Mino Pawl—Nan Nunnak Kha Zeitindah Nan Hman Lai?

“Kei cu . . . kaa thongh tikah a ping a pang a thongmi bantuk ka si lo.”—1 KOR. 9:26.

1, 2. Na hun ṭhan deuh tikah naa nuamh khawh nakhnga zeidah na ngeih a herh?

NA PHANH bal lonak hmun ah khualtlawn naa timh ahcun khuaram hmanthlak put na duh ko lai. Hmanthlak nih na phanhnak hmun le kal na duh-​nak lam hngalh awkah an bawmh khawh. Asinain khuazei ah dah ka kal lai timi tinhmi na ngeih lo ahcun khuaram hmanthlak cu san a tlai lai lo. Cucaah kalnak hmun tinhmi na ngeih a hau.

² Na hun ṭhan deuh tikah cu bantuk thil cu na tong ko lai. Na ngeihmi Baibal cu zei lam in kal ding lam an hmuhsaktu khuaram hmanthlak bantuk a si. (Ptb. 3:5, 6) Na chiaṭha thleidannak lungthin ṭha tein na cawnpiak ahcun lam hmaan kal peng awkah an bawmh lai. (Rom 2:15) Asinain na nun chung naa nuamh khawh nakhnga kalnak hmun tinhmi fiang tein na ngeih a hau.

3. 1 Korin 9:26 ah Paul nih tinhmi ngeih a ṭhat-​hnemnak kha zeitindah a chim?

³ Lamkaltu Paul nih tinhmi ngeih le tinhmi phanh i zuam a ṭhathnemnak kha hitin a ṭial: “Kei cu ka tlik tikah tinhmi kawltung fiang tein ka ngei; kaa thongh tikah a ping a pang a thongmi bantuk ka si lo.” (1 Kor. 9:26) Tinhmi kawltung na ngeih ahcun naa tinhmi lei ah na tli kho lai. A rauh hlan ah biaknak, rian, innchunghawi le chungkhar ti bantuk kongah a biapimi biakhiahnak na tuah a hau lai. Khuacaan ah i thim awk a harmi na tong men lai. Asinain pakhat hnu pakhat tuah ding tinhmi na ngeih i Baibal phunglam le biatak hrambunh in bia na khiah ahcun na biakhiahnak cu a palh lai lo.—2 Tim. 4:4, 5.

4, 5. (a) Tinhmi na ngeih lo ahcun zeidah na ton khawh? (b) Pathian lungton duhnak he zeicah bia-​khiah awk a si?

⁴ Tinhmi na ngeih lo ahcun na hawile le na sayate nih na caah a ṭha lai ti an ruahmi tuah an i hnek lai. Tinhmi fiang tein na ngeih hmanh ah a cheu nih ruahnak an i cheuh rih men lai. An chimmi na ngaih lioah hitin i hal, ‘An ka duhpiakmi kawltung nih ka no lioah a ka Sertu philh lo awk a ka bawm lai maw asiloah a ka philhter lai dah?’—Phung-​​chimtu 12:1 rel.

⁵ Pathian lungton duhnak he zeicah biakhiah peng awk a si? Zeicahtiah kan ngeihmi thil ṭha vialte hi Jehovah pekmi a si caah a si. (Jeim 1:17) Kan dihlak in Jehovah cungah kan i lawmh hrimhrim awk a si. (Biat. 4:11) Jehovah cung naa lawmhnak langhternak ah Jehovah kha ruat chih in tinhmi i thim cu a ṭha bik a si. Zeidah naa tinh awk a si i phanh khawh awkah zeidah tuah a herh kan i ruah lai.

Zeidah Naa Tinh awk a Si?

6. Zei kawltung dah na ngeih khawh, zeiruangah?

⁶ A hmasa capar ah kan hmuh bantuk in i tinh awk kawltung pakhat cu Baibal chimmi a hmaan fek tein na zumh nakhnga tuah a si. (Rom 12:2; 2 Kor. 13:5) Na hawile nih thlennawnnak asiloah a hmaan lomi biaknak zumhmi a phunphun kha an zumh. Zeicahtiah midang nih mah hi nan zumh awk a si tiah an ti hna caah a si men lai. Asinain midang nih zum seh ti an in duhmi ning in zumh colh awk a si lo. Jehovah nih na lungthin dihlak in a rian ṭuan seh ti an duh. (Matthai 22:36, 37 rel.) Vancung kan Pa nih na zumhnak kha a hmaan ti langhter khawhmi thil cungah hrambunh seh ti an duh.—Heb. 11:1.

