Jesuh Chimmi Bia Cu Na Thlacamnak Ah Huham A Ngei Maw?
“Jesuh nih hi bia vialte cu a chimh dih hna tikah mizapi cu a cawnpiak hna ning ah khan an khuaruah a har ko.”—Matt. 7:28.
1, 2. Jesuh a cawnpiak hna ning ah khan mizapi cu zeicah an khuaruah a har?
Pathian Fapa ngeihchunte, Jesuh Khrih chimmi bia kha cohlang in kan nunnak ah hman awk a si. Amah bantuk in midang ahohmanh nih an chim kho lo. Cucaah Tlang Cung Cawnpiaknak i a cawnpiak hna ning ah mi cu an khuaruah a har ngai!—Matthai 7:28, 29 rel.
2 Jehovah Fapa nih phungbia cawnpiaktu hna bantuk in a cawnpiak hna lo, annih cawnpiaknak cu mitlinglo minung cawngpiakmi hrambunh in a si. Khrih cawnpiaknak cu Pathian sinin a rami a si caah “hmual ngei ngai in” a cawnpiak hna. (Johan 12:50) Kan thlacamnak ah Tlang Cung Cawnpiaknak i Jesuh chimmi bia huham a ngeih khawh ning le a ngeih awk a si ning kha zoh u sih.
Mi Depde pawl bantukin Thlacam Hlah U
3. Matthai 6:5 ah Jesuh chimmi bia kha a tawinak in chim ṭhan.
3 Thlacamnak hi a hmaanmi biaknak ah aa telmi a si caah a biapi i Jehovah sinah hmaan tein thlacam awk a si. Asinain Tlang Cung Cawnpiaknak ah Jesuh chimmi bia cu kan thlacamnak ah huham a ngeih awk a si. Hitin a chim: “Thla nan cam tikah mi depde pawl nih an cam bantukin va cam hlah u. Annih nih cun, mi nih kan hmu hna seh tiin pumhnak inn chung i dir riangmang i cam le zatlang lam tonnak i cam kha an duh. Hihi philh hlah u! Annih cu an laksawng kha tling tein an hmu cang.”—Matt. 6:5.
4-6. (a) Farasi mi nih “pumhnak inn chung i dir riangmang i cam le zatlang lam tonnak i cam” kha zeicah an duh? (b) Mi depde pawl nih zeitindah ‘laksawng kha tling tein an hmuh cang’?
4 Jesuh a zultu pawl cu thlacam tikah miding ah aa hmumi Farasi mi “mi depde pawl” nawl i cawn a hau lo, annih cu mihmai ah Pathian a ṭanh ngaimi an i lawhter. (Matt. 23:13-32) Mi depde pawl cu “pumhnak inn chung i dir riangmang i cam le zatlang lam tonnak i cam kha an duh.” Zeiruangah? “Mi nih kan hmu hna seh” ti an duh. Kum zabu pakhatnak ah Judah mi biakinn ah khangh thawinak an pek caan cu (zinglei suimilam pakua hrawng le zanlei suimilam pathum hrawng ah a si i) an bupi in thlacam phung an ngei. Jerusalem khua mi hna cu biakinn tual chungah Pathian a biami mibu he thla an cam ṭi lai. Khua leng ah a ummi Judah mi hna cu an i “pumhnak inn chung” ah nikhat ah voi hnih thla an cam tawn.—Luka 18:11, 13 he tahchunh.
5 Mi tam deuh cu zinglei le zanlei thlacam awkah biakinn asiloah pumhnak inn he aa hlat caah mah caan a phanh tikah an umnak hmun in thla an cam men lai. Acheu cu thlacam caan a phanh tikah “zatlang lam tonnak” ah a va um hrammi an lo. Lam tonnak ah aa chawkmi nih “kan hmu hna seh” ti an duh. Mi depde pawl nih cun mi nih kan thangṭhat hna seh ti duh ah “thla sau pipi in an cam.” (Luka 20:47) Mah bantuk lungput cu kan ngeih awk a si lo.
