Salmos

75 Nopasonquijeitimpi, Notasorentsite,

Nopasonquijeitimpi; noquenquetsatacaimpi

aisati nopampoyeacoventiro pimayetaqueri caari ineapiniyeeti.

 2 Tempa picanti: “Omoncarataquearica, noncantacoventantasanote cameetsa.

 3 Ariorica oniquea quipatsi aisati maaroni timantajeitarori,

narotaque quisotacairori.”

 4 Yora jitacantachari ioti nocantiri:

“Eiro pijitacantashitatsi pioti.”

Aisati caari cameetsajeitatsi nocantiri:

“Eiro pishemejeititsi.

 5 Eiro pijitacantashita pishintsitasanoti;

aisati eiro pineanatashivetatsi pijitacantashitea aviroperori.”

 6 Tempa yora cantacoventantatsiri cameetsa

te imponempaji acaqueroca, antaqueronta;

aisati te imponempaji caaraiteriqui aisati toncaaripeequi;

 7 irintiquea Tasorentsi cantacoventantatsiri;

apaaropee iroashinoncaajeiteri

irio itsipa iroveshireacaajeiteari.

 8 Yora Tasorentsi inquisanaquearica,

iroashinoncaasanojeiteri caari cameetsajeitatsi,

irosati intsoncantajeitajea.

Oquempeta yajiricaquero iramento ojaaca iquisa,

otentaaca ovaja quepishijatatsiri;

ariorica irisacotaquero yora caari cameetsajeitatsi,

irirasanojeitero maaroni.

 9 Noncanteani nonquenquetsatacoteri nainti Tasorentsi

iquemisantiniri Jacoboni, aisati nompampoyeneri pampoyeantsi;

10 iriotaque tsonquerone ishemetimentiri caari cameetsajeitatsi;

irintiquea cameetsatatsiri, irimatacaasanoteri paitapeerica icoiri.