Salmos

135 ¡Icameetsataque Tasorentsi!

¡Pincantacojeiteri Tasorentsi: Icameetsati!

pincantacoteri; avirojei quemisantajeitiriri; Icameetsati.

 2 savicajeitatsiri ivancoqui Atasorentsite aisati oyaaraiteritequi.

 3 Ocameetsati pincantacojeiteri: Icameetsati;

tempa iriotaque cameetsatasanotatsiri.

Pimpampoyeajeiteneri pampoyeantsipee;

tempa iriotaque cavintsantasanotatsiri.

 4 Tempa icoyeaqueri Jacoboni, pajitachari aisati Israel,

ishanincatasanotajari.

 5 Niotasanotaqueri Atasorentsite, Itasorentsitasanoti,

yanaacotasanotiri maaroni ijitasorentsitashiyeetari.

 6 Imatasanotiro Tasorentsi paitapeerica icoiri,

anta inquitequi jero aca quipatsiqui

aisati incajarequi sanajatatsiri.

 7 Itimacairo mencori otsoteiro maaroni quipatsi

aisati imatacairi porecatsiri ayotantari ompariye incani, aisati itampeatacairo.

 8 Iriotaque oamaitajeitaqueriri itomipeeni egiptosati jivayevetachaniri itimi,

aisati ivirapee jivayetatsiri itimi.

 9 Yonijantaquero itasorenca Egiptosanoriqui

itiancaqueneri pincatsari jeri amitacoyevetariniri caari ineapinijeiti.

10 Yoamaajeitaqueri savicayevetachari nampitsipeequi

aisati yoamaajeitaqueri pincatsaripeeni neaperoyevetachaniri:

11 yora Sihón, ivincatsariteni amorreopee,

aisati Og, pincatsariventironiri Basán

aisati maaroni pincatsariyevetachaniri quipatsiqui Canaán.

12 Ora iipatsitepeeni pincatsariyevetachaniri,

ipajeitaqueri ishanincajeitajari,

yora ishanincajeitaniri Israel, isavicantajeitacari.

13 Tasorentsi, picantani pitimi;

pincanteani inquenqueshireacoyeetempi.

14 Yora Tasorentsi cameetsa icantacoventajeitiri ishanincajeitajari,

icavintsaajeitiri quemisantajeitiriri.

15 Yora pincatsatashijeitariri ijitasorentsiyetiri,

irisati vetsicashiyetaro oro jero plata,

16 Otimaveta ovante, te oneaveete,

otimaveta oqui, te oneeji

17 aisati oyempita, te onquemeji,

te aneimateji catsini.

18 Aisati iquempejeitacaro iriori vetsicayetirori

aisati quemisantashitacarori.

19 Avirojei ishanincajeitaniri Israel,

pincantacojeiteri Tasorentsi: Icameetsati.

Avirojei antaveeyetiniri Ivancoqui,

pincantacojeiteri: Icameetsati.

20 Avirojei ishanincapeeni Leví,

pincantacojeiteri Tasorentsi: Icameetsati.

Avirojei pincatsajeitiriri Tasorentsi,

pincantacojeiteri: Icameetsati.

21 Icameetsataque Tasorentsi anta toncaariqui Sión,

yora savicatsiri nampitsiqui Jerusalén.

¡Icameetsataque Tasorentsi!