Nunning le Rianṭuannak Tuahchunhnak Cauk caah Cherhchanmi
© 2022 Watch Tower Bible and Tract Society of Pennsylvania
MARCH 6-12
BAIBAL AH THUHMI RO HNA | 1 CHANRELNAK 23-26
“Biakinn Ah I Pumhnak Cu Ṭha Tein Dirh A Hung Si”
it-2-E 241
Levi mi
David nih a uk hna lioah Levi mi hna rian cu ṭha tein dirh a si. David nih hruaitu, nawlngeitu, biaceihtu, kutka cawngtu, chawhlawn zohkhenhtu in rian a pek hna. Cu lengah pekchanhnak, raithawinak, thianternak, cuai thlainak, thil tahnak le a dangdang thil zohkhenhnak rian he aa tlaiin biakinn, biakinn tual le innchung dal hna ah tlangbawi pawl a bawmtu dingah mi tampi kha rian a pek hna. Tlangbawi pawl ṭhen an si bantukin Levi mi awdawh tumtu hna zong phu 24 in dirh an si i anmah le caan ah aa changchang tein an ṭuan. An rian kha camcawh fung zuh in bia an khiah. Kutka cawngtu phu hna zong nih kutka cawnghnak rian kha cutin an i thim ve.—1 Chan. 23, 25, 26; 2 Chan. 35:3-5, 10.
it-2-E 686
Tlangbawi
Biakinn ah rian a ṭuanmi tlangbawi pawl cu nawlngeitu tampi nih an tlangtlak hna. Rian cheukhat pek an si tikah camcawh fung an zuh. Phu 24 chungin pakhat cio cu voikhat ah zarhkhat cio in an ṭuan i kum khat ah voihnih rian pek an si. Biakinn pekchanhnak puai ah an rak tuah bantukin mi nih raithawinak a thong in an pekchanh tawnnak puai tuah caan hna ah cun tlangbawi dihlak in an ṭuan lai ti cu a fiang ko. (1 Chan. 24:1-18, 31; 2 Chan. 5:11; cun 2 Chan. 29:31-35; 30:23-25; 35:10-19 he tahchunh.) Tlangbawi pakhat cu camcawh fung zuh in rian pekmi tlangbawi hna caah dawnkhantu a si lo chung poah cu caan dang zongah rian a ṭuan khawh. Rabbi nunphung ningin Jesuh chan lioah tlangbawi cu an tam tuk, cucaah zarhkhat chung ṭuanmi rian kha chungkhar kip cio in an i ṭhen i pakhat cio nih an milu ningin nikhat asiloah nikhatnak tam an ṭuan.
it-2-E 451-452
Awdawh Tumnak
Jehovah biakinn caah timhlamhnak hna he aa tlaiin David nih awdawh tumnaklei rian a ṭuantu Levi mi 4000 a thim hna. (1 Chan. 23:4, 5) An lak i 288 cu “BAWIPA thangṭhatnak hlasak i cawnpiakmi, a thiammi vialte” fonhmi an si. (1 Chan. 25:7) Mah timhtuahnak vialte cu awdawh tum a thiammi, mi pathum Asaph, Heman le Jeduthun (Ethan ti zongin auhmi) hruainak tangah an um. Mah pa pakhat cio cu Levi fapa pathum Gershom, Kohath le Merari hrinsor an si caah Levi chungkhar hruaitu pathum nih biakinn i awdawh tumnak phu kha an aiawh. (1 Chan. 6:16, 31-33, 39-44; 25:1-6) Mah pa pathum hna i an fapa dihlak cu 24 an si i a hmasa ah langhtermi awdawh tum a thiammi 288 ah an i tel ve. Mah an fapale pakhat cio cu awdawh a tumtu phu pakhat cio i hruaitu in camcawhfung zuh in rian pek an si. Pakhat cio i an lamhruainak tangah a dang awdawh tum “a thiammi” 11 cio an um i annih cu an fapa hna asiloah a dang Levi mi lakin thimmi an si. Mah Levi mi awdawh tum a thiammi 288 ([1 + 11] × 24 = 288) cu tlangbawi hna bantukin phu 24 in ṭhen an si. A tangmi ‘cawnpiakmi’ 3,712 kha ṭhen a si ahcun phu 24 cio ah mi 155 hrawng an um lai. Cucaah awdawh tum a thiammi pakhat cio sinah awdawh tum thiamnak a cawngmi Levi mi 13 hrawng an um lai tinak a si. (1 Chan. 25:1-31) Muko tumtu cu tlangbawi an si caah annih zong Levi mi awdawh tum a thiammi ah an i tel ve lai.—2 Chan. 5:12; Nam. 10:8 he tahchunh.
