CAWN AWK CAPAR 49
Jehovah Nih Ka Thlacamnak A Ka Let Lai Maw?
“Nan ka hal i ka sinah thla nan cam ahcun nan bia kaan ngaihpiak hna lai.”—JER. 29:12.
HLA 41 Ka Thlacamnak Ka Ngaihpiak
LANGHTERNAKa
1-2. Jehovah nih kan thlacamnak a kan let lo tiah zeicah kan ruah khawh men?
“BAWIPA kha i bochan u law nan lungthlitum kha aan pek hna lai.” (Salm 37:4) Mah cu a ṭha tukmi biakamnak a si. Asinain kan halmi poah cu kan hal le cangka in Jehovah nih a kan pek colh lai tiah kan i ruahchan awk a si maw? Mah biahalnak kha zeicah kan i hal awk a si? Thil sining cheukhat hi ruathmanh. Innchunghawi a ngei lomi unaunu pakhat nih Pennak Kong A Chimtu Hna Caah Tinṭan kai khawh awkah thla a cam. Asinain kum tampi a rauh hnu tiang an sawm lo. Mino unaupa pakhat nih Khrihfabu ah rian tam deuh a ṭuan khawh nakhnga le a zual tukmi a zawtnak a dam deuh nakhnga Jehovah sinah thla a cam. Asinain a dam deuh lo. Nulepa nih an fale kha biatak chung ah an um peng nakhnga thla an cam. Asinain an fale nih Jehovah kha an bia ti lo.
2 Nangmah zong Jehovah sinah thil cheukhat na hal ko nain na hmu rih men lai lo. Cucaah Jehovah nih mi cheukhat thlacamnak cu a leh ko hna nain kei cu a ka let lo tiah na ruah khawh men. Asiloah palhnak pakhatkhat ka tuah caah a si tiah na ruah khawh men. Janiceb timi unaunu zong nih cutin a rak ruah ve. A vapa he Bethel ah rianṭuan an duhnak kong kha thla an cam tawn. Janice nih hitin a ti: “A rauhhlan ah Bethel ah sawm kan si lai tiah ka rak ruah.” Asinain kum tampi a ruah tiang sawm an rak si lo. Janice nih hitin a ti: “Ka ngaih a chia i ka lung aa tuai. Jehovah lung a donghtermi thil zeidah ka tuah sual tiah ka ruah. Bethel um khawh awkah thla voi tampi ka cam. Zeicah Pathian nih ka thlacamnak a ka leh lo?”
3. Hi capar ah zei kong dah kan i ruah hna lai?
3 A caan ah Jehovah nih kan thlacamnak a ngai hnga maw tiah kan ruah men lai. Hlanlio zumhfekmi pa cheukhat hmanh nih cutin an rak ruah. (Job 30:20; Salm 22:2; Hab. 1:2) Jehovah nih na thlacamnak zei rel loin a um lo ti kha zeinihdah aan zumhter khawh? (Salm 65:2) Mah biahalnak a phi hngalh awkah a tanglei biahalnak hna hi phi: (1) Jehovah sinin zeidah kan i ruahchan khawh? (2) Jehovah nih kan sinin zeidah aa ruahchan? (3) Kan halmi cheukhat kha zeicah kan thlen a hauh khawh men?
Jehovah Sinin Zeidah Kan I Ruahchan Khawh?
4. Jeremiah 29:12 ning in Jehovah nih zei bia dah a kan kamh?
4 Jehovah nih kan thlacamnak kaan ngaihpiak hna lai tiah bia aa kam. (Jeremiah 29:12 rel.) Pathian nih zumfek tein amah a biami hna kha a dawt hna caah an thlacamnak kha zei rel loin a um bal lo. (Salm 10:17; 37:28) Asinain kan halmi poah in a kan pek dih lai tinak a si lo. Kan thlacamnak cheukhat hmuh awkah vawlei thar a phanh tiang kan hngah a hau kho men.
