭuan ṭi caah lunglawmhnak in an khat i vawlei cungah nun ding tinvo kha an hlawt.—Rom 8:17 rel.

9, 10. (a) Khrihfa hna cu zei caan thawk in dah thiang thlarau in hmasa bik chiti thuh an si? (b) Chiti thuhmi Khrihfa hna nih zei bawmhnak dah an hmuh?

⁹ A.D. 33 Pentekos ni ah zumhawktlakmi mibu bu khat cu Biaceih Ni ah Jesuh he uktu ṭuan ṭi ding tinvo an hmu. Jesuh zultu 120 hrawng cu thiang thlarau in tipil an rak ing i hmasa bik chiti thuhmi Khrihfa an si. Asinain cucu an caah a hram thawk lawng a si. Cu caan thawk in Satan nih a chuahtermi hneksaknak vialte lakah Jehovah cungah zumhawktlakmi an si kha an langhter. Vancung nunnak siangpahrang luchin hmuh awkah an thih tiang zumhawktlak in an um lai.—Biat. 2:10.

¹⁰ Cucaah Jehovah nih a Bia le a Khrihfabu hmangin chiti thuhmi hna herhmi thapeknak kha a rak pek hna. Tahchunhnak ah lamkaltu Paul nih Thesalon khua i chiti thuhmi Khrihfa hna sinah hitin ca a ṭial: “Pa nih a fale a ti hna bantukin kan in ti hna kha nan hngalh. Thazang kan in pek hna, hnangamnak kan in pek hna, a Pennak le a sunparnak i hrawm ding ah an autu hna Pathian duh ningin nan nun khawh nak-​hnga kan in forh lengmang hna.”—1 Thes. 2:11, 12.

11. Jehovah nih ‘Pathian Israel’ chung telmi kha zei ṭialmi dah a rak pek hna?

¹¹ Chiti thuhmi Khrihfabu chung tel pawl hmasa bik thim an si hnu, kum sawmbu tampi chungah Jehovah nih Jesuh vawlei cung a phungchimnak, kum zabu pakhatnak i chiti thuhmi Khrihfa pawl he aa pehtlaih ning le a cawnpiaknak hna kha ṭial ah a ṭha lai tiah a rak ruah. Cucaah Jehovah nih a um ciami Hebru Baibal ah Khrihfa Grik Baibal kha a rak better hna. Hebru Baibal cu Pathian le pumsa Israel miphun pehtlaihnak ṭha an rak ngeih lio ah a bik in an caah rak ṭialmi a si. Khrihfa Grik Baibal cu Khrih naule le Pa-​thian thlarau fale in chiti thuhmi ‘Pathian Israel’ caah a bik in ṭialmi a si. Israel miphun a si lomi miphun dang hna cu Hebru Baibal in ṭhatnak an hmu kho. Cu bantuk cun, thiang thlarau in chiti thuh a si lomi Khrihfa hna zong Khrihfa Grik Baibal kha hlathlai in cu chung i cawnpiaknak ningin nunnak thawngin ṭhatnak tampi an hmu.—2 Timote 3:15-17 rel.

12. Paul nih Chiti thuhmi Khrihfa hna kha zeitindah ralrin a pek hna?

¹² Kum zabu pakhatnak Khrihfa hna cu vancung ro an co khawh nakhnga miding tiah thanh an si i thiang thlarau in chiti thuh an si. Cuticun chiti thuh an simi nih vawlei cung an um lio i chiti thuhmi an hawile dang cungah siangpahrang ah a ser hna lo. Hmasa Khrihfa cheukhat nih mah kha an philh i Khrihfabu i unau hna lakah langh an rak i zuam. Cucaah Paul nih hitin a ti hna: “Nan herhmi paohpaoh cu nan ngeih dih ko cang. Nannih cu nan lian in nan rum ko cang. Nannih cu siangpahrang nan si cang, kannih bel kan si lo. Siangpahrang hei si taktak u law ka hei duh dah, kannih zong nan sinah siangpahrang kan si ve hnga.” (1 Kor. 4:8) Paul nih a chankhat chiti thuhmi pawl kha hitin a ti hna: “Cucu nan zumh awk, khakha nan zumh awk ti kha ca auh bantukin in auh duahmah hna kha ka duh lo, . . . Kannih nih tuah kan duhmi cu nanmah lawmhnak tu kha a si deuh.”—2 Kor. 1:24.

Chim Chungmi Nambar Tlinnak

13. A.D. 33 hnu ah chiti thuhmi hna cu zeitindah thim an si peng?

¹³ Chiti thuhmi Khrihfa 144,000 hi kum zabu pakhatnak ah thim dih an si lo. Lamkaltu pawl chan ah thim an si nain a hnu ah thimmi an hung tlawm. Asinain kum zabu tampi chung, atu tiang thim an si peng. (Matt. 28:20) 1914 ah Jesuh siangpahrang a si hnu ah thil umtuning cu khul rang in a ṭhangcho.

14, 15. Chiti thuhmi pawl thimnak he aa tlaiin kan caan ah zei thil dah a hung um?