7, 8. (a) Tuah a fawi deuhmi zei tinhnak hna nih dah na zumhnak a fehter khawh? (b) Naa tinhmi na tuah khawh tikah zeitindah na um lai?

⁷ Na zumhnak a feh nakhnga tuah a fawi deuhmi tinhmi ngei. Mah ah pakhat cu nifate thlacamnak a si. Nikhat chung na tonmi thil lakah thlacamnak i telh na duhmi tete kha i cinken asiloah i ṭial. Cuti tuahnak thawngin thla na cam tikah na bia na nolh ṭhan lengmang lai lo. Na tonmi harnak kong lawng si loin naa lawmhnak zong telh chih. (Fil. 4:6) A dang pakhat cu nifate Baibal relnak a si. Ni-​khat ah tlap li in na rel ahcun kum khat ah Baibal a dihlak in na rel khawh lai.a ‘Jehovah nawlbia chunzan in a rel i a ruatmi cu thluachuakmi’ an si tiah Salm 1:1, 2 nih a ti.

⁸ A dang pakhat cu pumhnak ah a phi pek ding i timhchungnak a si. Hmasa ahcun a phi pakhat asiloah Baibal cang pakhat na rel men lai. A hnu ah mahle bia tein a phi pek naa tim kho. A phi na pek fate Jehovah kha thangṭhat raithawinak na pek a si. (Heb. 13:15) Mah naa tinhmi tete na tuah khawh ahcun mahlemah zumhnak na ngei deuh lai. Cutikah Jehovah cungah tam deuh naa lawm lai i tuah a har deuhmi tinhmi na ngei kho lai.

9. Thawngthanhtu na si rih lo ahcun tuah a har deuhmi zei tinhnak dah na ngeih khawh?

⁹ Tuah a har deuhmi zei tinhnak dah na ngeih khawh? Mi hmai ah thawngṭha bia na chim rih lo a si ahcun Pennak thawngthanhtu si awk naa tinh khawh. Thawngthanhtu na si cang ahcun thla khat hmanh hrelh loin hmualngei tein phungchim na duh ko lai. Phungchimnak ah Baibal hman thiam zong na duh ko lai. Cuti na tuah ahcun phungchimnak ah naa nuam deuh lai. Innkhat hnu innkhat phungchimnak ah caan tam deuh na pek lai i Baibal cawnpiaknak ngeih hmanh na duh ko lai. Tipil a ing rih lomi thawngthanhtu na si ahcun Jehovah sin pumpeknak tuah le tipil in i zuam cu a ṭha bikmi tinhnak a si lo maw?

10, 11. Tipil a ing cangmi mino nih tuah a har deuhmi zei tinhnak dah ngeih khawh a si?

¹⁰ Tipil a ing cangmi Jehovah Tehte na si ahcun a tanglei hna hi tuah ding naa tinh khawh. A caancaan lawng ah phanh khawhnak hmun i phung a chimmi Khrihfabu kha na bawmh khawh hna. A ngan a dammi na si ahcun na thazang kha manhcaan hmaikal asiloah hmaanhmaan ṭuannak ah hman na duh ko lai. Lunglawm in hmaikal a ṭuanmi thong tampi nih caantling rianṭuan cu no lioah Sertu philhlo awk bawmtu a si tiah an in chimh ko lai. Mah rian tuah dingah inn chuahtak a hau lo. Mah tinhnak hna kha na tuah khawh ahcun nan Khrihfabu ca zong ah a ṭhahnem lai.

¹¹ Tuah a har deuhmi tinhmi dang na ngeihmi nih nan Khrihfabu lawng a ṭhathnem lai lo. Tahchunhnak ah, na umnak ram i a herh deuhnak hmun asiloah ramdang ṭhial ding naa tim kho. Hmun dang i Kingdom Hall asiloah zung ṭengnge innsaknak ah na bawmh khawh hna. Bethel asiloah missionary zong ṭuan khawh a si. Asinain mah rian ṭuan khawh awkah a herh bikmi cu tipil in a si. Tipil na in rih lo ahcun tipil in khawh awkah zeidah tuah a herh ti kha ruat.

