Daniel Kong He Aa Tlaiin Baibal Nih Zeidah A Chim?

Baibal Chimmi

Daniel cu BC kum zabu pasarih le paruk hrawngah a nungmi a min a thangmi Judah profet a si. Pathian nih Daniel kha mang leh khawhnak, hmailei kong hmuhchung khawhnak le amah min in Baibal cauk ṭial khawhnak tinvo sung a rak pek.—Daniel 1:17; 2:19.

Daniel Cu Ahodah A Si?

Daniel cu Jerusalem khualipi le Judah biakinn a umnak Judah ram ah a ṭhangmi a si. BC 617 ah Babilon siangpahrang Nebukhadnezzar nih Jerusalem kha a doh a lak i “ram chung santlai bikmi hna” kha Babylon ah sal in a kalpi hna. (2 Siangpahrang 24:15; Daniel 1:1) Mah lioah kumhra fai hrawng a si kho menmi Daniel zong kalpi a si ve.

Daniel le a dang mino pa pawl Babilon siangpahrang inn ah inn cawngtu pawl nih an kalpi hna lio.

Daniel le a dang mino (Shadrak, Meshak le Abednego i telin) hna cu cozah rianṭuan awkah ṭha tein cawnpiak dingin Babilon siangpahrang inn ah auh an si. An zumhnak thlahdorh dingin hnek an si nain Daniel le a hawile pathum cu an Pathian Jehovah cungah zumhfek tein an um. (Daniel 1:3-8) Kumthum chung cawnpiak an si hnuah Siangpahrang Nebukhadnezzar nih “mitlehthiam hna le kutṭial zohthiam hna le camhthiam hna nakkhan a let hra in an hngal deuh ti kha a hmuh” i an fimnak le an thiamnak ruangah a thangṭhat hna. Daniel le a hawile kha siangpahrang inn ah rian a pek hna.—Daniel 1:18-20.

Kumhrabu tampi a rauh hnu, a kum 90 leng a si ah Daniel cu siangpahrang inn ah kalpi a si. Babilon uktu Belshazzar nih Daniel kha vanpang ah ruahlopi in a langmi kutbor in ṭialmi ca kha leh dingin a fial. Pathian lamhruainak thawngin Daniel nih Babilon cu Medo-Persia kuttang ah a phan lai tiah a phuan. Babilon cu mah zan bak ah tei a si.—Daniel 5:1, 13-31.

Daniel nih vanpang i kutbor in ṭialmi ca a leh lio.

Atu ah Medo-Persia uknak tangah Daniel cu vuanzi in rian pek a si i a hnuah Siangpahrang Darius nih a sang deuhmi rian pek a timh. (Daniel 6:1-3) Cucaah nahchuahnak a ngeimi bawi hna nih chiandeih khor ah an thlaknak thawngin Daniel kha thah awkah a thli tein an timhtuah, asinain Jehovah nih a rak khamh. (Daniel 6:4-23) Daniel a thih lai ah vancungmi pakhat cu a sinah a lang i “Pathian dawtmi” na si tiah voihnih tiang tha a pek.—Daniel 10:11, 19.

Mah thil sining kong kha hngalhthiam awkah Daniel—A Nunchung Dihlak Zumhnak A Langhter timi ṭhen hnih a ummi Baibal drama kha zoh.

Tuanbia nih Daniel Baibal cauk kong zeidah a langhter?

Daniel ṭialmi: Nebukhadnezzar nih milem nganpi a ser i a mi pawl kha a biakter hna, a bia lomi kha a alh hluahmahmi meiphu chungah paih dingin nawl a pek hna.—Daniel 3:1-6.

Tuanbia langhtermi: Encyclopædia Britannica ningin Nebukhadnezzar nih Babilon ah “amah sunparnak ca lawngah si loin pathian hna sunparnak peknak caah” innsaknak project nganpi kha a tlangtlak tiah a ti. Nebukhadnezzar nih “kei cu ‘a liannganmi pathian pawl mi a biaktertu’ ka si tiah a ti.”

Meiphu chungah thahnak kong kha hlanlio Babilon kong ṭialmi ca ah atu le atu langhter a si. Siangpahrang theng nih meiphu chungah thlak dingin nawl a pekmi hna kong zong a um. Nebukhadnezzar uknak nithla aa ṭialnak hlanlio cauk pakhat ah bawi pawl nih Babilon pathian hna zei an rel lo caah dantat an sinak kong kha a langhter. Mah cauk nih hitin a ti: “Hrawk hna u, khang hna u, em hna u, . . . hut hna u . . . an thih nakhnga mei kha linhter chin u law a khu chuahter chin u.”a

Daniel ṭialmi: Siangpahrang Nebukhadnezzar cu a innsaknak kong he aa tlaiin aa porhlaw.—Daniel 4:29, 30.

Nebukhadnezzar min khenhmi tlakrawh kha Babilon ah hmuh a si

Tuanbia langhtermi: “Hmailei tefa hna nih an hngalh nakhnga ṭialmi Nebukhadnezzar kong kha kan rel tikah . . . Nebukhadnezzar nih amahle amah a dingmi le a ṭhawngmi, a liannganmi siangpahrang in aa ruat ti kha kan hngalh khawh.”b Tahchunhnak ah, Nebukhadnezzar i aa porhlawtnak kha vanpang ah ṭialmi ca pakhat nih hitin a langhter: “Kattazasi le tlakrawh in tlang bantukin thawn khawh lomi vanpang nganpi ka sak . . . Mi nih ka uknak an i cinken zungzal nakhnga Esagila biakinn le Babilon khua kha ka fehter.”c Hlathlaitu hna nih Babilon ah an hmuhmi tlakrawh tampi ah Nebukhadnezzar min kha hmuh a si.

Daniel ṭialmi: Siangpahrang Belshazzar nih Daniel kha “ka pennak chungah hin bawi ngan bik pathumnak” na si lai tiah a ti.—Daniel 5:1, 13-16.

BC 550 lio i cuneiform cylinder hlun pakhat ah Siangpahrang Nabonidus le a fapa Belshazzar kong aa ṭial

Tuanbia langhtermi: Daniel dal 5nak ah langhtermi thil hna a can lioah Nabonidus cu siangpahrang a si. Asinain Nabonidus cu a pen chungah Babilon ah si loin Arabia ah caan tam deuh a um. A um lo karah Babilon ah ahodah uktu a ṭuan? Tuanbialei mifim Raymond Philip Dougherty ṭialmi Nabonidus le Belshazzar timi cauk ah hitin a langhter: “Cuneiform timi hlanlio ca pakhat ah Nabonidus nih a fapa upa bik Belshazzar kha siangpahrang a ṭuanter tiah a langhter. Belshazzar nih a pa, siangpahrang a um lo karah a pa aiawh in uknak rian kha a ṭuan.” Nabonidus le Belshazzar cu ram ah nawlngei bik pakhatnak le pahnihnak an si cang caah Belshazzar nih Daniel kha pathumnak dirhmun a pekmi a si.

a Journal of Biblical Literature, Volume 128, Nambar 2, cahmai 279, 284.

b Irving Finkel le Michael Seymour ṭialmi Babylon—City of Wonders, cahmai 17.

c George Barton ṭialmi Archæology and the Bible, cahmai 479.