Números

Ipincatsataquero ishanincajeitaniri Israel Baal, ijitasorentsitiri moabasatipee.

25 Isavicajeitantapaacari ishanincajeitaniri Israel nampitsiqui Sitim, yora shiramparipee icariperotacaacaro tsinanepee moabasato, yoonayetaquero. 2 Ocajemapinijeitiri oacaari itaapiniyeetinirori ojitasorentsitane, aisati yoajeitacari maaroni ishanincapee. Impoiji ipincatsajeitaquero ijitasorentsitiri moabasatipee. 3 Aitaque ocantari antacaajeitaqueri ipincatsajeitantanacarori Baal-peor, irosati iquisantacari Tasorentsi ishanincajeitaniri Israel. 4 Icantiri Moiseshi:

—Pampatoteri maaroni jivatacaayetiriri pishanincapee, ponijaacayenari poyeri, noncatsimareantanajeari.

5 Ari icantiri Moiseshi cantacoventantayetatsiri:

—Poayeteri aparopeeni pishanincasanoripee pincatsajeitaquerori Baal-peor.

6 Itimi aparo ishaninca amaquerori tsinane madiánasato. Ineacojeitavaqueri Moiseshi aisati apatojeitainchari iqueapinitironta Pancotsi yapatotimentantariri Tasorentsi, ainiro iraasanojeitaca. 7 Ineacotantavacariri Finees itomi Eleazar, icharineni antaveetatsiri Aarón. Irosati yojocantanacari apatojeitainchari, ishianaca yaapaintiro isataamento. 8 Yoijatanaqueri iqueanaque ivancoqui imaapinitinta, isataatsomontetapaaqueri aisati iroori tsinane. Irosati opeantanaja oashinoncantsi oamaajeitaqueriri ishanincajeitaniri Israel. 9 Iro cantaincha icarati 24,000 camajeitaintsi.

10 Ari icantajiri Tasorentsi Moiseshi:

—Yora Finees itsimareacaajana noquisavetacari pishanincapee, iquempetaquena notsaneacotacari caari cameetsatatsi noamaajeitantavetacariri. Aisati iriori itsaneacotaquenari, irotaque caari notsoncajeitantari. 11 - 12 Pincantajeri meeca, nomatasanoteneri nosavicacaasanoteri cameetsa. Nocoacaasanotaqueri incanteani irantaveetena, aisati iriori irishanincajeitajeari coajicani. Tempa itsaneacotaquenari pishanincapee irotaque nopeacojeitantajanariri caari cameetsatatsi yantajeitaqueri. 13 -

14 Yora isataaqueri ipajita Zimrí, ishanincapeeni Simeón itomini Salú, iriotaque jivatacaajeivetariri ishanincasanoripee. 15 Ora tsinane madiánasato opajitani Cozbí, irishinto Sur jivatacaajeitiriri ishanincapee iriori madiánasati.

16 Impoiji icantiri Tasorentsi Moiseshi:

—Pimapocajeitaqueri madiánasatipee, pijatashiteri pintsonqueri, poajeiteri 17 - 18 iquempetaquempi avirori imapocaquempi yamatavinirojeitaquempi, ipincatsatacaashijeitaquempiro Baal-peor, aisati iquempeetaquero Cozbí, irishintoni jivatacaajeitiriri madiánasatipee, ora yoyeetaqueri; irotaque notiancantaquempirori oashinoncantsi; tempa opincatsatacaashijeitaquempiro Baal-peor.