Jehovah Min Cu Jesuh Caah A Biapi

1-2. (a) A thih lai zan ah Jesuh nih zeidah a tuah? (b) Hi capar ah zei biahalnak dah kan i ruah hna lai?

AD 33, Nisan 14, Nili ni zanlei sang tlai nawn ah a si. Jesuh cu rawinak, biaceihnak, sualphawtnak le hremnak a tong lai i thah a si cang lai. Zumhfekmi lamkaltu hna he inncung dot ah a hleikhunmi zanriah an ei dihka te a si i Jesuh nih thazaang peknak bia tampi a chimh hna. Inncung dot in an chuah lai te ah Jesuh cu a biapi tukmi kong caah thla a cam. Lamkaltu Johan nih mah thlacamnak kong kha a rak ṭial i Johan 17 ah hmuh khawh a si.

² Hi capar ah Jesuh thlacamnak in kan cawn khawhmi kong kan hngalh lai. A thih lai ah Jesuh cu zei kong ah dah a bik in a lungre a theih? Mah thlacamnak nih vawleicung a um lio i biapi bik ah a chiahmi thil kha zeitindah a langhter? Mah biahalnak pahnih kha i ruah hna u sih.

“Na Min Cu Annih Kha Ka Hngalhter Cang Hna”

3. Jesuh nih “na min cu annih kha ka hngalhter cang hna” tiah a ti tikah zeidah a chim duhmi a si? (Johan 17:6, 26)

³ A thlacamnak ah Jesuh nih “na min cu annih kha ka hngalhter cang hna” tiah a ti. A tak ti ahcun mah bia kha Jesuh nih voihnih tiang a chim. (Johan 17:6, 26 rel.) Zeidah a chim duhmi a si? A min an hngalh lo caah maw a si? Jesuh zultu cu Judah mi an si caah Pathian min Jehovah kha an hngalh cang. Hebru Baibal zong ah mah min cu voi 7,000 dengmang aa tel. Cucaah Pathian pumpak min si loin mah min nih a aiawhmi kha a hngalhtermi hna a si. Jehovah aa tinhnak, a rianṭuannak le a sining i telin Jehovah kong kha aho nakhmanh in ṭha deuh in a langhter khawh.

4-5. (a) Mi pakhat min cu zeitindah kan caah sullam a hun ngeih chin khawh? Tahchunhnak pe. (b) Jesuh zultu hna nih zeiti lam in dah Jehovah min kha ṭha deuh in an hun hngalh?

⁴ Tahchunhnak ah, na Khrihfabu ah David timi Khrihfa upa pakhat a um i anih cu khuaihlaitu siibawi zong a si hei ti u sih. Mah unaupa na hngalhnak cu kum saupi a si cang. Nikhat cu ruahlopi in na zaw i siizung na phan. Khuaihlai na herh caah mah unaupa nih khuaihlainak aan tuah i na nunnak aan khamh. Atu ah mah unaupa min cu na caah sullam a ngei chinchin cang, a si ko lo maw? David cu na caah Khrihfa upa lawng si ti loin na nunnak aan khamhtu siibawi zong a si cang.

⁵ Cu bantuk in Jesuh zultu hna nih Jehovah min kha an hngalh cang ko. Asinain Jesuh nih Jehovah kong kha tam deuh in a hngalhter hna caah mah min cu sullam a hun ngei chin. Zeicah cutin kan chim khawh? Jesuh nih a biachim le a tuahsernak in a Pa sining kha tling tein aa zohchunh caah a si. Cucaah Jesuh nih mi a cawnpiak hna ning le a pehtlaih hna ning an hmuh tikah Jehovah kong kha ṭha deuh in zultu pawl nih an hun “hngalh.”—Joh. 14:9; 17:3.