6 Mah mi depde pawl cu “an laksawng kha tling tein an hmu cang” tiah Jesuh nih a ti. Mi nih theihhngalh le thangṭhat kha an duh caah—mah kha an hmuh lai. Jehovah nih mi depde pawl an thlacamnak a ngaih lo caah mah kha an hmuh awk cu a si lai. Khatlei in cun Pathian nih Khrih hnu a zulmi hna thlacamnak lawng a leh lai kha Jesuh chimmi bia nih a langhter.
7. “Innka vaa khar khumh u” timi thlacam cawnpiaknak cu a sullam zeidah a si?
7 “Nannih cu thla nan cam tikah, nan inn khaan chungah va lut u law, innka vaa khar khumh u law, cuticun hmuh khawh lomi nan Pa sinah khan va cam u. Cun a thli tein nan tuahmi a hmutu nan Pa nih khan laksawng an pek hna lai.” (Matt. 6:6) Jesuh nih innka vaa khar khumh u a ti tikah pumhnak inn ah mi pakhat nih zapi aiawh in thlacam ding a si lo a ti duhnak a si lo. Hi cawnpiaknak cu mizapi hmai thlacam tikah thlacamtu pa kha mi nih lungthin pek le thangṭhat hmuh duh ah cammi phun a si lo nakhnga kha a si. Pathian mi hna ca aiawh in zapi hmai thlacamnak tinvo hmuh tikah khakha philhlo awk a si. Thlacamnak kongah Jesuh ralrin pekmi a dang zong hrial hna u sih.
8. Matthew 6:7 i zei aa tlaklomi thlacamnak dah kan hrial awk a si?
8 “Thla nan cam tikah, [‘miphun dang hna nih bia aa khatmi an nolh ṭhan lengmang,’ Nw] bantukin va hmang ve hlah u, annih nih cun kan thlacam a sau ruangah hin Pathian nih a kan theihpiak deuh lai, tiah an ruah.” (Matt. 6:7) Jesuh nih aa tlaklomi thlacam ning a dang phun khat a chim—cucu nolh ṭhan lengmang kha a si. Thlacam tikah lungthin takte in nawlnak le lunglawmhnak bia zeitikhmanh ah nolh ṭhan lo ding a si a ti duhnak a si lo. Jesuh a thih lai zan Gethsemane dum i thla a cam tikah [‘hmasa a cam bantuk in,’ Nw] a cam ṭhan.—Mar. 14:32-39.
9, 10. Zei bantuk phun in dah thlacamnak kha nolh ṭhan lengmang lo awk a si?
9 ‘Miphun dang’ hna thlacam an nolh ṭhan lengmangmi i cawn cu a palh lai. A herhlomi bia tampi aa telmi an i baihaatmi kha an ‘nolh ṭhan lengmang.’ Baal a biami hna cu “maw Baal kan let tuah” tiah “zingka in chun tiang an au” nain san a tlai lo. (1 Si. 18:26) Tuchan mi nuai tampi cu a herhlomi bia tampi aa telmi, nolh ṭhan lengmang in thla an cam i “a kan theihpiak deuh lai” tiah a ping in an ruah sual. Asinain Jesuh nih “a sau” i nolh ṭhan lengmangmi thlacamnak cu Jehovah lei in zoh ahcun man ngeilo a si kha hngalh awk a kan bawmh. Jesuh nih hitin a chim ṭhan:
10 “Annih bantuk cun va tuah hlah u, zeicahtiah nan Pa nih cun nan hal hlan in nan herhmi cu a hngalh cia ko.” (Matt. 6:8) Judah biaknak hruaitu tampi cu thla an cam tikah bia a tam tuk luakchuak an chimnak thawng in miphun dang hna he an i lo. Thangṭhatnak, lunglawmhnak le nawlnak hna aa telmi lungtak in thlacamnak cu a hmaanmi biaknak ah a biapimi pakhat a si. (Fil. 4:6) Asinain kan herhmi thil kha Pathian sinah nolh ṭhan lengmang a hau ti phun in a kong pakhat kha nolh lengmang cu a palh lai. Thla kan cam tikah ‘kan hal hlan in kan herhmi a hngal ciatu’ sin thla kan cam kha i cinken zungzal awk a si.