it-1-E 898
Kutka Cawngtu
Biakinn ah. Siangpahrang David nih a thih lai ah kutka cawngtu 4,000 i telin Levi mi le biakinn rianṭuantu ding kha a dirh hna. Annih cu an phu ningin voikhat ah nisarih chung an cawngh lai. Jehovah inn hngah awk le amahle caan ah innka aa awng maw asiloah aa khar maw ti zoh awkah rian an ngei. (1 Chan. 9:23-27; 23:1-6) Biakinn an cawngh lengah biakinn caah mi nih thawhlawm an pekmi zong kha an zohkhenh. (2 Si. 12:9; 22:4) A hnuah Jehoiada nih siangpahrang in Jehoash chiti a thuh tikah Jehoash kha uknak a chuttu siangpahrangnu Athaliah kut in huhphenh awkah kutka cawngtu pawl kha rian a pek hna. (2 Si. 11:4-8) Siangpahrang Josiah nih siasal biaknak a hrawh tikah Baal biaknak ah hmanmi umkheng vialte biakinn chungin chuah dih awkah kutka cawngtu hna nih an rak bawmh. Mah kha khua lengah an khangh hna.—2 Si. 23:4.
Thlaraulei Lungvar Hna
A Hmaanmi Biaknak Nih Naa Lawmhnak A Karhter Lai
10 Hla kan saknak thawngin Jehovah kha kan biak. (Salm 28:7) Israel mi nih hlasaknak kha biaknak ah a biapi tukmi pakhat in an hmuh. Siangpahrang David nih Levi mi 288 kha biakinn ah hlasatu in rian a pek hna. (1 Chan. 25:1, 6-8) Tuchan ah thangṭhatnak hla kan saknak thawngin Pathian kan dawtnak kha kan langhter khawh. Kan aw a ṭhat, a chiat cu a biapimi a si lo. Mah tahchunhnak hi ruathmanh: Bia kan chim tikah “kan dihlak hin palhnak kan tuah cio tawn,” asinain mah nih Khrihfabu le phungchimnak ah biachim loin a kan umter lo. (Jeim 3:2) Cu bantukin kan aw a ṭhat lo hmanhah Jehovah thangṭhatnak hla saknak kha kan i dawnhter awk a si lo.
MARCH 13-19
BAIBAL AH THUHMI RO HNA | 1 CHANRELNAK 27-29
“Pa Pakhat Nih Dawtnak He A Fapa A Chimhhrinnak”
Khrihfa Kan Sinak Kilvennak
9 Nangmah theng nih Baibal Biatak a hmaan kha langhter. Jehovah sal sinak langhter duhnak lungthin hi Baibal hngalhnak cungah fek tein hram aa sih lo ahcun mah lungthin kha a der kho. (Filipi 1:9, 10) Khrihfa tar, no zapi nih ka zumhmi hi Baibal chungah hmuhmi biatak a si ti kha mah theng lungsi tiangin langhter a hau. Paul nih zumtukhat hna kha ‘zeizong vialte kha hneksak dih hna u: a ṭhami kha i chiah [“i tlaih,” NW] u’ tiah a rak forh hna. (1 Thesalon 5:21) Pathian a ṭihmi Khrihfa innchungkhar i mino pawl nih nulepa zumhnak i bochan a ngah lo ti kha an hngalh awk a si. A pa David nih Solomon kha “na pa i a Pathian hi hngal law lung ṭengnge lo te [in] . . . a rian ṭuan tuah” tiah a rak forh. (1 Chanrelnak 28:9) Mino Solomon nih Jehovah cungah a pa nih zeitindah zumhnak a ngeih ti zoh men in a rak za lai lo. Amah theng nih Jehovah kha a hngalh khawh nakhnga tuah a herh i cutin a rak tuah. Pathian kha “hi miphun hmai i chuahnak ca le luhnak caah hin fimnak le hngalhnak ka pe tuah” tiah a rak nawlpat.—2 Chanrelnak 1:10.
