“Pathian Bia cu . . . a Ṭhawng”

“Pathian bia cu a nung i a ṭhawng.”—HEB. 4:12.

HLA: 37, 37

1. Pathian Bia cu a ṭhawng ti kha zeinihdah aan zumhter? (A hramthawknak hmanthlak zoh.)

JEHOVAH miphun nih Pathian bia cu “a nung i a ṭhawng” ti kha an zumh. (Heb. 4:12) Kanmah nunnak le midang nunnak in Baibal ṭhawnnak kha kan hmuh khawh. Unau cheukhat cu Jehovah Tehte an si hlanah fir a hmangmi, ritnak siivai a hmangmi asiloah a ziaza a rawkralmi an si. Cheukhat cu a min a thangmi le a rummi an si ko nain an nunnak ah thil pakhatkhat a bau tiah an ruah. (Pct. 2:3-11) Ruahchannak a ngei lomi hna cu Baibal nih an nunning a thlen caah nunnak lam kha an hmuh. Cu bantuk hmuhtonnak hna kha Vennak Innsang i “Baibal Nih An Nunning A Thlen” timi capar ah kan rel tikah kan i lawm tuk. Khrihfa an si hnu hmanhah Baibal bawmhnak thawngin Jehovah he an i pehtlaihnak kha an ṭhawnter zungzal.

2. Kumzabu pakhatnak ah Pathian Bia ṭhawnnak cu zeitindah a langh?

² Mi tampi nih biatak an hngalh tikah thlennak nganpi an tuahmi cu khuaruahhar awk a si lo. Kumzabu pakhatnak i vancung ruahchannak a ngeimi unau pawl zong nih cu bantuk thlennak kha an rak tuah. (1 Korin 6:9-11 rel.) Paul nih Pathian Pennak a co hnga lomi kong a chim hnuah “mah kha nan lak i cheukhat nih nan tuah” tiah a ti. Pathian Bia le thiang thlarau nih annih cu i thlen awkah a bawmh hna. Asinain Khrihfa an si hnu hmanhah an lak i cheukhat nih Jehovah he an i pehtlaihnak a hnorsuangmi sualnak ngan kha an tuah. Tahchunhnak ah, Baibal nih bu chungin chuah a simi, chiti thuhmi unaupa pakhat kong kha a chim. A hnuah bu chungah a luh ṭhan khawh nakhnga thlennak a rak tuah. (1 Kor. 5:1-5; 2 Kor. 2:5-8) Unau pawl nih Pathian Bia ṭhawnnak thawngin thlennak tampi an tuah khawhmi cu thazaang petu taktak a si.

3. Hi capar ah zei kong dah kan i ruah hna lai?

³ Pathian Bia cu a ṭhawng tukmi a si. Mah kha Jehovah nih a kan pek caah a ṭha bikmi lam in hman kan duh. (2 Tim. 2: 15) Hi capar ah Baibal ṭhawnnak kha (1) kan nunnak, (2) phungchim rian le (3) pulpit cung in phungchim tikah zeitindah kan langhter khawh ti kha kan i ruah hna lai. Mah nih kan ca ṭhatnak a kan cawnpiaktu vancung kan Pa kan dawtnak le a cungah kan i lawmhnak langhter awkah a kan bawmh lai.—Isa. 48:17.

Kan Nunnak Ah

4. (a) Pathian Bia in ṭhatnak kan hmuh khawh nakhnga zeidah kan tuah khawh? (b) Baibal rel ding ah a caan kha zeitindah na lak?

⁴ Pathian Bia in ṭhatnak kan hmuh khawh nakhnga Baibal kha hmaan tein kan rel a hau. Nifate rel khawh awkah kan i zuam awk a si. (Josh. 1:8) Tam deuh cu kan nunnak ah kan rian a tam cio, asinain kan rian telin zeithil hmanh kha Baibal rel kan i donhter awk a si lo. (Efesa 5:15, 16 rel.) Zingka ah siseh, zan ah siseh asiloah caankhatkhat ah nifate Baibal rel awkah kan i zuam awk a si. “Zeitluk in dah na phunglam cu ka duh, chun nitlak cu lawng cu ka ruat ko” tiah a timi salm caṭialtu pa bantukin kan intuar ve.—Salm 119:97.