11. Mizapi hmai thlacamnak tinvo hmuh tikah zeidah i cinken awk a si?
11 Cohlan lomi thlacamnak kong Jesuh chimmi ah bia thukthuk le bia hleihluat kha Pathian nih a duhlo kan hngalh awk a si. Mizapi hmai thlacamnak kha a ngaimi hna an lunghmuih awk i zuamnak caan ṭha asiloah thlacam a sau caah a ngaimi hna nih thlacam ngai lo in zeitikdah a dih lai ti an ruah tiang a si nakhngalo zong i cinken awk a si. Thawngthanhnak phun le mizapi cawnpiak chimhhrinh phun thlacam zong Tlang Cung Cawnpiaknak Jesuh chimmi bia he aa tlak lai lo.
Jesuh nih Zetindah Thlacam ding A Kan Cawnpiak
12. “Na min thiang cu upat si ko seh” ti thlacam a biapitnak kha zeitindah na fianter lai?
12 Jesuh nih thlacamnak caan ṭha kha ningcang loin hmanlo ding rilrin a pek hna hnuah a zultu pawl kha zeitindah thlacam ding a si kha a cawnpiak hna. (Matthai 6:9-13 rel.) Zohchunhawk thlacamnak kha nolh ṭhan lengmang awkah zohlo in chim khawh i zuam awk a si lo. Kanmah pumpak thlacamnak caah zohchunhawk in chiahmi a si. Tahchunhnak ah, Jesuh nih bia hramthawknak ah Pathian kong kha hitin a chim: “Vancung khua i a um kan Pa, Na min thiang cu upat si ko seh.” (Matt. 6:9) Vawlei in a hlat tukmi “vancung khua” i a ummi Jehovah cu a kan Sertu a si caah “kan Pa” tiah tlak ngai in kan auh. (Deut. 32:6; 2 Chan. 6:21; Lam. 17:24, 28) “Kan” timi pakhat nak tam biafang a hman caah zumtu hawi pawl zong Pathian he pehtlaihnak ṭha an ngeih kha philh awk a si lo. “Na min thiang cu upat si ko seh” timi cu Eden ah ralchanhnak a chuah thawk in amin a phunphun in thangchiat a si kha Jehovah thengte nih thianter awk kan nawl a si. Jehovah nih vawleicung ṭhatlonak vialte a hrawh lai i amah thengte nih a thianternak thawng in mah thlacamnak kha a leh lai.—Ezek. 36:23.
13. (a) “Na Pennak cu rung tlung ko seh” ti halnak cu zeitindah a tlin lai? (b) Vawlei cungah Pathian duhnak tlinnak ah zeidah aa tel.
13 “Na Pennak cu rung tlung ko seh, vancung khua ah na duhnak an tuah bangin vawlei cungah hin tuah si ve ko seh.” (Matt. 6:10) Zohchunhawk thlacamnak ah aa telmi ‘Pathian Pennak’ timi cu Khrih le a hawile thihnak in a thoṭhanmi “mithiang hna” kut chung ah a ummi vancung Messiah uknak a si kha kan hngalh peng awk a si. (Dan. 7:13, 14, 18; Isa. 9:6, 7) Pathian Pennak “tlung” ko seh ti thlacamnak cu vawleicung i Pathian uknak a ralchanhmi vialte hrawh awkah kan cammi a si. A rauh hlan ah a hung um cang lai i dinnak, daihnak le hlawhtlinnak in a khatmi vawlei paradis ah ser a si lai. (Salm 72:1-15; Dan. 2:44; 2 Pit. 3:13) Vancung khua ah na duhnak an tuah bangin vawlei cungah hin tuah si ve ko seh ti thlacamnak cu hlan lio chan bantuk in Pathian a ralchanhmi hrawh awk le kan vawlei kong i Pathian tinhmi a tlin nakhnga kan nawl a si.—Salm 83:1, 2, 13-18 rel.
14. “Nifate kan herhmi rawl” kan pe ti hal cu zeicah aa tlak?