Lung Ṭengnge Lo Tein Jehovah Rian Ṭuan Zungzal
13 I cawn ding zei a si cu a fiang ko. Jehovah rian lung ṭengnge lo tein ṭuan ti tikah hmaan tein i pumh le phungchim vah lawng hi a si lo. (2 Chan. 25:1, 2, 27) Khrihfa pakhat cu a lung ah hnulei thil a simi hi vawlei nunning kong a um peng ahcun Jehovah he an i pehtlaihnak a hnorsuan khawh. Cucaah lungthin dihlak in Pathian rian ṭuan khawh awkah “thil ṭhalo kha hua” in “thil ṭha kha i tlaih peng” a hau. (Rom 12:9; Luka 9:62) Satan vawlei ah a ummi thil cheukhat cu man a ngeimi asiloah duh a nungmi a lawh hmanh ah, mah thil ruang ah lungthin dihlak in Pathian rian ṭuan kan ngol awk a si lo.—2 Kor. 11:14; Filipi 3:13, 14 rel.
“Ralṭha Ngaiin Um Law Ṭuan Tuah”
20 Siangpahrang David nih Solomon kha biakinn sak na dih tiang Jehovah nih aan umpi lai tiah aamah a khan. (1 Chan. 28:20) Solomon nih mah bia kha aa cinken i ngakchia a sinak le hmuhtonnak a ngeih rih lonak kha dawnkhantu a siter lo. Ralṭhatnak kha a langhter i Jehovah bawmhnak thawngin rumra a ngei tukmi biakinn kha kum sarih le a cheu ah a rak liim.
21 Jehovah nih Solomon a rak bawmh bantukin kanmah zong kan chungkhar le Khrihfabu ah ralṭhatnak ngeih awk le kan rian liim awkah a kan bawmh khawh. (Isa. 41:10, 13) Jehovah kha ralṭha tein kan biak ahcun atu ah le hmailei ah thluachuah a kan pek lai ti kha kan zumh khawh. Cucaah “ralṭha ngaiin um law ṭuan tuah.”
Thlaraulei Lungvar Hna
w17.03-BU 29 ¶6-7
Hawikom Sinak A Cahter Khomi Sining Ah Hawikom Ṭha Sinak
David nih harnak caan ah amahlei a ṭangmi hawikom a ngei. Pakhat cu Baibal nih “David Hawi” tiah a langhtermi Hushai a si. (2 Sam. 16:16; 1 Chan. 27:33) Anih cu siangpahrang hawikom ṭha le siangpahrang inn ah bawi a si i a caan ah biathli kongkau kha amah nih a tawnghtham tawn.
David fapa Absalom nih siangpahrang sinak a chuh hnik lioah Israel mi tampi cu Absalom lei ah an ṭang nain Hushai tu cu cutin a si lo. Hushai nih David kha a tliknak ah a rak zulh. A fapa le a zumhmi cheukhat nih an rawi caah David cu a ngaih a chia tuk. Asinain Hushai nih a nunnak hmanh pek ngamh in a thli tein khua an khanmi hrawh ding rian kha a cohlannak thawngin zumhawktlak tein a rak um. Siangpahrang inn i bawi pakhat in rian a ngeih caah Hushai nih cutin a tuahmi a si lo. Zumhawktlakmi hawikom ṭha a si ruangah a si.—2 Sam. 15:13-17, 32-37; 16:15–17:16.
MARCH 20-26
BAIBAL AH THUHMI RO HNA | 2 CHANRELNAK 1-4
“Siangpahrang Solomon Nih Hrut Ngaiin Biakhiahnak A Tuah”
it-1-E 174 ¶5
Ralkap
Solomon nih a pen chungah Israel ralkapbu kong ah tuanbia thar ṭial a si. A pennak cu a dai ko nain rang le rangleng hna kha a pumh hna. Rang a tam deuh cu Izipt sinin a cawkmi an si. Mah raltuknak rang le rangleng thar pawl chiahnak caah a ram chungah khuapi kha a dirh hna. (1 Siang. 4:26; 9:19; 10:26, 29; 2 Chan. 1:14-17) Asinain Solomon nih cutin a tuahmi cungah Jehovah nih thluachuah a pe bal lo, a thih hnu i a pennak aa ṭhen tikah Israel ralkapbu cu an hung der. A hnuah Isaiah nih hitin a ti: “Bawmhnak hal awkah Izipt i a vung kalmi cu an lo cang. An i bochanmi cu Izipt ṭhawnnak kha a si—a rangtum hna le a rangleng hna le a ralkap hna kha an si. Sihmanhsehlaw BAWIPA, Israel Pathian Thiang kha cu an i bochan lo, bawmhnak zong an hal duh lo.”—Isa. 31:1.
