Careltu Hna Sinin Biahalnak

Khrihfa pakhat cu a thurhnawmmi hmanthlak a zoh tuk ahcun bu chung in chuah khawh a si maw?

▪ Chuah khawh a si. Cucaah a thurhnawmmi ca le hmanthlak aa telmi zei thil paoh hrial a biapit tuk. Mah thil ah cauk, mekazin, baisikup, video le Internet aa tel.

A thurhnawmmi hmanthlak cu vawlei pumpi khuazakip ah hmuh khawh a si. Internet ah a thurhnawm mi hmanthlak fawi tein zoh khawh a si caah a zohmi an tam chin. Cheukhat cu a thurhnawmmi hmanthlak a cuangmi Wed site kha ruah loin an awn sual tawn. Cheukhat tu cu inn le zungah mi nih an kan hmu lai lo ti ruat in an zoh. Khrihfa hna caah a thurhnawmmi hmanthlak zoh cu zeicah ṭih a nun?

Jesuh chimmi hi bia ah a biapimi a ruang kan hmuh: “Ahohmanh nih nu kha sual duhnak lungthin he a zoh ahcun, cu pa cu a lung chungin a sual cang.” (Matt. 5:28) Nu le va cu an ihṭi awk a si i mah nih nuamhnak a hmuhter hna. (Ptb. 5:15-19; 1 Kor. 7:2-5) Asinain a thurhnawmmi hmanthlak le video ahcun nu le pa sualnak kong a um i Jesuh nih hrial ding ralrin a kan pekmi tuah duhnak lungthin a kan ngeihter khawh. A thurhnawmmi video le hmanthlak zoh cu Pathian nawlbia he aa ralchan. Baibal nih hitin a ti: “Nan chung i rian a ṭuanmi vawlei pum duhnak: nu le pa sualnak te hna, dawhcah lo in um tu khuasak te hna, hornak te hna, thin ṭhat lo te hna le hakkauhnak te hna hi nan thah hrimhrim awk an si (hakkauhnak hi siasal biakning phun khat a si).”—Kol. 3:5.

Khrihfa pakhat cu voikhat, voihnih hrawng a thurhnawmmi hmanthlak a zoh ah tah zeitin? A sining cu hi bia a chimtu salm caṭialtu Asaph sining bantukin ṭihnung a si: “Kei cu ka rak tlu dengmang, ka rak nal dengmang.” Khrihfa pakhat cu taklawng in a ummi nu asiloah pa hmanthlak a zoh asiloah nu le pa an ihṭi lio hmanthlak a zoh ahcun zeitindah a chiaṭha thleidannak lungthin cu a thian khawh lai i Pathian he an i rem khawh lai? Anih cu hi bia a chimtu Asaph bantuk a si lai: “Pathian, chun nitlak in harnak na ka inter i zingfa tein dan na ka tat.”—Salm 73:2, 14.

A thurhnawmmi hmanthlak zoh a hmangmi Khrihfa pakhat nih mah a ziaza nih Jehovah he an i pehtlaihnak a hnorsuan le bawmh a herh kha a hngalh awk a si. Bawmhnak cu Khrihfa upa sin in a hmuh khawh: “Ka u le ka nau hna, pakhatkhat nih sualnak nan tuah sual tikah, a thlarau deuh pawl nih khan, lam ding ah nan chiah ṭhan awk a si; cun cu ti nan tuah tikah nemnak tein nan tuah lai.” (Gal. 6:1) Khrihfa upa pakhat asiloah pahnih nih a herhmi kha an bawmh khawh. A caah zumhnak in thla an cammi nih “a zawmi kha a damter lai” i a sualnak zong “ngaihthiam a si lai.” (Jeim 5:13-15) Asaph cu Pathian he an i naih tikah ṭhatnak a hmu. Cu bantuk in a thurhnawmmi hmanthlak zoh lo awk bawmhnak a cohlangmi cu Jehovah he an i pehtlaihnak a ṭhat deuh lai caah ṭhatnak a hmu ve lai.—Salm 73:28.

Asinain lamkaltu Paul nih “nun thur in a rak nung i nu le pa sualnak pumsa duhnak an tuah” nain aa ngaichih lomi hna cheukhat kong a rak chim.a (2 Kor. 12:21) Paul nih a hmanmi “nun thur” timi Greek biafang cu a thurhnawmmi, fih a nungmi tinak a si tiah Professor Marvin R. Vincent nih a chim. Fih a nungmi hmanthlak ah nu le nu, pa le pa an sual lio, a phu in nu,pa sualnak an tuah lio, saram he an sual lio, ngakchia taklawng hmanthlak, a phu in nu tlaihhrem, lungriamhter awkah nu pawl fakpi in le tem ngai in tuahto le midang hrem lio ti bantuk hmanthlak le video aa tel. Paul nih a chankhat mi cheukhat cu “an lungthin kha a mui” i “ningzah zeihmanh an hngal lo i sualnak kha an tuah lengmang, cun i sum lo in aa dawhcah lomi thil phun zakip kha an tuah” tiah a ti.—Efe. 4:18, 19.

Paul nih Galati 5:19 zong ah “a thurhnawmmi thil” kong a chim. Hika i “a thurhnawmmi thil” timi nih ningcang lo a simi pumsa duhnak kha a langhter tiah Mirang mifimpa pakhat nih a ti. Kan i ruahceihmi a thurhnawmmi hmanthlak le video pawl cu fih a nungmi thil an si i ningcang loin pumsa duhnak ngeih awk tha a pemi an si ti cu Khrihfa a simi paoh kan hna a tla ko lai. Paul nih cu thil a tuahmi cu “Pathian pennak an hmu lai lo” tiah Galati 5:21 ah a chim. Unau pakhat cu fihnungmi le a thurhnawmmi hmanthlak zoh a hman i a zohnak a sau cangmi a si ahcun zeitindah tuah a si lai? Aa ngaihchih lo i a zoh peng ahcun Khrihfabu huhphenhnak ca le thianternak caah bu chungin chuah a si lai.—1 Kor. 5:5, 11.

A thurhnawmmi hmanthlak zoh a hmangmi unau cheukhat cu Khrihfa upa bawmhnak an cohlan i an ziaza an i thleng ti kan theih caah kan i lawm. Jesuh nih hlanlio Sardis Khrihfa hna kha hitin tha a pek hna: “Na ngeih rihmi kha a thih taktak hlanah thazaang thar la tuah. . . . zeidah an in cawnpiakmi kha a si ti le zeitindah na rak theih ti kha philh hlah, cucu zul law na sualnak kha mertak hna. Naa hlauh lo ahcun . . . ka rat caan kha a hngalh hmanh na hngal lai lo.” (Biat. 3:2, 3) A thurhnawmmi hmanthlak zoh a hmangmi nih aa ngaihchih ahcun a ngol khawh ko lai.—Judas 22, 23.

Asinain a thurhnawmmi hmanthlak le video zoh lo in um cu a ṭha deuh suaumau. A thurhnawmmi ca, video le hmanthlak zoh lo ding bia khiak hna u sih.

[A Tanglei Fianternak]

[Cahmai 3nak i hmanthlak0]

A thurhnawmmi hmanthlak a zohmi Khrihfa pakhat nih mah a ziaza nih Jehovah he an i pehtlaihnak a hnorsuan le bawmh a herh kha a hngalh awk a si