14 “Nifate kan herhmi rawl cu nihin zongah hin kan pe tuah.” (Matt. 6:11; Luka 11:3) Thlacamnak ah hi kong cam chih tikah “nifate kan herhmi rawl” kan pe tiah Pathian sin kan hal a si. Cucu Jehovah nih nifate kan herhmi rawl a kan pek khawh kan zumh langhternak a si. A hlei a hluat in rawl kan pe tiah kan halmi a si lo. Nifate kan herhmi rawl kan hal tikah Israel mi kha Manna cu “nifate in nan chuah hnawh lai i cu ni ca i aa zaa ding in nan char lai” timi Pathian nawlbia a kan hngalhter lai.
15. “Mi nih kan cungah ṭhatlonak an tuahmi kan ngaihthiam hna bangin kan ṭhatlonak cu kan ngaithiam ve ko” ti hal cu a sullam zeidah a si fianter.
15 Zohchunhawk thlacamnak ah kan hun hal chapmi nih tuah a herhmi kha lungthin a kan pekter. Jesuh nih hitin a chim: “Mi nih kan cungah ṭhatlonak an tuahmi kan ngaihthiam hna bangin kan ṭhatlonak cu kan ngaithiam ve ko.” (Matt. 6:12) Kan cungah ṭhatlonak a tuahmi kan “ngaihthiam” lawngah Jehovah ngaihthiamnak kan i ruahchan khawh. (Matthai 6:14, 15 rel.) Mi kha lungtak in kan ngaihthiam hna awk a si.—Efe. 4:32; Kol. 3:13.
16. Tukforhnak le mi ṭhalopa sin khan him tein kan umter ti halnak cu zeitindah lungfian awk a si?
16 “A harmi [“tukforhnak,” Nw] chungah kan phakter hlah, Mi ṭhalopa sin khan him tein kan umter tuah.” (Matt. 6:13) Jesuh zohchunhawk thlacamnak ah aa telmi mah pahnih aa sengtlaihnak kha zeitindah lungfian awk a si? Pakhatnak cu hitin a si a fiang: Jehovah nih sualnak tuah awkah a kan tukforh lo. (Jeim 1:13 rel.) “Mi ṭhalopa” Satan cu [“tukforhtu,” Nw] a si taktak. (Matt. 4:3) Asinain Pathian tuahmi he aa tlai in Baibal nih a chimmi cu umnak nawl a pek lawng a si. (Ruth 1:20, 21; Pct. 11:5) Cucaah “a harmi tukforhnak chungah kan phakter hlah” ti nawlnak cu Jehovah nawl ngaih lo ding lem kan si tikah i teiternak nawl kan pe hlah ti kan nawl a si. A donghnak ah, “mi ṭhalopa sin khan him tein kan umter” ti nawlnak cu Satan nih a kan tei khawh tiang Jehovah nawlpe hlah ti kan hal a si. Cun Pathian nih ‘kan in khawh leng tiang in tukforhnak cu kan cungah a tlunter lai lo’ kha kan zumh khawh.—1 Korin 10:13 rel.
‘Hal Peng, Kawl Peng, King Peng U’
17, 18. ‘Hal peng, kawl peng, kingh peng’ ti cu a sullam zeidah a si?
17 Lamkaltu Paul nih zumtu hawi pawl kha “thlacam zungzal u” tiah a forh hna. (Rom 12:12) Mah he aa lomi kha Jesuh nih hitin a chim: ‘Hal peng u law an in pek hna lai, kawl peng u law nan hmuh lai, king peng u law innka cu an in hunpiak hna lai. Zeicahtiah a halmi paoh cu pek an si lai i a kawlmi paoh nih cun an hmuh lai i a kingtu paoh cu innka kha hunpiak an si lai.’ (Matt. 7:7, 8) Pathian duhning in zeipaoh ‘hal peng’ cu aa tlak ko. Lamkaltu Johan nih Jesuh chimmi bia kha i cinken in hitin a ṭial: “Amah duh ningin kan hal ahcun, kan halmi paoh kha a kan pek hrimhrim lai ti kan zumh caah Pathian cu ṭihnak zeihmanh um lo in kan fuh ngam.”—1 Johan 5:14.