Tipil In Khawh Awk Tinhnak

12. A cheu cu zei ruangah dah tipil an in, zeicah cu ruangah in awk a si lo?

¹² Tipil innak kha zeitindah na hmuh? A cheu nih sualnak tuah lo awk hupphengtu in an hmuh. A cheu cu an hawile tipil an in caah kan in ve awk a si tiah an ruah. Cheukhat cu nulepa lungton duh ah tipil an ing. Asinain tipil in timi cu a thli tein tuah na duhmi tuah lo awkah hupphengtu a si lo bantuk in midang hnek ruang zongah tuah dingmi a si lo. Jehovah Tehte pakhat sinak ah zei rian dah aa tel ṭha tein na hngalh i mah rian kha ṭuan duhnak na ngeih le timhcia na si lawng ah tipil na in awk a si.—Pct. 5:4, 5.

13. Zeiruangah tipil na in awk a si?

¹³ Tipil in awk a ruang pakhat cu Jesuh nih a zultu pawl kha mi kha “ka zultu ah va ser hna u; . . . tipilnak va pe hna u” tiah a fial hna caah a si. Amah theng tipil a ing i zohchunhawk ṭha a chiah. (Matthai 28:19, 20; Marka 1:9 rel.) Cu lengah tipil innak cu khamhnak hmuh a duhmi hna caah a biapimi kehlan a si. Buanchukcho in a luatmi Noah le a chungkhar nih tilawng an saknak kong a chim hnuah lamkaltu Piter nih hitin a chim: “Cucu atu i nanmah an khamhtu hna tipil innak a rak sawhtu hi a si. . . . Tipil innak nih cun Jesuh Khrih thihnak in a thawhṭhannak thawngin an khamh hna.” (1 Pit. 3:20, 21) Asinain khamhnak hmuh duh men ah tipil in ding a si a ti duhnak a si lo. Mah nakcha cun Jehovah na dawt ca le na lungthin, na nunnak, na ruahnak le na thazang dihlak in a rian ṭuan na duh ca tu ah tipil na in awk a si.—Mar. 12:29, 30.

14. Zeicah mi cheukhat nih tipil in an ṭih, asinain zeidah na zumh khawh?

¹⁴ A cheu cu a hnu ah bu chung in chuah lai an ṭih caah tipil in an duh lo. Nangtah na ṭih ma? Mah ṭih cu a palh lo. Jehovah Tehte pakhat nih ngeihmi rian ṭha tein na hngalh tinak a si. A ruang dang zong a um rih men lai. Pathian phunglam in nun hi nunnak ah a ṭha bik lam a si fiang tein na hngalh lo caah a si men lai. Cuti na si ahcun Baibal phunglam a zul lomi hna tonmi harnak na ruahnak nih tipil in ṭih lo awk an bawmh lai. Pathian phunglam cu na duh ko nain tling tein ka zul kho lai lo ti na ruah ca zongah a si kho men. Mah cu toidornak na ngeih a langhtermi a si caah a ṭhami a si. Baibal nih mitlinglo minung lungthin cu a zer tuk tiah a ti. (Jer. 17:9) Asinain Pathian bia na “ngaihnak thawngin” na hlawh a tling kho. (Salm 119:9 rel.) Tipil in na ṭihnak cu zei ruang a si hmanh ah mah kha tei khawh naa zuam a hau.

15, 16. Tipil in awkah timhcia na si le si lo zeitindah na hngalh khawh?

¹⁵ Tipil in awkah timhcia na si le si lo zeitindah na hngalh khawh? Lamkhat cu hitin bia naa halnak thawng in a si: ‘Mi sinah a hrampi Baibal cawnpiakmi ka chim kho maw? Phungchimnak ah ka nu le ka pa an kal lo caan ah ka kal maw? Pumhnak dihlak pumh khawh kaa zuam ma? Ṭhirual hneknak ka rak doh lio thil sining kaa cinkenmi pakhatkhat a um ma? Ka nu le ka pa le ka hawile nih Jehovah an biak ti lo hmanh ah ka bia peng lai ma? Thla ka cam tikah Jehovah he pehtlaihnak ṭha ngeih a biapitnak ka cam chih ma? Jehovah sinah thlacamnak in kaa pumpe cang ma?’