it-1-E 427
Rangleng
Solomon chan hlanah Israel ram ah raltuknak rangleng tampi an ngei bal lo. An ram humhimnak cu rang cungah aa hngatmi a lawh nakhnga lo rang kha tam tuk i chiah lo awkah Pathian nih siangpahrang kha ralrin a rak pek hna caah a si. Rang cu raltuknak leng ah an hman tawn hna caah mah khenkhamnak nih rangleng hmannak kha ri a ngeihter. (Deut. 17:16) Minung siangpahrang nih mi cungah harnak an chuahter lainak kong he aa tlaiin Samuel nih ralrin a pek hna lioah hitin a ti: “Nan fapa kha a lak hna lai i a rangleng cittu . . . dingah a chiah hna lai.” (1 Sam. 8:11) Absalom le Adonijah nih siangpahrang sinak chuh dingin an i zuam lioah anmah caah rangleng le a hmai tlitu dingah minung 50 an i chiah hna. (2 Sam. 15:1; 1 Si. 1:5) David nih Zobah siangpahrang a tei tikah rangleng 100 ca i a za dingmi rang hna kha cu a that hna lo.—2 Sam. 8:3, 4; 10:18.
Siangpahrang Solomon nih Israel ralkapbu a dirh lioah rangleng 1,400 tiang kha a karhter. (1 Si. 10:26, 29; 2 Chan. 1:14, 17) Jerusalem khua lawng si loin rangleng chiahnak khua tiah hngalhmi a dang khua hna zongah a hleiin raltuknak thilri zohkhenhnak hmun hna a um.—1 Si. 9:19, 22; 2 Chan. 8:6, 9; 9:25.
Thlaraulei Lungvar Hna
w05-BU 12/1 19 ¶6
Chanrelnak Pahnihnak Chungin Hrilhfiah
1:11, 12. Jehovah sinah Solomon halmi nih fimnak le hngalhnak ngeih a duh taktak ti kha a langhter. Kan thlacamnak nih kan lungchung ah a ummi kha a langhter. Cucaah kan thlacamnak ah aa telmi kong hna ṭha tein dothlat cu fim a si.
MARCH 27–APRIL 2
BAIBAL AH THUHMI RO HNA | 2 CHANRELNAK 5-7
“Ka Lungthin Cu Cuka Ah A Um Zungzal Lai”
w02-BU 11/15 5 ¶1
Hmunkhat Ah I Pumhṭi Kha Ngol Hlah
A hnuah David nih Jerusalem in a pen lioah Jehovah sunparnak caah inn sak kha a rak duh. Asinain David cu ralkap pakhat a rak si caah Jehovah nih hitin a ti: “Ka min thangṭhatnak caah inn na sa lai lo.” Mah canah biakinn sak awkah David fapa Solomon kha a rak thim. (1 Chanrelnak 22:6-10) Mah biakinn kha kum sarih le cheu chung a sak hnuah Solomon nih BC 1026 ah biakinn pekchanhnak a tuah. Jehovah nih mah biakinn a cohlan kha hitin a langhter: “Ka hmai i na thlacamnak le na ka nawlnak vialte cu ka theih cang, hi na sakmi inn hi ka thianter cang i zungzal ca in a chungah ka min ka chiah cang, ka mit le ka lung cu khika ah an um camcin lai.” (1 Siangpahrang 9:3) Israel mi zumhfek tein an um chung paoh cu Jehovah nih mah biakinn kha mithmai ṭha a pek lai. Asinain a hmaanmi lam in an pial ahcun Jehovah nih mithmai ṭha a pekmi kha a lak ṭhan lai i ‘mah inn cu a rawkmi thil pon ah a cang lai.’—1 Siangpahrang 9:4-9; 2 Chanrelnak 7:16, 19, 20.
it-2-E 1077-1078
Biakinn
Tuanbia. Mah biakinn cu Siangpahrang Nebukhadnezzar kuttang i Babilon ralkap nih an hrawh hlan BC 607 tiang a rak um rih. (2 Si. 25:9; 2 Chan. 36:19; Jer. 52:13) Israel mi cu a hmaan lomi biaknaklei ah an pial caah Pathian nih Judah le Jerusalem doh awk le a caan ah biakinn thilri pawl fir awkah miphun dang kha nawl a awnh hna. Biakinn zong caan tlawmpal chung daihthlanh a rak si. Izipt Siangpahrang Shishak nih Biakinn pekchanh a si in kum 33 hrawng a rauh hnu, Solomon fapa Rehoboam chan (BC 993) ah Biakinn rothil hna kha a rak lak. (1 Si. 14:25, 26; 2 Chan. 12:9) Siangpahrang Asa (BC 977-937) nih Jehovah inn kha a upat. Asinain Jerusalem kilven awk ca le Siria Siangpahrang Ben-hadad I nih Israel siangpahrang Baasha he a sermi biakamnak a hrawh nakhnga caah Ben-hadad I kha biakinn rothil a simi sui le ngun kha hrut ngaiin ziknawh a rak pek.—1 Si. 15:18, 19; 2 Chan. 15:17, 18; 16:2, 3.