¹⁴ Hmasa bik ah, Jesuh nih vancung uknak a ralchanmi hna kha vancung in a thianh hna. (Biathlam 12:10, 12 rel.) Cu hnuah 144,000 tlin awkah a taangmi Pennak cozah chung tel pawl pumhnak ah a lungthin a pek. 1935 hrawng ahcun cu nambar cu a tling deng i phungchimnak rian a ṭuanmi tampi cu vancung kai duhnak an ngei lo. Pathian fale nan si tiah thiang thlarau nih anmah he tehte a khang lo. (Rom 8:16 he tahchunh.) Vawlei paradis ah zungzal nun ding ruahchannak a ngeimi “tuudang” kan si tiah an cohlan. (Johan 10:16) Cucaah 1935 hnu ah phung-​chimnak rian nih “mibu nganpi” pumhnak kha a bik in a lungthin a pek. Annih cu lamkaltu Johan nih langhnak ah a hmuhmi [“harnak nganpi,” Nw] in a luat dingmi an si.—Biat. 7:9, 10, 14.

¹⁵ 1930 hnu kum hna in kum tampi chungah cheukhat cu vancung ruahchannak ngei dingin thim an si. Zeiruangah? Hlan ah rak thimmi cheukhat cu zumhawktlak loin an um caah airawlh awkah a si kho. (Biathlam 3:16 he tahchunh.) Paul nih biatak a kaltakmi a theihhngalhmi hna kong hmanh kha a rak chim. (Fil. 3:17-19) Airawlh awkah Jehovah nih ahotedah a thim hna lai? Cucu Pathian nawl a si. Asinain zumtu thar pawl kha si loin Philhlo-​nak hmasa bik tuah lio ah Jesuh nih bia a chimhmi hna lamkaltu pawl bantukin zumhawktlak an sinak zei maw zat tiang a langhter cangmi lawng Pathian nih a thimmi hna lai tiah ruah khawh a si.a—Luka 22:28.

16. Chiti thuhmi hna he aa tlaiin zei kong ah dah kan i lawmh, zeidah kan zumh khawh?

¹⁶ Asinain 1930 hnu kum hna thawkin thimmi dihlak cu zumhawktlak lo a simi hna ai-​rawl awk si dawh an si lo. Hi chan ṭhalo i hmanung bik ni hna le “a Liannganmi Babilon” hrawh a si tiang chiti thuhmi Khrihfa hna cu kanmah he um ṭi awkah Jehovah nih ṭha tein a timhlamh hna ti cu a fiang.b (Biat. 17:5) Jehovah khiahmi caan ah 144,000 nambar cu an tling lai i hmanung bik ah an zapi in Pennak ah uktu an ṭuan lai ti cu zumh khawh a si. Cun a karh thluahmahmi mibu nganpi cu a bu in zumhawktlak an si an langhter peng lai timi chimchung bia zong kan zumh khawh. A rauh hlan ah annih cu Satan vawlei cungah a tlung dingmi “harnak nganpi” chung in an luat lai i Pathian vawlei thar ah lunglawm tein an kal lai.

Pathian Vancung Cozah Chung Telmi An Tling Deng Cang!

17. 1 Thesalon 4:15-17 le Biathlam 6:9-11 chim ning ah zumhawktlak in a rak thimi chiti thuhmi Khrihfa hna cu zeidah an hmuh cang?

¹⁷ A.D. 33 thawk in chiti thuhmi Khrihfa thong tampi cu zumhnak fek an ngeih kha an langhter i an thih tiang zumhawktlak tein an um. Annih cu Pennak a co ding tlak tiah ti an si cang i Khrih a phanh ni tlawmpal ah vancung laksawng a phunphun kha an hmu cang.—1 Thesalon 4:15-17; Biathlam 6:9-11 rel.

18. (a) Vawlei cungah a tang rihmi chiti thuhmi hna nih zeidah an zumh? (b) Tuu dang pawl nih chiti thuhmi Khrihfa hna kha zeitindah an hmuh hna?

¹⁸ Vawlei cungah a taang rihmi chiti thuhmi hna nih zumhawktlak an si peng ahcun a rauh hlan ah laksawng pek an si lai kha tling tein an zumh. A nuai in a simi tuudang hna nih chiti thuhmi unau pawl zumhnak kong an ruah tikah Thesalon khua i chiti thuhmi hna sin lamkaltu Paul chimmi bia hi an hna a tla: “Pathian Khrihfabu hna sinah nanmah kong cu kan i porhlaw i hremnak le temhnak nan inmi vialte chungah felte in nan um i nan zumhnak a dorh lo caah kan in thangṭhat hna. Hi nih hin Pathian biakhiahnak a dinning cu a langhter. Sifahnak nan in hnawhchanmi Pathian Pennak he khan aa tlakmi an siter hna lai.” (2 Thes. 1:3-5) Vawlei cung ah hma nung bik a taangmi chiti thuhmi a thih tikah Pathian vancung cozah chung telmi pawl cu an tling lai. Van le vawlei ah zeitluk in dah lawmhnak a khah lai!

Na Fianter Kho Maw?

• Biaceih Ni he aa tlaiin Pathian nih Abraham kha zeidah a chimh?

• Abraham cu miding tiah zeicah thanh a si?

• Abraham tefa hna cu miding tiah thanh an sinak nih zeidah a hmuhter hna?

• Khrihfa vialte nih zeidah an zumh?

A Tanglei Fianternak]

[Cahmai 20nak i hmanthlak]

Jesuh nih a zultu pawl Pathian Pennak luh awkah tha a pek hna

[Cahmai 21nak i hmanthlak]

A.D. 33 Pentekos ni ah Jehovah nih Abraham tefa a thim hna

[Cahmai 23nak i hmanthlak]

Ni hmanung bik caan ah chiti thuhmi Khrihfa hna an sin ah an um caah tuudang an i lawm.