5. Jehovah nih kan thlacamnak a ngaih lioah zeidah a ruah? Fianter.
5 Jehovah nih kan thlacamnak a ngaih lioah aa tinhnak kong zong kha a ruah ve. (Isa. 55:8, 9) Aa tinhnak pakhat cu a uknak tang ah nuam te le lung rual tein a nawl a ngai dingmi pawl vawleicung ah khah dih ding kha a si. Asinain Satan nih minung cu anmah tein an i uk ahcun a ṭha deuh lai tiah a ti. (Gen. 3:1-5) Khuachia chimmi cu lihbia a si ti langhter awkah Jehovah nih minung kha anmah tein uknak nawl a awnh hna. Asinain anmah tein an i uk caah tuchan ah harnak tampi a chuak. (Pct. 8:9) Atu ah Jehovah nih mah buaibainak vialte a hlo dih lai lo ti kha kan hngalh. Cutin a tuah ahcun mi cheukhat nih minung uknak cu a ṭha ko i minung nih an tonmi buaibainak zong an i tawnghtham khawh ko tiah an ruah khawh men.
6. Jehovah nih dawtnak le dinnak a langhter zungzal lai ti kha zeicah kan zumh a herh?
6 Jehovah nih aa khatmi thlacamnak kha aa lo lomi lam in a leh men hna lai. Tahchunhnak ah, Siangpahrang Hezekiah cu a zawtnak a zual tuk caah a dam deuh nakhnga Jehovah sinah a nawl. Mah tikah Jehovah nih a damter. (2 Si. 20:1-6) Asinain Paul nih pumsalei ngandam lonak a si kho menmi “fahnak pakhat” kha hlohpiak ding in a nawl tikah Jehovah nih a hlohpiak lo. (2 Kor. 12:7-9) Lamkaltu Jeim le Peter kong zong kha ruathmanh. An pahnih in Siangpahrang Herod nih thah a duh hna. Khrihfabu nih Peter caah thla an campiak i Jeim ca zong ah thla an cam men ko lai. Asinain Peter cu khuaruahhar lam in a nunnak khamh a si i Jeim tu cu thah a rak si. (Lam. 12:1-11) Cucaah ‘Jehovah nih Peter kha a khamh nain zeicah Jeim cu a khamh lo?’ tiah kan ruah men lai. Baibal ah mah kong kha a chim lo.c Jehovah lam cu “biading an si” ti kha kan zumh khawh. (Deut. 32:4) Cun Jehovah nih Peter le Jeim kha an pahnih in a dawt hna ti kha kan hngalh. (Biat. 21:14) A caan ah Jehovah nih kan thlacamnak kha kan i ruahchanmi lam in a kan let men lai lo. Asinain Jehovah nih kan thlacamnak kha dawtnak le dinnak he a kan leh zungzal lai ti kha kan zumh caah kan thlacamnak a kan leh ning he aa tlaiin biahalnak kan tuah lo.—Job 33:13.
7. Zeidah hrial awkah kan i zuam, zeicah?
7 Kan sining le midang sining tahchunh kha kan hrial awk a si. Tahchunhnak ah, Jehovah sinah cuset, khaset tiin thla kan cam nain a kan let men lai lo. A hnuah midang pakhat nih cutin thla a cam ve i Jehovah nih a leh ti kha kan hngalh. Anna timi unaunu nih cutin a rak ton. A vapa Matthew kha cancer zawtnak in a dam nakhnga thla a cam. Mah lioah kum upa a simi unaunu pahnih zong nih cancer zawtnak an ngei ve. Anna nih Matthew le unaunu pahnih caah lungtak tein thla a cam. Unaunu pahnih cu an dam ṭhan nain Matthew tu cu a thi. A hmasa ah Anna nih hitin a ruah: ‘Unaunu pahnih cu Jehovah nih a damter ṭhan hna ahcun ka vapa dam ṭhan ding in thla ka cammi kha Jehovah nih zeicah a ka leh lo?’ Mah unaunu pahnih an dam ṭhannak a ruang cu kan hngal lo. Kan hngalhmi cu Jehovah nih sifah harnak kan tonmi kha zungzal in a hloh lai i kan dawtmi a thimi hna kha thawhter a duh tuk hna ti kha a si.—Job 14:15.