Thlaraulei Lungvar Hna
w10-BU 12/1 11 ¶7
“Minung Lungthin A Hngalmi” Pathian
Solomon thlacamnak in hnemhnak kan hmu kho. Kan inmi “hremnak” le “ngaihchiatnak” hna kha ahohmanh nih a dikthliar in a kan hngalhthiampiak kho lai lo. (Phungthlukbia 14:10) Asinain Jehovah nih kan lungthin kha a hngalh i kan cungah zawnruahnak taktak a ngei. Pathian sinah kan intuarnak kha phuang in thla kan cam ahcun kan thilrit cu a zaang deuh lai. Baibal nih “amah nih aan zohkhenh hna caah nan lungretheihnak vialte kha amah cungah chia dih ko u” tiah a ti.—1 Peter 5:7.
APRIL 10-16
BAIBAL AH THUHMI RO HNA | 2 CHANRELNAK 8-9
“Fimnak Kha A Sunsak”
w99-BU 11/1 20 ¶4
Siannak Tampi Langhter Tikah
Sheba siangpahrangnu cu Solomon sin rat awkah a caan le thazaang tampi a pek a hau lai. Sheba ram cu tuchan i Republic of Yemen ah um dawh a si. Cucaah mah siangpahrangnu cu kalauk hna he Jerusalem ah meng 1,000, [1,600 km] leng hrawng a rak kal men lai. Jesuh nih a chim bantukin “anih cu lamhla piin a ra.” Sheba siangpahrangnu cu mah tluk a harmi lam ah zeicah a kal? A bik in cun “Solomon fimnak bia ngaih duh ah” a si.—Luka 11:31.
w99-BU 7/1 30 ¶4-5
Laksawng Tampi A Hmuhtermi I Tonnak
Zeitin a si hmanhah siangpahrangnu cu “mizul tampi he, zihmui a phormi kalauk hna le sui tampi le lungvar hna he” Jerusalem ah a phan. (1 Siangpahrang 10:2a) Mi cheukhat nih “mizul tampi” timi ah hriamtlaimi phu an i tel tiah an ti. Siangpahrangnu cu nawl a ngei tukmi pakhat a si i dollar nuai tampi man a simi thil mansung hna he khual a tlawnmi a si caah cutin aa chiahmi hna cu aa tlakmi a si ko.
Asinain mah siangpahrangnu nih Solomon minthannak kong kha “BAWIPA min kong” he pehtlai in a theih ti kha i cinken. Cucaah mah cu chawlehnaklei in tlawnnak a si lo. Siangpahrangnu cu a hleiin Solomon fimnak le a Pathian Jehovah kong theih a duh caah a ratmi a si ti cu a fiang ko. Anih cu Jehovah a biami Shem asiloah Ham tefa si dawh a si caah a pupa hna i biaknak kong kha hngalh a duh tuk ko lai.
w99-BU 7/1 30-31
Laksawng Tampi A Hmuhtermi I Tonnak
Sheba siangpahrangnu cu Solomon fimnak le a ram rumnak nih a lung a suk tuk i “a chungah thlarau a taang ti lo.” (1 Siangpahrang 10:4, 5) Mi cheukhat nih mah biafang rual cu “a ar” ti sullam a ngei tiah an ruah. Mifim pakhat nih siangpahrang nu cu a lung a mit ti hmanhin a langhter! Zeitin a si hmanhah siangpahrangnu cu a theihmi le a hmuhmi thil hna cungah a khuaruah a har tuk. Solomon fimnak kong a theimi a salle cu mi vanṭha an si tiah a ti hnuah Solomon siangpahrang a sitertu Jehovah kha a thangṭhat. Cun siangpahrang kha a man a sungmi laksawng hna kha a pek i sui phunkhat lawng hmanhah tuchan tangka in cun dollar nuai 40 hrawng a si. Solomon zong nih laksawng tampi a pek i siangpahrangnu nih “a duhmi vialte, . . . a halmi vialte kha a pek dih.”— 1 Siangpahrang 10:6-13.