18 Jesuh cawnpiakmi ‘kawl peng, kingh peng’ timi nih biatak te le lungdong loin hal awk a si kha a chim duhmi a si. Pennak chung luh khawh awkah mah thluachuah le ṭhathnemnak le laksawng pawl kha i nuamhpi awkah ‘kingh peng’ a herh. Asinain kan thlacamnak Pathian nih a ngaih lai tiah zumh khawh a si maw? A si, Jehovah cung zumhfek tein kan um ahcun Khrih nih a chim bantuk in “a halmi paoh cu pek an si lai i a kawlmi paoh nih cun an hmuh lai i a kingtu paoh cu innka kha hunpiak an si lai.” Jehovah salle hmuhtonnak tampi nih Pathian cu “thlacamnak a kan lettu” a si kha a langhter taktak.—Salm 65:1.
19, 20. Matthai 7:9-11 chung Jesuh chimmi bia ah Jehovah cu dawtnak in a khatmi pa pakhat he zeitindah an i lawh?
19 Jesuh nih Pathian cu a tefa caah thil ṭha a pemi dawtnak in a khatmi pa pakhat he a tahchunh. Tlang Cung Cawnpiaknak ah a um vemi le Jesuh chimmi hi bia a theimi ah hei i ruat hmanh: “Nan fale nih changreu an in hal hna tikah lung a pemi nan um hnga maw? Nga in hal hna seh law, rul nan pe hna hnga maw? Hi tlukin nan ṭhalo ko na hin, nanmah hmanh nih nan fale kha thil ṭha pek nan hngalh ahcun, vancung khua i a ummi nan Pa chinchin nih cun zeitluk in dah thil ṭha cu a halmi kha a pek chinchin hna lai!”—Matt. 7:9-11.
20 Minung pale cu sualnak rocomi an si caah a tam le a tlawm ‘mi ṭhalo’ an si ko nain an fale kha kokek tein an dawt hna. A fa kha a hleng lai lo i “thil ṭha” pek aa zuam lai. Dawtnak in a khatmi vancung kan Pa nih pale lungput he a thiang thlarau ti bantuk “thil ṭha” kha a kan pek. (Luka 11:13) Mah nih “laksawng ṭha le laksawng tlamtling paohpaoh” a kan petu Jehovah rian cohlan in ṭuan awkah thazang a kan pek.—Jeim 1:17.
Jesuh Chimmi bia in Ṭhathnemnak Hmu Peng
21, 22. Tlang Cung Cawnpiaknak ah zeidah cinken awk tlak a si, Jesuh chimmi bia ah zei kong nih dah na lung an suk?
21 Tlang Cung Cawnpiaknak hi vawleicung phungchimmi lak ah a ṭha bik a si. Pathian kong kha fawi tein hngalhthiam ding in a cawnpiak caah aa thleidang ngaimi a si. Hi aa pehtlaimi capar nih a biapimi kha a langhter i mah chung ah aa telmi cawnpiaknak kha kan nunnak ah kan hman ahcun tampi a kan ṭhathnem lai. Jesuh chimmi bia nih atu kan nunnak kha a ṭhanchoter khawh i a nuammi hmailei ruahchannak a kan ngeihter.
22 Jesuh Tlang Cung Cawnpiaknak ah aa telmi ah mansungmi tlawmte lawng hi capar ah kan i ruah. Jesuh chimhmi bia a theimi mizapi cu “a cawnpiak hna ning ah khan an khuaruah a har” cu khuaruahhar awk a si lo. (Matt. 7:28) A Liannganmi Saya Jesuh Khrih chimmi bia le a dang mansung a chimmi bia in kan lung kan khahter tikah kannih zong cu bantuk in kan leh ve lai cu zumh lo awk a um lo.
Zeitindah Na Leh Lai?
• Mi depde pawl thlacamnak kongah Jesuh nih zeidah a chim?
• Thlacam tikah nolh ṭhan lengmang kha zeicah hrial awk a si?
• Jesuh zohchunhawk thlacamnak ah zeidah aa tel?
• Zeitindah ‘hal peng, kawl peng, kingh peng’ khawh a si?
[Cahmai 15nak i hmanthlak]
Mizapi hmuhnak le theihnak ah thla a cammi mi depde pawl kha Jesuh nih sual a phawt hna
[Cahmai 17nak i hmanthlak]
Nifate kan herhmi rawl kan pe ti hal cu zeicah aa tlak na hngal maw?