8. (a) Isaiah 43:2 ning in Jehovah nih zeitindah a kan bawmh? (b) Harnak kan ton lioah thlacamnak nih zeitindah a kan bawmh khawh? (Thlacamnak Nih Harnak Caan Ah Inkhawhnak Ngeih Dingin A Kan Bawmh timi video kha zoh.)
8 Jehovah nih a kan bawmh peng lai. A kan dawtu kan Pa Jehovah nih sifah harnak kan tonmi kha a duh lo. (Isa. 63:9) Asinain ti thuk asiloah mei alh bantuk a simi harnak vialte in cun a kan huhphenh lai lo. (Isaiah 43:2 rel.) Asinain “tan” khawh awkah kaan bawmh hna lai tiah bia aa kam. Harnak ruang ah amah he kan i pehtlaihnak rawh ding tiang in cun nawl a awnh lai lo. Jehovah nih inkhawhnak kan ngeih nakhnga bawmh awkah a ṭhawngmi a thiang thlarau zong a kan pek. (Luka 11:13; Fil. 4:13) Cucaah inkhawhnak ngeih awk le zumhfek tein um peng awkah kan herhmi kha tling tein a kan pek lai ti kha kan zumh khawh.d
Jehovah Nih Kan Sinin Zeidah Aa Ruahchan?
9. Jeim 1:6, 7 ning in Jehovah nih a kan bawmh lai ti zumh cu zeicah a herh?
9 Jehovah nih amah kha kan i bochan lai tiah aa ruahchan. (Heb. 11:6) A caan ah kan tonmi harnak hna cu inkhawh awkah a har tuk tiah kan ruah khawh men. Mah tikah Jehovah nih a kan bawm hnga maw tiah lunghrinnak kan hun ngei kho men. Asinain Pathian pekmi ṭhawnnak thawng in ‘ralhau kan baoh khawh’ lai tiah Baibal nih aamah a khaan. (Salm 18.29) Cucaah lunghrinnak ngeih loin Jehovah nih kan thlacamnak a kan leh lai ti kha zumh buin thlacam peng hna u sih.—Jeim 1:6, 7 rel.
10. Kan thlacamnak he aa tlak in zeidah kan tuah khawh timi kong tahchunhnak pe.
10 Jehovah nih thla kan cammi ning in an tuah lai tiah aa ruahchan. Tahchunhnak ah, unaupa pakhat nih pengkomh civui ah aa pumh khawh nakhnga a rian in khunh lak awkah Jehovah sinah thla a cam hei ti u sih. Jehovah nih mah thlacamnak kha zeitindah a leh lai? A rianbawi sinah khunh hal ding in a herhmi ralṭhatnak a pek men lai. Asinain unaupa nih a rianbawi sinah khunh a hal a hau. Atu le atu a hal a hau men lai. Nidang ah ṭuan ding in a hal khawh men. A herh ahcun a hmuhmi tangka zuh ding zong in a hal khawh men.
11. Kan lungretheihnak kong he aa tlaiin atu le atu zeicah thla kan cam awk a si?
11 Jehovah nih kan lungretheihnak kong he aa tlaiin atu le atu thla an cam lai tiah aa ruahchan. (1 Thes. 5:17) Kan thlacammi cheukhat cu leh colh kan si lai lo ti kha Jesuh chimmi bia in kan hngalh khawh. (Luka 11:9) Cucaah na lung dong hlah. Lungtak tein atu le atu thla cam peng. (Luka 18:1-7) Pakhatkhat kong he aa tlaiin kan cam pengmi nih kan lung a thawh caan ah kan hal sawhsawhmi a si lo ti kha a langhter. Cun Jehovah nih a kan bawmh khawh ti kan zumh kan langhtermi zong a si.
Kan Halmi Cheukhat Kha Zeicah Kan Thlen A Hauh Khawh Men?
12. (a) Pathian sin kan halmi kong he aa tlaiin kanmah le kanmah zeidah kan i hal awk a si? (b) Kan thlacamnak in Jehovah kan upat kha zeitindah kan langhter khawh? (“Ka Thlacamnak Nih Jehovah Ka Upat Kha A Langhter Maw?” timi rinli kulh ah zoh.)