Ṭha tein thimmi Baibal caang pakhat cu kan chim khawhmi zei bantuk bia nakhmanh in hmual a ngei deuh

5, 6. (a) Zeicah ṭha tein ruah cu a herh? (b) Zeitindah ṭha tein kan ruah khawh? (c) Baibal relnak le ṭha tein ruahnak nih zeitindah aan bawmh khawh?

⁵ Baibal relnak lawngin a za lo. Kan relmi kong kha ṭha tein ruah le tuaktan a hau. (Salm 1:1-3) Cutin kan tuah lawngah kan nunnak ah Baibal i a ṭhami ruahnak cheuhnak kha kan hman khawh lai. Cucaah Baibal kha cauk in siseh, electronic thilri in siseh kan rel tikah rel sawhsawh lawng si loin kan lungthin chung i luhter awkah hmuitinh kan chiah awk a si.

⁶ Baibal kan relmi kong kha zeitindah ṭha tein kan ruah khawh? Baibal kan rel tikah chikkhat i dinhta in hitin kan i hal awk a si: ‘Mah nih Jehovah kong zeidah a ka cawnpiak? Ka relmi kong hi ka nunnak ah zeitindah ka hman cang? Zei bantuk thlennak dah tuah ka herh rih?’ Pathian Bia kha thlacam buin ṭha tein kan ruah tikah kan nunnak ah hman kan duh lai. Cun kan nunnak ah Baibal ṭhawnnak kha kan hmuh khawh lai.—2 Kor. 10:4, 5.

Phungchim Rian Ah

7. Phungchimnak ah Pathian Bia kha zeitindah kan hman khawh?

⁷ Phung kan chim tik le kan cawnpiak hna tikah Pathian Bia kha atu le atu hman cu a biapi tuk. Unaupa pakhat nih “Jehovah he innkhat hnu innkhat phungchim nan kal tikah nangmah nih maw na chim dih lai asiloah Jehovah kha chimnak nawl na pe ve lai maw?” tiah a ti. Baibal kan rel tikah Jehovah kha bia chimnak nawl kan pekmi a si. Ṭha tein thimmi Baibal caang pakhat cu kan chim khawhmi zei bantuk bia nakhmanh in hmual a ngei deuh. (1 Thes. 2:13) Phungchimnak i naa tel tikah Baibal rel dingin a si khawh chung naa zuam maw?

Baibal caang tampi relnak men in Baibal in ka cawnpiak tiah ruat hlah

8. Phung kan chim tikah Baibal caang rel lawng si loin zeidah kan tuah khawh?

⁸ Phungchimnak ah Baibal relpiak lawngin a za lo. Mi tampi nih Baibal i a sullam kha an hngalthiam lo. Kumzabu pakhatnak zongah cutin a rak si. (Rom 10:2) Kan relmi Baibal caang kha inn-ngeitu nih an hngalhthiam ko lai tiah kan ruah awk a si lo. A bik in langhter duhmi biafang kha kan rel ṭhan khawh asiloah a sullam kha kan fianter khawh. Cuticun an lungthin chungah Pathian Bia a phanh khawh nakhnga kan bawmh khawh hna.—Luka 24:32 rel.

9. Baibal caang pakhat kha kan rel hlanah kan chimmi bia in inn-ngeitu kha Baibal upat awkah zeitindah kan bawmh khawh? Tahchunhnak pe.

⁹ Baibal caang pakhat kha kan rel hlanah kan chimmi bia zong nih inn-ngeitu kha Baibal upat awkah a bawmh khawh. Tahchunhnak ah, “mah kong he aa tlaiin Sertu nih zeidah a chim ti kha zohhmanh u sih” tiah kan ti khawh. Asiloah Khrihfa a si lomi sin phung kan chim tikah “Cathiang nih zeitindah a chim ti kha zohhmanh u sih” tiah kan ti khawh. Biaknaklei zei a rel lomi he kan i ton ahcun “mah hlanlio bia hi na thei bal maw?” tiah kan hal khawh. Mikip nih anmah pumpak hnulei sining le zumhnak an ngei cio ti kha i cinken in anmah he aa tlak ningin kan cawnpiak hna awk a si.—1 Kor. 9:22, 23.

