Salmos

115 Notasorentsite, avirotaque nompincatsatasanoteri;

eiro nopincatsatashijeitajatsi narosati;

Nompincatsatimentempiro pinintanti, aisati piquearioventanti.

 2 ¿Paitampa irisampitantenari yora pincatsatashijeitariri ijitasorentsiyetiri:

“Jaocame pitasorentsite?”

 3 Yora Notasorentsite ainiro inquitequi,

imatasanoyetiro maaroni icoaqueri irantayeteri.

 4 Yora pincatsatashijeitariri ijitasorentsiyetiri,

irisati vetsicashiyetaro oro jero plata.

 5 Otimaveta ovante, te oneaveeteji;

otimaveta oqui, te oneanteji;

 6 otimaveta oyempita, te onquemeji;

otimaveta oirina, te onquemencateji;

 7 otimaveta acopee, te ajiriqueji;

otimaveta oitipee, te aniiteji;

¡te catsini omatea oneanate otsanoqui!

 8 Aisati iquempejeitacaro iriori vetsicayetirori,

iquemisantashitacaro.

 9 Avirojei ishanincajeitaniri Israel, pishiretasanoteari Tasorentsisanori;

tempa yamitacojeitaquee aisati iticaacoventajeitaquee.

10 Avirojei antaveetiniriri Tasorentsi, pishiretasanoteari;

tempa yamitacojeitaquee aisati iticaacoventajeitaquee.

11 Avirojei pincatsatiriri Tasorentsi, pishiretasanoteari,

yamitacojeitaquee aisati iticaacoventajeitaquee.

12 ¡Yora Tasorentsi iquenqueshireacojeitaquee,

intasoncacoventajeitajee maaroni!

intasoncacoventee arojei ishanincajeitaniri Israel;

intasoncacoventajeiteri antaveetapinitiniriri Ivancoqui;

13 intasoncacoventajeiteri pincatsajeitiriri,

yora pincatsaritatsiri aisati caari pincatsaritatsi.

14 Ocameetsati iroshequiacaajeri Tasorentsi pishanincajeitajeari

aisati irishanincajeitajeari iriori pitomipee.

15 Ocameetsati intasoncacoventajeitempi Tasorentsi

yora vetsicaquerori inquite aisati quipatsi;

16 Ora inquite irotaque irashi Tasorentsi;

ora quipatsi ipajeitaqueri atiripee.

17 Yora camajeitaintsiri eiro imatajirotsi incantacotajeri:

Icameetsati Tasorentsi.

18 Arojeiquea ainti, ancantacoteri meeca: Icameetsati Tasorentsi, ancantaitatiyempani.

¡Icameetsataque Tasorentsi!