it-2-E 990-991
Solomon
Siangpahrangnu nih biakinn le Solomon inn a sunparnak, a cabuai i rawl, a sinum hna nih mi an tuammuai hna ning le an hnipuan, cun BAWIPA inn i hmaan tein pekchanhmi khanghthawinak hna kha a hmuh tikah “a chungah thlarau a taang ti lo.” Cucaah “zohhmanh, a cheu hmanh an rak ka chimh ṭung lo. na fimnak le na rumnak nih ka rak theihmi bia cu a lonh diam” tiah a ti. Cun siangpahrang ca i rian a ṭuanmi a salle cu an van a ṭha tuk tiah a ti. Mah thil vialte nih ding te le hmaan tein biaceih awkah Solomon kha siangpahrang in a thimnak thawngin Israel cungah dawtnak a langhtermi Jehovah Pathian kha thangṭhat awk le lawmh awkah a forh.—1 Si. 10:4-9; 2 Chan. 9:3-8.
Thlaraulei Lungvar Hna
it-2-E 1097
Bawiṭhutdan
Solomon sermi bawiṭhutdan lawng hi Israel uktu bawiṭhutdan kong a dikthliar in a langhtermi a si. (1 Si. 10:18-20; 2 Chan. 9:17-19) Mah cu Jerusalem khua i Moriah Tlanglei hoih ah a ummi inn, “Bawiṭhutdan Khaan” ah um dawh a si. (1 Si. 7:7) Mah cu ‘vuiho bawiṭhutdan nganpi, a thiang bikmi sui in hutmi a si, a hnulei kap ah cawfa lu a um i baan chiahnak an um.’ Vuiho cu mah siangpahrang ṭhutdan sernak caah a hrampi thilri a si men lai nain biakinn ah a bik in hmanmi innsak ning nih mah cu thing in tuahmi a si i sui thiang in hutmi le vuiho tampi in ṭamhmi a si ti kha a langhter. Hlathlaitu hna caah cun mah bawiṭhutdan cu a dihlak in vuiho le sui in sermi a lo men lai. Bawiṭhutdan lei kainak lamhbak paruk kong a chim hnuah hitin a ti: “Baan chiahnak pawng veve ahcun chiandeih pahnih an dir; lamhbak kam kip ah khan a lamhbak paruk in, chiandeih hleihnih an dir.” (2 Chan. 9:17-19) Chiandeih nih uktu nawlngeihnak a langhtermi cu aa tlak tukmi a si. (Gen. 49:9, 10; Biat. 5:5) Chiandeih 12 cu Israel phun 12 he pehtlaih dawh a si i bawiṭhutdan cungah a ṭhumi uktu a nawl an ngaih le an bawmh kha a langhter duhmi a si kho men. Sui in sermi kedan cu bawiṭhutdan ah an i peh. Rumra a ngei i a hmai ah chiandeih zuk a ummi mah vuiho le sui in sermi bawiṭhutdan cu mah lio caan i hlathlaitu hna nih an hmuhmi siseh, philhlonak lungphun le lungca ah ṭialmi siseh zei bantuk bawiṭhutdan nakhmanh in aa thleidang deuh ti kha a langhter. Chanrelnak a ṭialtu nih a langhter bantukin “cu bantuk cu khuazei ram hmanhah an ser bal lo.”—2 Chan. 9:19.
APRIL 17-23
BAIBAL AH THUHMI RO HNA | 2 CHANRELNAK 10-12
“A Ṭhami Ruahnak Cheuhnak In Hmuhmi Ṭhathnemhnak”
Pathian Mithmai Ṭha A Hmu Kho
Rehoboam cu a harmi thimnak tuah awk a ngei. Mi nih tuahter an duhmi kha a tuah ahcun amah le a chungkhar, cun siangpahrang inn ah a ummi hna nih an hmuh tawnmi nunnuamhnak cheukhat kha an hmu ti men lai lo. Asinain an duhnak kha a zulh hna lo ahcun an ralchanh lai. Mah tikah zeidah a tuah? A pa a rak bawm tawnmi, kum upa pawl kha ruahnak a hal hmasa hna. Annih nih mi pawl duhnak zulh awkah ruahnak an cheuh. Asinain Rehoboam nih a ṭhikhat pawl kha ruahnak a hal hna i a mi pawl kha hrem awkah bia a khiah. Hitin a ti hna: “Ka pa nih nan seihnam cu a rak rihter ko, sihmanhsehlaw nan seihnam ka rihter chin lai; ka pa nih fungfek in aan chimhhrin hna, sihmanhsehlaw kei nih cun tlang ngaikuang in kaan chimhhrin hna lai.”—2 Chan. 10:6-14.