Jehovah Tehte Hna nih phungchimnak ah Baibal an hman

10. (a) Unaupa pakhat i hmuhtonnak kha chim. (b) Phungchimnak ah Pathian Bia ṭhawnnak kha zeitindah na hmuh?

¹⁰ Phungchim tikah Pathian Bia hman cu hmual a ngei tuk ti kha mi tampi nih an hngalh. Tahchunhnak ah, unaupa pakhat nih kum tampi chung kan mekazin a relmi kum upa pakhat sinah a va leng. Nikhat cu hmanung bik chuak Vennak Innsang kha a pek lawng pek sawhsawh loin Baibal caang pakhat a relpiak. 2 Korin 1: 3, 4 (NW) i mah bia hi a relpiak: ‘Zaangfahnak in a khatmi kan Pa, zeizong vialte ah a kan hnemtu Pathian nih harnak kan innak kip ah a kan hnemh.’ Mah bia nih a lung a suk tuk i unaupa kha ka relpiak ṭhan tiah a ti. Amah le a nupi nih hnemhnak kan herh tuk tiah a ti. Mah Baibal caang ruangah Baibal kong kha tam deuh in hngalh a hun duh. Phungchimnak ah Pathian Bia hman cu hmual a ngei tuk hringhran.—Lam. 19:20.

Pulpit Cung in Phungchim tikah

11. Pulpit cung in mi a cawnpiaktu unaupa hna nih zei rian dah an ngeih?

¹¹ Khrihfabu pumhnak le civui hna ah i pumh kha kan duh tuk. A bik in kan i pumhnak a ruang cu Jehovah biak awkah a si. Pumhnak ah kan theihmi kong hna in ṭhatnak kan hmu. Mah ruangah pulpit cung in phung a chimmi unaupa hna cu a sunglawi tukmi tinvo an hmu. Cun a biapi tukmi rian zong an hmu. (Jeim 3:1) Cucaah an cawnpiaknak cu Pathian Bia ah hram aa bunhmi a si awk a si. Mah tinvo sung kha na hmuh ahcun na phungchimnak a ngaimi hna caah Baibal ṭhawnnak kha zeitindah na hman khawh?

Unaupa pakhat nih pulpit cung i a cawnpiak hna tikah Baibal a hman

12. Phungchimtu nih a phungchimnak cu Baibal ah hram aa bunhmi a si kha zeitindah a langhter khawh?

¹² Phungchimnak cu Baibal ah hram aa bunhmi a si awk a si. (Johan 7:16) Cucaah na phungchim ning kha ṭha tein i ralring, cun na hmanmi hmuhtonnak asiloah tahchunhnak hna kha Baibal nakin lungthin pekter deuh awkah i zuam hlah. Cun Baibal caang tampi relnak men in Baibal in ka cawnpiak tiah ruat hlah. Baibal caang tampi na rel ahcun an i cinken kho lai lo. Cucaah Baibal caang hna kha ṭha tein thim. Cun rel awk, fianter awk, tahchunnak pek awk le ṭha tein hman thiam awkah a caan pe. (Neh. 8:8) Phungchimnak cu outline ah hram aa bunhmi a si ahcun outline le mah ah aa telmi Baibal caang hna kha ṭha tein hlathlai. Outline le Baibal caang aa pehtlaih ning kha hngalhthiam awkah i zuam. Outline nih a bik in a langhter duhmi a kong he aa pehtlaimi Baibal caang hna kha hmang. (Theocratic Rianṭuannak Sianginn Cawnnak In Ṭhathnemnak Hmu timi cauk, ṭhen 21 in 23 ah a ṭhami ruahnak cheuhnak hna na hmuh khawh.) A biapi bikmi cu Baibal ah aa telmi a sunglawi tukmi ruahnak hna langhter khawh awkah Jehovah sinah bawmhnak hal.—Ezra 7:10; Phungthlukbia 3:13, 14 rel.