“I Laknak Nawl Ka Hmuhmi Na Min”

6. Jesuh nih i laknak nawl ka hmuhmi na min tiah a ti tikah a chim duhmi cu zeidah a si? (Johan 17:11, 12)

⁶ Jesuh nih a zultu pawl caah hitin thla a cam: “I laknak nawl ka hmuhmi na min thawng in annih cu zohkhenh ko hna.” (Johan 17:11, 12 rel.) Jesuh cu Jehovah tiah auh a si cang lai tinak a si maw? A si lo. A thlacamnak ah Jesuh nih “na min” tiah a timi kha i cinken. Mah nih Jesuh cu Jehovah timi min in auh a si lai lo ti kha a langhter. Cu a si ah Jesuh nih i laknak nawl ka hmuhmi na min tiah a ti tikah zeidah a chim duhmi a si? Pakhatnak, Jesuh cu Jehovah aiawh in Bia a Chimtu a si. A Pa min in a ra i mah min in khuaruahhar thil tampi zong a tuah. (Joh. 5:43; 10:25) Pahnihnak, Jesuh min cu “Jehovah Cu Khamhtu A Si” timi sullam a ngei. Cucaah Jesuh min sullam ah Jehovah min aa tel.

7. Jesuh nih Jehovah min in zeicah bia a chim khawh ti kha tahchunhnak pe.

⁷ Tahchunhnak ah, ram uktu a aiawhmi lamkal pakhat nih uktu min in bia a chim khawh. Cucaah mah lamkal nih a chimmi bia cu uktu nih a chimmi tluk in nawl a ngei. Cu bantuk in Jesuh cu Pathian aiawhtu a si caah Jehovah min in mi sinah bia a chim khawh.—Matt. 21:9; Luka 13:35.

8. Vawleicung a rat hlanah Jesuh cu Jehovah min in rian a ṭuan tiah zeicah kan chim khawh? (Exodus 23:20, 21)

⁸ Jehovah nih Jesuh hmang in vancungmi le minung kha lamhruainak a pek hna caah Baibal nih Jesuh kha Bia tiah a auh. (Joh. 1:1-3) Ramcar chung ah Israel mi zohkhenh awkah Jehovah nih a thlahmi vancungmi cu Jesuh si dawh a si. Jehovah nih Israel mi kha mah vancungmi a nawl ngaih ding in a fial hna lioah “Amah cu keimah min in rian a ṭuanmi a si” tiah a ti hna.a (Exodus 23:20, 21 rel.) Jesuh cu Jehovah aiawhtu le a bik in a min a thiantertu a si caah Jehovah nih cutin a chim khawh.

“Ka Pa, Na Min Cu Sunparnak Pe Ko”

9. Jehovah min cu Jesuh caah zeitluk in dah a biapit? Fianter.

⁹ Kan i ruah cang bantuk in vawlei a rat hlan in Jesuh caah Jehovah min cu a biapi tuk. Cucaah vawleicung ah Jesuh nih a tuahmi thil vialte cu Jehovah min he aa pehtlai. A phungchim rian a donghlei ah Jesuh nih “Ka Pa, na min cu sunparnak pe ko” tiah a ti. Cutin a chim dihle cangka in Jehovah nih vancung in aw thangpi in hitin a leh: “Sunparnak cu ka pek cang i ka pek rih ko lai.”—Joh. 12:28.

10-11. (a) Jesuh nih zeitindah Jehovah min kha sunparnak a pek? (Hmanthlak zong zoh.) (b) Jehovah min cu zeicah thianter a herh?

¹⁰ Jesuh zong nih a Pa min kha sunparnak a pek. Zeitindah? Lamkhat cu duh a nung tukmi a sining le a tuahsernak kong kha midang sinah a chimnak thawng in a si. Asinain mah nak tam deuh a tuah rih. Jehovah tuahmi vialte cu a ding i a min cu a thiang ti kha Jesuh nih a langhter a hau. Mah cu zeitluk in dah a biapit ti kha zohchunh awk thlacamnak ah Jesuh nih a langhter. Hitin a ti: “Vancung khua i a ummi kan Pa, na min cu thianter si ko seh.”—Matt. 6:9.