w01-BU 9/1 29
A Ṭhami Biakhiahnak Tuah Khawh Ning
Biakhiahnak tuah tikah ruahnak kan hal khawhmi, Khrihfabu i nutling, patling hna kha Jehovah nih a kan pek. (Efesa 4:11, 12) Asinain ruahnak kan hal tikah theih an duhmi kong a chimtu an hmuh hna hlan tiang pakhat hnu pakhat in a fuhpanhmi hna bantuk kan si awk a si lo. Annih nih theih an duhmi ruahnak cheuhnak a petu i a chimmi lawng kha an zulh. Ralrin petu a simi Rehoboam kong kha kan i cinken awk a si. A biapimi biakhiahnak tuah a herh tikah a pa rian a rak ṭuanmi upa pawl sinin a ṭha tukmi ruahnak cheuhnak a hmu. Asinain an pekmi ruahnak cheuhnak kha zul loin amah he a ṭhangṭimi a no deuhmi kha ruahnak a hal hna. A no deuh pawl i ruahnak cheuhnak kha a zulh caah a ṭhalomi biakhiahnak a rak tuah i a phichuak cu a ram i hmun tampi kha a rak sung.—1 Siangpahrang 12:1-17.
Ruahnak cheuhnak na hal hna tikah hmuhtonnak tam a ngeimi, Baibal hngalhnak a ngeimi le a dingmi phunglam a upatmi kha hal hna. (Phungthlukbia 1:5; 11:14; 13:20) A si khawh tik paohah aa pehtlaimi phunglam le hlathlainak na tuahmi a konglam hna kha a caan pe in ruat. Thil sining kha Jehovah Bia ceunak ningin na hun hmuh tikah a ṭhami biakhiahnak kha na tuah khawh deuh lai.—Filipi 4:6, 7.
it-2-E 768 ¶1
Rehoboam
Rehoboam ngeihmi porhlawtnak le ruamkainak lungput nih mi tampi kha a ṭhen cheuter dih hna. David chungkhar a bawmmi cu Judah le Benjamin phun lawng an si cang. Cun Pennak pahnih i tlangbawi le Levi mi hna i telin phun hra hna chungin mi cheukhat zong nih an bawmh ve.—1 Si. 12:16, 17; 2 Chan. 10:16, 17; 11:13, 14, 16.
Thlaraulei Lungvar Hna
Pathian Mithmai Ṭha A Hmu Kho
Rehoboam caah Jehovah nawlngaih cu a fawi maw? Mi nih an siangpahrang thar kha zeitindah an hmuh? Rehoboam nih “tlang ngaikuang in” dan kaan tat hna lai tiah a ti hna nain ralchanhnak ruangah atu cu zeihmanh a tuah kho lo. (2 Chanrelnak 13:7 he tahchunh.) Mi nih zeitin an hmuh hmanhah siangpahrang le a ralkap hna nih “BAWIPA bia cu an ngaih i BAWIPA bia bangin an inn cio ah an kir ṭhan.”
Mah in zeidah kan cawn khawh? Mi nih an kan nihsawh hmanhah Pathian nawlngaih cu fim a si ti kha a si. A nawl kan ngaih ahcun Pathian nih thluachuah a kan pek zungzal lai.—Deut. 28:2.
Rehoboam cu a nawlngaihnak ruangah thluachuah a hmu maw? Rehoboam cu Judah le Benjamin miphun i siangpahrang a si rih i khua thar sak awkah bia a khiah. Khuapi cheukhat zong kha “khua fek ngaingai ah a ser hna.” (2 Chan. 11:5-12) A biapi deuhmi cu caan caankhat chung Jehovah nawlbia kha a zulh. Phunhra pennak i mi hna nih siasal an hun biak caah mi tampi cu Rehoboam le a hmaanmi biaknak bawmh awkah Jerusalem ah an kal. (2 Chan. 11:16, 17) Rehoboam nih Jehovah nawl a ngaih caah a pennak cu a hung ṭhawng thluahmah.
APRIL 24-30
BAIBAL AH THUHMI RO HNA | 2 CHANRELNAK 13-16
“Jehovah Kha I Bochan—Zeitik Ah?”
Tlangval Hna—Midang Sinin Zeitindah Zumhnak Nan Hmuh Khawh?