12 Kan thlacammi leh kan si lo ahcun kanmah le kanmah biahalnak pathum kan i hal kho. Pakhatnak, ‘A hmaanmi thil caah thla ka cam maw?’ Kanmah caah a ṭha bikmi cu kanmah nih kan hngalh tiah kan ruah tawn. Asinain kan halmi thil nih caan saupi a kan ṭhathnemh men lai lo. Buaibainak pakhat he aa tlaiin thla kan cam ahcun kanmah kan tawnghthammi nakin a ṭha deuhmi tawnghtham ning a um kho men. A caan ah kan halmi cu Jehovah duh ning he aa tlak lomi a si men lai. (1 Johan 5:14) Tahchunhnak ah, a hmasa ah langhtermi nulepa kong kha ruathmanh. An fale biatak chung ah an um peng nakhnga Jehovah sinah thla an cam. Mah cu aa tlakmi a lo kho men. Asinain Jehovah nih amah biak awkah ahohmanh a kan hnek lo. Kan fale i telin kan dihlak in amah biak awkah i thim hna seh ti a kan duh. (Deut. 10:12, 13; 30:19, 20) Cucaah nulepa nih an fale kha Jehovah dawt awk le amah hawi si awkah ṭha tein an cawnpiak khawh hna nakhnga kan bawm ti tu in Jehovah sinah thla an cam awk a si.—Ptb. 22:6; Efe. 6:4.
13. Hebru 4:16 ning in Jehovah nih zeitik ah dah a kan bawmh lai? Fianter.
13 Pahnihnak biahalnak cu, ‘Ka thlacamnak Jehovah nih a ka leh caan a phan cang maw?’ Thla kan cammi kha a kan leh colh a hau tiah kan ruah men lai. Asinain Jehovah nih bawmh awkah a ṭha bikmi caan kha a hngalh. (Hebru 4:16 rel.) Kan halmi leh colh kan si lo tikah Jehovah nih a kan ‘let lo’ tiah kan ruah khawh men. Asinain a kan ‘leh rih lomi’ tu a si. Tahchunhnak ah, a zawtnak a dam deuh nakhnga thla a cammi unaupa kong kha ruat ṭhan hmanh. Jehovah nih khuaruahhar lam in a damter ahcun Satan nih na damter caah aan biak pengmi a si tiah Jehovah kha sual a puh khawh. (Job 1:9-11; 2:4) Jehovah nih zawtnak vialte damter awkah a caan ri a khiah cang. (Isa. 33:24; Biat. 21:3, 4) Mah caan a phak hlan tiang khuaruahhar lam in damter kan si lai tiin kan i ruahchan kho lo. Cucaah mah unaupa nih a zawtnak inkhawh awk le zumhfek tein Pathian biak peng khawh awkah thazaang le lungdaihnak ka pe ti tu in Jehovah sinah thla a cam awk a si.—Salm 29:11.
14. Janice hmuhtonnak in zeidah na cawn?
14 Bethel ah rianṭuannak kong he aa tlaiin thla a rak cammi Janice hmuhtonnak kha ruat ṭhan hmanh. Aa ruahchan lomi lam in Jehovah nih a thlacamnak a leh ti kha kumnga a rauh hnuah a hun hngalhthiam. Hitin a ti: “Mah caan chung ah Jehovah nih thil tampi a ka cawnpiak i a ṭha deuhmi Khrihfa si awkah a ka bawmh. Amah kha kaa bochan chin a hau. Pumpak hlathlainak zong ṭha deuh in ka tuah a hau. Cun Jehovah rian kha khoika hmun i ka ṭuan hmanh ah nuam tein ka ṭuan a hau.” A hnuah Janice le a vapa cu peng zohkhenhnak rian ṭuan ding in sawm an si. A luanciami caan kong a ruah ṭhan tikah Janice nih hitin a ti: “Jehovah nih ka thlacamnak kha a ka leh ko, asinain kaa ruahchanmi ning in cun a si lo. Jehovah nih a ka lehning cu a ṭha tukmi a si ti hngalh awkah a caan pek a hau. Asinain Jehovah dawtnak le zangfahnak hmuh awkah caanṭha ka ngeih caah kaa lawm tuk.”