¹¹ Jehovah min cu zeicah thianter a herh? Eden dum ah Satan nih Jehovah thang a chiat caah a si. Satan nih Jehovah Pathian cu lihchimtu a si i Adam le Evi kha thilṭha a thuhkanh hna tiah a ti. (Gen. 3:1-5) Satan nih Jehovah uk ning cu a ding lo ti zong in sual a phawt. Mah sualphawtnak nih Jehovah min a chiatter. Job chan zong ah mi nih Jehovah an biakmi cu a sinin thilṭha an hmuh caah a si tiah Satan nih a ti. Cun Jehovah kha an daw taktak lo i harnak an ton ahcun an kaltak ko lai ti zong in a ti. (Job 1:9-11; 2:4) Lihchimtu cu Jehovah maw a si, Satan dah ti langhter awkah a caan pek a hau.

“Ka Nunnak Kha Ka Pek”

12. Jesuh nih Jehovah min kha a sunsak caah zeidah tuah a duh?

¹² A Pa a dawt tuk caah Jesuh nih Jehovah min thianter awkah a si khawh chung in aa zuam. “Ka nunnak kha ka pek” tiah a ti. (Joh. 10:17, 18) Jehovah min caah thih hmanh a ngamh.b A hmasa bik mitling pahnih Adam le Evi nih Jehovah kha an kaltak i Satan lei ah an ṭang. Asinain Jesuh tu cu lungtho tein vawlei ah a ra, zumhawktlak tein a nung i zeitluk in dah Jehovah a dawt ti kha a langhter. (Heb. 4:15; 5:7-10) Jesuh cu hremnak tung cung ah a thih tiang zumhfek tein a um peng. (Heb. 12:2) Cuticun Jehovah a dawt i a min a sunsak kha a langhter.

13. Satan cu lihchimtu a si ti langhter awkah Jesuh cu zeicah aa tlak bikmi a si? (Hmanthlak zong zoh.)

¹³ Jesuh nih a nunning in lihchimtu cu Jehovah si loin Satan a si ti kha fiang tein a langhter. (Joh. 8:44) Jesuh nih Jehovah kong kha aho nakhmanh in a hngalh deuh. Jehovah kong he aa tlaiin Satan sualphawtnak ah a hmaanmi pakhat tal a um ahcun mah kong kha Jesuh nih a hngalh ko lai. Asinain Jesuh nih a hmaan hrimhrim lo ti kha a hngalh caah Jehovah min kha a kilven. Jehovah nih a hlawtmi a lawh hmanh ah dawtnak in a khatmi a Pa kaltak nakin cun thih hmanh a duh deuh.—Matt. 27:46.c

“Na Ka Pekmi Rian Cu Ka Liim Cang”

14. Jesuh cu zumhawktlak tein a um caah Jehovah nih zei thluachuah dah a pek?

¹⁴ A thih lai zan i thla a cam lioah Jesuh nih “na ka pekmi rian cu ka liim cang” tiah a ti. Zumhawktlak tein a um caah Jehovah nih thluachuah a ka pek lai ti kha a zumh. (Joh. 17:4, 5) A Pa cung ah zumhnak a ngeihmi cu aa tlak tukmi a si. Zeicahtiah Jehovah nih Jesuh kha thlan ah a kaltak zungzal lo. (Lam. 2:23, 24) Thihnak in a thawhter ṭhan i vancung i a sangmi dirhmun ah a hlorh. (Fil. 2:8, 9) A hnuah Jesuh cu Pathian Pennak Siangpahrang a hung si. Mah Pennak nih zeidah a liim lai? Zohchunh awk thlacamnak ah Jesuh nih hitin a ti: “Na Pennak tlung ko seh. Vancung ah na [Jehovah] duhnak a tlin bantuk in vawleicung zong ah tling ve ko seh.”—Matt. 6:10.

