Salmos

58 Avirojei pincatsariyevetachari,

¿Queariompa picantacoventanti cameetsa poashinoncanterica?

¿Queariompa pantayetiro tampaticatatsiri?

 2 Iro cantaincha piquenqueshiretiri poashinoncaavacayea;

irotaque otimantari oantantsi nampitsiqui.

 3 Yora caari cameetsajeitatsi aitaque icanta,

te incameetsateji tequeratani intime;

aisati ainiroquera otsomontetiri iriniro,

yamitacaro itseeyajeita.

 4 Oshequi yoashinoncantajeiti,

iquempetacari maranquepee quepiatatsiri,

quempetacantachari imayempiti yovitaquero iquemantari,

 5 eiro iquemantarotsi ivampoyeane sheripiari

ioyevetachari imatsitanti.

 6 Notasorentsite, poasanquetaasanoteri,

¡pijireiteri iraajipee yora quempevetariri anteariite maniti,

eiro imatantarotsi iroashinoncayena!

 7 Impeajeiteata intsipaite,

inquempetearo nija aajaitachari

aisati yaatiqueetiri camashitatsiri saveshi.

 8 Inquempejeitearita sanquiro itsonquiro iyarentsare

aisati inquempetearita jananequi

caari aneatsi ojocashitari tsinane.

 9 Intsoncajeiteta inquempetearo totseequishi itayeetiro,

ironea inquemacotaquerorica avishimoterine;

inquempetearita tojasheri itsonqueetiri.

10 Yora quemisantimpiri inquimoshirete

ariorica irineaquempi pimpiacoventaqueari;

iraatiquitajeiteri irirajani caari cameetsatatsi.

11 Impoiji incantajeite:

“¡Ocameetsatasanotaque anquemisantajeiteri!

¡Ainiro Tasorentsi cantacoventajeitiriri cameetsa atiripee!”