13. (a) Unaunu pakhat cu pumhnak ah a theihmi Baibal caang pakhat nih zeitindah a lung a suk? (b) Pumhnak ah an hmanmi Baibal caang in zeitindah ṭhatnak na hmuh?

¹³ Australia ram i unaunu pakhat cu a ngakchiat lioah ngaihchiat awk a simi thil tampi a tong, a hnu i Jehovah a hngalh hnu hmanhah Jehovah nih a ka dawt ti kha a zum dih kho lo. Pumhnak ah mah unaunu nih a lung a su tukmi Baibal caang pakhat kha a theih. Mah Baibal caang kha ṭha tein a ruah i mah he aa tlaimi a dang Baibal caang pawl zong kha a hlathlai. Mah tikah Jehovah nih a ka dawt ti kha a hun zumh.a Nangtah pumhnak le civui hna ah na lung aan sumi Baibal caang hna na thei bal ve maw?—Neh. 8:12.

14. Jehovah bia kan sunsaknak kha zeitindah kan langhter khawh?

¹⁴ Jehovah nih a Bia, Baibal a kan pek caah kan i lawm tuk. A Bia cu a hmun lai tiah bia aa kam i a biakam kha a tlinter. (1 Pet. 1:24, 25) Cucaah Baibal kha hmaan tein rel, kan nunnak ah hman le midang bawmhnak ah hman kan duh. Cutin kan tuahnak thawngin a sunglawi tukmi mah Baibal le Baibal Ṭialtu taktak Jehovah Pathian kha kan dawt hna i kan sunsak hna ti kan langhter.

a “Thlennak” timi rinli kulh ah zoh.

“Thlennak”

Victoria cu Biatak a hngalh hnu, kum tampi chung tiang Pathian nih a ka dawt ti kha cohlan awkah aa harh. Pathian nih a ka dawt ti cohlan awkah zeinihdah a bawmh? Victoria nih hitin a chim:

“Tipil ka in hnu, kum 15 hrawngah thlennak pakhat a hung um. Biakinn i phungchimnak pakhat ah . . , phungchimtu nih Jeim 1:23, 24 kha a rel. Mah Baibal caang ah Pathian Bia kha thlalang he a tahchunh. Jehovah nih a kan hmuhning in kanmahle kanmah i hmuh ve awkah a kan bawmh. Jehovah nih a ka hmuhning le keimahle keimah kaa hmuhning cu aa dang maw ti kha ka hun ruat. A hmasa ahcun mah kha ka cohlang kho lo. Jehovah nih a ka dawt lai tiah kaa ruahchanmi cu a luan tuk tiah ka ruah.

“Ni tlawmpal a rauh hnuah ka nunnak a thlengmi Baibal caang pakhat kha ka rel khawh. Mah Baibal caang cu Isaiah 1:18 kha a si. Jehovah nih ‘Atu cu hi bia hi ṭha tein ruatṭi tuah u sih. Nan sualnak cu a sen in sen hna hmanh sehlaw hawrha bantuk thiang in kaan kholh hna lai’ tiah a ti. Jehovah nih hitin a ka ti bantukin ka intuar: ‘Atu cu hi bia hi ṭhate in ruatṭi tuah u sih, Vicky. Nangmah cu kaan hngalh, na sualnak kha ka hngalh, na lungthin kha ka hngalh i kaan dawt tuk.’”

“Mah zan cu kaa hngilh kho lo. Jehovah nih a ka dawt ti kha ka lung a hring rih ko nain Jesuh tlanhnak man kong kha ka hun ruat. Jehovah cu ka cungah caan saupi chung a lung a sau ti le a dawtnak kha lam tampi in a langhter ti kha ka hun hngalh. Asinain ka tuahsernak cu hitin a chimmi bantuk ka si: ‘Na dawtnak cu kaa za lo. Na Fapa tlanhnak man cu ka caah a za lo.’ Tlanhnak man kha Jehovah sinah khirh ṭhan bantuk a si. Asinain atu cu tlanhnak man laksawng ka ruahnak thawngin Jehovah nih a ka dawt ti kha ka hngalh cang.”