15. Jesuh nih zeidah a liim rih lai?

¹⁵ A ra dingmi Armageddon ah Jesuh cu Pathian ral he an i do lai i miṭhalo vialte kha a hrawh dih hna lai. (Biat. 16:14, 16; 19:11-16) Mah hnu tlawmpal ah Satan kha “khor thuk” chung ah a thlak lai, phundang in cun mithi bantuk a si lai i a cawlcang kho ti lai lo. (Biat. 20:1-3) Kum Thongkhat Uknak chung ah Jesuh nih daihnak a umter ṭhan lai i mitling a kan siter ṭhan lai. Mithi zong a thawhter ṭhan hna lai i vawleicung pumpi kha paradis ah a ser lai. Jehovah aa tinhnak vialte cu a tling dih lai!—Biat. 21:1-4.

16. Kum Thongkhat Uknak a dih hnuah nunnak cu zeidah a lawh lai?

¹⁶ Kum Thongkhat Uknak a dih hnuah nunnak cu zeidah a lawh lai? Sualnak le tlinlonak kan ngei ti lai lo. Cucaah tlanhnak man cung ah hrambunh in sual ngaihthiamnak hal a hau ti lai lo i remnak sertu le tlangbawi zong kan herh ti lai lo. Mah leng ah “hmanung bik ral a simi thihnak” zong a um ti lai lo. Mithi cu thawhter ṭhan an si lai i thlan cu an lawng lai. Vawleicung ah a ummi vialte cu mitling kan si dih lai.—1 Kor. 15:25, 26.

17-18. (a) Kum Thongkhat Uknak a dih tikah zeidah a cang lai? (b) A uknak caan a dih tikah Jesuh nih zeidah a tuah lai? (1 Korin 15:24, 28) (Hmanthlak zong zoh.)

¹⁷ Kum Thongkhat Uknak a dih hnuah Jehovah min thiannak kongkau ah ahohmanh an lung a hring ti lai lo. Zeicah? Eden dum ah Satan nih Jehovah cu lihchimtu a si i minung a uknak ah dawtnak aa tel lo tiah sual a rak phawt. Mah caan thawk in Jehovah a biami hna nih a min kha voi tampi an thianter cang. Cucaah Kum Thongkhat Uknak a dih tikah Jehovah min kong ah lunghrinnak zeihmanh a um ti lai lo i dawtnak a ngeimi kan Pa a si kha mikip nih an hngalh cang lai.

¹⁸ Kum Thongkhat Uknak a dih hnuah Satan chimmi cu lihbia a si ti kha mi vialte nih an hngalh lai. Jesuh nih tah zeidah a tuah lai? Satan bantuk in Jehovah a ralchanh lai maw? A ralchanh lai lo! (1 Korin 15:24, 28 rel.) Pennak kha a Pa sinah a pek ṭhan lai i Jehovah uknak tang ah aa dor lai. Satan he i lo loin Jesuh nih cun Jehovah a dawt tuk caah a ngeihmi thil vialte kha siang ngai in a pek ṭhan lai.

19. Hi capar ah Jesuh kong he aa tlaiin zeidah kan cawn?

¹⁹ Jehovah nih Jesuh kha a min laknak nawl a pekmi cu khuaruahhar awk a si lo! Jesuh nih a Pa aiawhtu a si kha fiang tein a langhter cang. Cu a si ah Jehovah min cu Jesuh caah zei sullam dah a ngeih? A caah zei thil nakhmanh in a biapi deuh. Mah min kilven awkah lungtho tein a thi i Kum Thongkhat Uknak a dih hnu zong ah a ngeihmi thil vialte kha Jehovah sinah lungtho tein a pek ṭhan lai. Jesuh kha zeitindah kan i zohchunh khawh? A hnu capar ah mah biahalnak kong kha kan i ruah hna lai.