Jehovah nih ka thlacamnak a ka le lo tiah na ruah ahcun a dang zei kong hna dah cam khawh a si ti kha ruat. (Catlangbu 15 zoh)f
15. A caan ah cuset khaset ti lawng in zeicah thla kan cam awk a si lo? (A phaw hmanthlak zong zoh.)
15 Pathumnak biahalnak cu, ‘Thil cheukhat caah tah thla ka cam awk a si rih maw?’ Cuset, khaset tiin thla kan cammi cu a ṭhami a si. Asinain a caan ahcun Jehovah nih zeidah a kan duhpiak ti hngalhthiam awkah cuset, khaset ti lawng si loin cam cu a ṭha deuh kho men. Pennak Kong A Chimtu Hna Caah Tinṭan kai a duhmi innchunghawi a ngei lomi unaunu kong kha ruat ṭhan hmanh. A herh deuhnak hmun ah phungchim rian a ṭuan khawh nakhnga mah tinṭan kha kai a duh. Mah tinṭan kai awkah sawmmi si ding in thla a cam lioah a dang lam hna in phungchim rian ṭuan khawh deuh awkah bawmhnak hmuh ding in thla a cam. (Lam. 16:9, 10) Cutin thla a cam hnuah unaunu nih peng zohkhenhtu kha hmaikal tam deuh an herhnak Khrihfabu a um maw tiah a hal khawh. Asiloah thawngthanhtu a herh deuhnak hmun kong he aa tlaiin zung ṭengnge sinah cakuat a ṭial khawh.e
16. Zeidah kan zumh khawh?
16 Kan hlathlai cang bantuk in Jehovah nih kan thlacamnak kha dawtnak le aa tlakmi lam in a kan leh lai ti kha kan zumh khawh. (Salm 4:3; Isa. 30:18) A caan ah kan i ruahchan ning in leh kan si men lai lo. Asinain Jehovah nih kan thlacamnak kha zei rel loin a um lai lo. A kan dawt tuk caah zeitikhmanh ah a kan kaltak bal lai lo. (Salm 9:10) Cucaah lungthin tak tein thla nan camnak thawng in “Pathian cu i bochan zungzal u.”—Salm 62:8.
HLA 43 Lunglawmh Thlacamnak
a Hi capar ah Jehovah nih kan thlacamnak kha dawtnak le aa tlakmi lam in a kan leh lai ti kha zeicah kan zumh khawh timi kong a langhter lai.
b Min cheukhat thlen a si.
c 2022, February, Vennak Innsang i “Jehovah Thil Tuah Ning Kha Na Zum Maw?” timi capar, cat 3-6 ah zoh.
d Harnak inkhawh awkah Jehovah nih a kan bawmh ning tam deuh in hngalh awkah jw.org ah taarmi, Thlacamnak Nih Harnak Caan Ah Inkhawhnak Ngeih Dingin A Kan Bawmh timi video kha zoh.
e Zung ṭengnge lohmun dang ah phungchim rian ṭuan khawh ning kong tam deuh in hngalh awkah Jehovah Duhnak Tuah awkah Dirhnak [Myanmar] timi cauk, ṭhen 10, cc. 6-9 ah zoh.
f HMANTHLAK FIANTERNAK: Unaunu pahnih cu Pennak Kong A Chimtu Hna Caah Tinṭan kai ding in form an phih hlan ah thla an cam. A hnuah pakhat cu sawm a si i a dang pakhat cu sawm a si lo. Sawm a si lomi unaunu nih lungdongh tuk canah a dang lam in phungchim rian ṭuan khawh awkah bawmh ding in Jehovah sinah thla a cam. Cun a herh deuhnak hmun ah phungchim rian ṭuan a duhnak kong kha zung ṭengnge ah cakuat a ṭial.