¹⁶ Tipil innak cu nunnak ah thlennak nganpi tuah a si caah sawhsawh in ruah awk a si lo. Tipil innak kong fakpi in khua a ruat khomi nutling/patling na si cang ma? Nutling/patling timi cu pulpit cungah ṭha tein phungchim khawh asiloah a phi ṭha tein pek khawh lawng a si lo. Baibal phunglam theihthiamnak cung hrambunh in biakhiahnak tuah khawh zong aa tel. (Hebru 5:14 rel.) Mah kha a tuah kho cangmi na si ahcun Jehovah rian lungthin dihlak in ṭuan awk tinvo na hmu lai i naa pumpekmi ning in na nung kho lai.

17. Tipil na in hnuah a chuak khomi hneksaknak tei awkah zeinihdah an bawmh lai?

¹⁷ Tipil na inka ahcun Pathian rian ṭuannak ah na lung a tho tuk ko lai. Asinain a rauh hlan ah na zumhnak le inkhawhnak ah hneksaknak na tong men lai. (2 Tim. 3:12) Mah hneksaknak kha nangmah lawng nih tawngtham hlah. Na nu le na pa ruahnak hal hna. Khrihfabu i thlaraulei a ṭhawngmi kha bawmhnak hal hna. An bawm khomi kha kom zungzal hna. Jehovah nih an zohkhenh le a chuak khomi zei harnak paoh tei khawh awkah a herhmi thazang an pek lai kha philh hlah.—1 Pit. 5:6, 7.

Naa Tinhmi Phanh Khawh Ning

18, 19. A hmasa na chiahmi thil ruahnak in zei ṭhatnak dah na hmuh khawh?

¹⁸ Na duhmi le na herhmi tuah awkah fakpi in naa zuam bu in a caan kaa za lo tiah na ruat ma? Cuti na ruah ahcun a hmasa na chiahmi thil kha ruat ṭhan. Tahchunhnak ah, balṭin pakhat chungah lung a nganmi a khat in sanh law cu hnuah thetse sanh ṭhan. Balṭin cu lung le thetse in a khat lai. Mah kha thle ṭhan law atu cu thetse sanh hmasa. Cu hnuah lung kha sanh. Asinain lung cu a dihlak in aa tlum ti lai lo. Zeicahtiah balṭin ah thetse na sanh hmasa caah a si.

¹⁹ A caan hmannak ah cu bantuk harnak na tong ve ko lai. Nuamhsaihnak kha a hmasa na chiah ahcun a biapi deuhmi thlaraulei thil caah a caan naa za bal lai lo. Asinain ‘a biapi deuhmi thil hngalh’ i zuam u timi Baibal forhfialnak na zulh ahcun Pathian rian ṭuannak ca le nuamhsaihnak cheukhat caah a caan na ngei lai.—Fil. 1:10, NW.

20. Naa tinhmi phanh naa zuam lioah lungretheihnak le i zumh lonak na ngeih ahcun zeidah na tuah khawh?

²⁰ Tipil in awk le a dang naa tinhmi phanh awk naa zuam lioah a caan ah lungretheihnak le i zumh lonak na ngei kho men. Cuti na si ahcun “na thilrit cu BAWIPA sinah ṭhum ta law amah nih an bawmh lai.” (Salm 55:22) A biapi bik rian a si zungzalmi vawlei pumpi phungchimnak le cawnpiaknak ah naa tel kho lai. (Lam. 1:8) Mah rian kha lungtho tein a ṭuantu asiloah ṭuan loin a zohtu si ding naa thim khawh. Pathian rian ṭuannak le a Pennak ṭhanchonak caah na thiamnak hman ding i cungcang hlah. “Nan tlanval lioah hin nanmah an sertu” rian na ṭuan caah zeitikhmanh ah naa ngaichih lai lo.—Pct. 12:1.

[A Tanglei Fianternak]

Zeitindah Na Leh Lai?

• Tinhmi zeicah na ngeih awk a si?

• Zeidah naa tinh awk a si?

• Tipil in khawh awkah zeidah a herh?

• Hmasa na chiahmi thil ruahnak nih naa tinhmi phanh awkah zeitindah an bawmh khawh?

[Cahmai 13 Hmanthlak]

Nifate Baibal rel ding tinhnak na ngei maw?

[Cahmai 15 Hmanthlak]

Tipil in ding naa tinhmi phanh awkah zeinihdah an bawmh lai?

[Cahmai 17 Hmanthlak]

Hi tahchunhnak in zeidah naa cawn khawh?