Salmos

2 ¿Paita icantimentavacaajeitari pincatsatashitariri ijitasorentsiyetiri?

¿Paita yatsipetantarori iquenqueshireashiyetaro iranteri?

 2 Yora pincatsariyetatsiri nampitsipeequi yapatojeitaca,

icoajeitaque impiatsateari Tasorentsi

aisati yora pincatsari icoyeaqueri.

 3 Icajemajeitaque icanti: “¡Te ancoajeiteji impincatsariventee!

¡Tsame ajocajeiterita!”

 4 Yora Tasorentsi, pincatsaritatsiri anta inquitequi,

ishirontimentacari;

 5 impoiji iquisasanotanaca catsini,

yoimintsaroajeitaqueri, icantaqueri:

 6 “Nomataquero nonashitacaacari nopeaqueri pincatsari.

Iriotaque pincatsaritatsineri nonampiqui Sión, noameetsataqueri.”

 7 Meeca noncamantempiro icoasanotaqueri Tasorentsi.

Icantaquena: “Avirotaque notomi,

meeca notomintaquempi.

 8 Pincantena, nompempirota nampitsipee

irosati overapaaca quipatsi,

irotaque pashiteari, aitaque nompaquempiro.

 9 Pintsoncasanoteri maaroni pincatsariyevetachari.

¡Poashinoncayeri, pinquempetacanteri coviti iporoqueetiri!”

10 ¡Avirojei pincatsariyetatsiri quipatsipeequi,

piotasanojeitero oca noamejeitempiri!

11 Pimpincatsajeiteri Tasorentsi,

pinquimoshireventeri, pineacameetsatateri

12 Poivotashijeiteari, pintsaroacayeari,

eiroquea iquisantimpitsi, picamajeiticari;

tempa intsipaite iquisasanota.

¡Inquimoshirejeite aventajeitariri, inquempoyeacoventeri!