Thawhṭhannak Timi Cu Zeidah A Si?
Baibal chimmi
Baibal ah Greek biafang a·naʹsta·sis kha “thawhṭhannak” tiah a leh. Mah cu “thawhṭhan” asiloah “dir ṭhan” timi sullam a ngei. A tho ṭhanmi pakhat cu thihnak in a hung tho lai i a thih hlan bantuk khan a si ṭhan lai.—1 Korin 15:12, 13.
Biakam Hlun tiah auhmi Hebru Baibal ah “thawhṭhannak” timi biafang a um lo nain mah kong he aa tlaiin a chimmi cu a um. Tahchunhnak ah, Job nih hitin a ti: “Mi cu a thih ahcun a nung ṭhan kho lai maw? Cucaah ka rian cu zeitluk in a sau hmanhah ka lung a dong lai lo i Ka luatnak ding cu ka rak hngah ṭheuṭheu ko lai.”—Job 14:13-15; Isaiah 26:19; Daniel 12:2, 13.
Mithi cu khoika ah dah an thawhṭhan lai? Mi cheukhat cu Khrih he siangpahrang ṭuanṭi dingin van ah an tho ṭhan lai. (2 Korin 5:1; Biathlam 5:9, 10) Baibal nih mah kha “mithi thawhter an si a pakhatnak” tiah a auh caah a dang thawhṭhannak a um rih ti kha kan hngalh khawh. (Biathlam 20:6) Mah thawhṭhannak cu vawleicung ah a si lai. Mi tlawmte lawng van ah thawhter an si lai i tam deuh cu vawlei ah thawhter an si lai.—Salm 37:29.
Zeitindah thawhter an si lai? Pathian nih Jesuh kha mithi thawhter khawhnak ṭhawnnak a pek. (Johan 11:25) Jesuh nih “thlan chung i a ummi mithi vialte” kha a nunter ṭhan hna tikah pakhat cio i an sining le cinkennak thluak kha a pek ṭhan hna lai. (Johan 5:28, 29) Van ah thawhter a simi hna cu mit in hmuh khawh lomi thlarau pum in an tho lai. Vawleicung ah thawhter a simi hna cu a ngan a dam i a tlingmi pum in an tho lai.—Isaiah 33:24; 35:5, 6; 1 Korin 15:42-44, 50.
Ahote dah a tho ṭhan lai? Baibal nih “miṭha he, miṭhalo he thihnak in kan tho ṭhan dih lai” tiah a ti. (Lamkaltu 24:15) Miṭha timi ah Noah, Sarah le Abraham ti bantuk zumhfekmi hna an i tel. (Genesis 6:9; Hebru 11:11; Jeim 2:21) Miṭhalo timi ah Pathian phunglam cawn awk le zulh awkah caanṭha hmu loin a thimi hna an i tel.
Asinain sualnak a tuah i a nunning aa thleng lomi hna cu an tho ṭhan ti lai lo. Cu bantuk mi hna cu an thih tikah zungzal in hrawh an si i thawhṭhannak ruahchannak an ngei lo.—Matthai 23:33; Hebru 10:26, 27.
Zeitik ah dah thawhter an si lai? Van ah a tho ṭhan dingmi hna cu 1914 in aa thawkmi, Khrih a rat caan chungah an tho lai tiah Baibal nih a chimchung. (1 Korin 15:21-23) Vawleicung ah a tho ṭhan dingmi hna cu Jesuh Khrih Kum Thongkhat Uknak chungah an tho ṭhan lai. Mah tikah vawlei pumpi cu aa dawh tukmi Paradis ah a cang ṭhan lai.—Luka 23:43; Biathlam 20:6, 12, 13.
Zeicah thawhṭhannak cu zumh awk a tlak? Baibal nih mit in hmuhmi a thoṭhanmi minung pakua kong kha a dikthiar in a chim. (1 Siangpahrang 17:17-24; 2 Siangpahrang 4:32-37; 13:20, 21; Luka 7:11-17; 8:40-56; Johan 11:38-44; Lamkaltu 9:36-42; Lamkaltu 20:7-12; 1 Korin 15:3-6) Jesuh nih Lazaruh a thawhtermi cu a hleiin cinken awk tlak a si. A thihnak in nili hnuah mibu hmaiah Jesuh nih khuaruahhar lam in a thawhter. (Johan 11:39, 42) Jesuh a ralchanhtu hna hmanh nih mah kha an al kho lo. Cucaah Jesuh le Lazaruh kha thah ding hmanhin khua an khan.—Johan 11:47, 53; 12:9-11.
Pathian nih mithi a thawhter khawh hna i thawhter zong a duh hna ti kha Baibal nih a langhter. Pathian nih ri a ngei lomi cinkennak a thluak chungah thawhter a duhmi hna i an konglam a dikthliar kha aa cinken. Annih kha a ṭhawnnak hmangin a thawhter ṭhan hna lai. (Job 37:23; Matthai 10:30; Luka 20:37, 38) Pathian nih mithi kha a thawhter khawh hna i thawhter zong a duh hna. Hmailei thawhṭhannak kong Baibal nih a chim tikah Pathian kong he aa tlaiin hitin a ti: “Na kut tuahmi thil cu hmuh na ka duh lai.”—Job 14:15.
Thawhṭhannak he aa tlaiin a hmaan lomi ruahnak hna
A hmaan lomi ruahnak: Thawhṭhannak timi cu pum le thlarau aa fonh ṭhanmi kha a si.
A hmaanmi: Baibal ningin mi pakhat cu a thih tikah a um ti lo, a thi kho lomi thlarau zong a um lo. (Phungchimtu 9:5, 10) Cucaah mi pakhat a thawhṭhan tikah pum le thlarau fonh ṭhanmi kha a si lo. Pathian nih a thar in a ser ṭhanmi a si.
A hmaan lomi ruahnak: Mi cheukhat cu an thawhle cangka in hrawh ṭhan colh an si lai.
A hmaanmi: Baibal nih “ṭhatlonak a tuahmi kha an tho ve lai i sualphawt an si lai” tiah a ti. (Johan 5:29) Asinain an thih hlan i an rak tuahmi cungah si loin an thawhṭhan hnu i an tuahmi thil cungah i hngat in biaceih an si lai. Jesuh nih hitin a ti: “Biatak kaan chimh hna, mithi nih Pathian Fapa aw an theih i a thimi paoh an nun lainak caan kha a ra lio i a phan cang.” (Johan 5:25) An thawhṭhan hnuah an cawnmi kong ‘a theimi’ asiloah a zulmi hna cu “nunnak cauk” chungah an min khumh a si lai.—Biathlam 20:12, 13.
A hmaan lomi ruahnak: An thawhṭhan tikah a hmasa an pum thengte in an tho ṭhan lai.
A hmaanmi: Mi pakhat a thih tikah a pum cu duhsah tein a rawk i a tlau.—Phungchimtu 3:19, 20.