12 Siangpahrang Asa cu aa toidormi le a ral a ṭhami mino pakhat a rak si. Tahchunhnak ah, a pa Abijah a thih hnuah Asa cu siangpahrang a hung si i an ram ah a ummi siasal vialte kha a hrawh dih hna. Judah mi pawl kha “an pupa hna Pathian kha kawl awkah le phungbia le Nawlbia kha zulh awkah nawl a pek hna.” (2 Chan. 14:1-7) Cun Ethiopia mi Zerah nih Judah mi doh awkah ralkap 1,000,000 he an rat tikah Asa nih Jehovah sinah hitin bawmhnak a rak hal: “Maw BAWIPA, a ṭhawngmi le a dermi karlak ah, bawmtu nangmah bantuk ahohmanh an um lo. Maw BAWIPA kan Pathian, kan bawm ko sawh, zeitintiah nangmah kha kan in bochan.” Asa nih Jehovah nih amah le a mi pawl a khamh hna lai ti a zumh kha mah aa dawh tukmi bia nih a langhter. Asa nih vancung a Pa kha aa bochan i ‘Bawipa nih Ethiopia mi hna kha a tei hna.’—2 Chan. 14:8-12.
Tlangval Hna—Midang Sinin Zeitindah Zumhnak Nan Hmuh Khawh?
13 Ralkap 1,000,000 nih an rak doh tikah Asa nih a rak ṭih tuk lai ti cu a fiang ko. Asinain Jehovah kha aa bochan caah a hlawh a rak tling. Asinain ngaihchiat awk ngai a simi cu a dang buaibainak a ton tikah Asa nih Jehovah kha a rak i bochan ti lo. Israel Siangpahrang Baasha nih a tlerhkhonh tikah Asa nih Siria siangpahrang sin tu ah bawmhnak a rak hal. Mah biakhiahnak nih thil ṭhalo a rak chuahter. Profet Hanani hmangin Jehovah nih Asa kha hitin a ti: “Siria siangpahrang cu naa bochan i BAWIPA na Pathian cu naa bochan lo caah, Siria siangpahrang ralkapbu cu na chuahter cang hna.” Mah caan thawkin Asa cu atu le atu dohnak a rak tong. (2 Chan. 16:7, 9; 1 Si. 15:32) Mah in zeidah kan cawn khawh?
Tlangval Hna—Midang Sinin Zeitindah Zumhnak Nan Hmuh Khawh?
14 Toidornak ngeih peng le Jehovah i bochan peng a hau. Tipil na in tikah zumhnak na ngeih le Jehovah naa bochan kha na langhtermi a si. Jehovah nih a chungkhar mi pakhat in lunglawm tein aan conglawmh. Cucaah atu ah na tuah a herhmi cu Jehovah i bochan peng kha a si. A biapimi biakhiahnak na tuah tikah Jehovah i bochan cu a fawimi a lo men lai nain a dang caan ah tah zeitin? Nuamhsaihnak kong, vawlei rian kong le na hmuitinh kong he aa tlaiin biakhiahnak na tuah tikah Jehovah i bochan cu a biapi tukmi a si. Nangmah fimnak kha i bochan hlah. Mah canah na sining kong he aa tlaiin Baibal phunglam kha kawl law mah lamhruainak ningin zul. (Ptb. 3:5, 6) Cutin na tuah ahcun Jehovah lung na lawmhter lai i nan Khrihfabu chung i unau pawl zong nih an in upat lai.—1 Timote 4:12 rel.
Thlaraulei Lungvar Hna
Na Lungthin Dihlak in Jehovah Bia
7 Lungthin dihlak in Jehovah kan biak le biak lo kha zeitindah kan hngalh khawh? Hitin kan i hal kho: ‘A har tukmi caan hmanhah Jehovah bia ka ngai maw? Khrihfabu a thian zungzal nakhnga i zuam awkah bia ka khiak maw?’ Asa nih a pi kha siangpahrang bawinu sinak in ṭhumh awkah zeitluk in dah ralṭhatnak a ngeih a herh lai ti kha ruathmanh. Kannih zong Asa bantukin ralṭhatnak kan ngeih a herh caan a um lai. Tahchunhnak ah, kan innchungkhar mi pakhat asiloah kan hawikom pakhat nih sualnak a tuah i aa ngaihchih lo tikah buchung in chuah a hauh ahcun zeitin? Amah he hawikomhnak tuah lo awkah bia na khiak lai maw? Na lungthin nih zei tuah awkah dah aan forh lai?