Salmos

 2 Piotasanotiro paitapeerica nantayetiri,

omavetaquea pitimi areejiqui,

piotiro paita noquenqueshireyetiri.

 3 Piotasanotana jaocapeerica nojayevetari,

piotasanotiro maaroni nantayetiri.

 4 Notasorentsite, piotacotiro paitarica noncanteri,

tequerata noneanateji.

 5 Pitsoteaquero maaroni piticaacoventasanotana,

pishoncaquena, pamenacoventana.

 6 Ora piotantari ocameetsatasanotaque,

eiro nomatirotsi catsini nontsoteero.

¡Antearoite catsini, eiro nomatirotsi niotero!

 7 ¿Ariompa nomatero nojatapitsatero Pishire areejiqui?

¿Ariompa nomatea noshiapitsatempi areejiqui?

 8 Ariorica nojateme anta jenoqui, aitaque pitimiri.

Aisati ariorica nojateme tsompoinaqui quipatsi,

aitaque aisati pitimiri.

 9 Ariorica nojateme naranaque anta iquenapai catsirincaiteri,

aisati nosavicavetearica overaapaacanta incajare, iqueanajinta catsirincaiteri,

10 irosati pincantea quiso poyena,

eiro pojocanatsi pitasorencaqui.

11 Ariorica nonquenqueshiretea nomanapitsatempime tsiteniriqui,

ariorica ompeavetanaquea tsiteniri quitaiteri, oshoncavetena

12 ora tsitenishaatsiri, eiro nomatirotsi omanena,

tempa ora tsiteniri onconijatasanote, onquempetearo quitaiteri.

¡Ora tsiteniri aisati quitaiteri te ompashinitimotempiji!

13 Avirotaque vetsicaquenari maaroni novatsapeequi;

aisati pivetsicaquena otsomontequi ina.

14 Oshequi nocantacotimpi: Picameetsati;

noanaquero cavaco;

tempa ocameetsataque pimayetaqueri.

¡Irotaque niotacotasanotaqueri!

15 Te nomanimotempiji noqueveantanacari novatsaqui,

ainiroquera novetsicanaca, tecatsi iotacotenane,

avintiquea piotacotaquena nontime.

16 Pineasanotaquena povetsicantaquenari

aisati pisanquenatacotitacaroni maaroni ocapee pisanquenarequi.

Piotitacaro jaoca oncarate nanee,

tequeratsitani ontimeji novatsa.

17 Notasorentsite, eiro nomatirotsi niotacotero piquenqueshiretiri:

¡Ora piotantari tecatsi catsini materone iriotacotero!

18 Ariorica noncoavetea nomoncaratero

eiro nomatirotsi niotacotero, anaanaquero impanequi;

ariorica nontsonquerome nomoncaratero maaroni,

irosati noncantea quiso noyempi.

19 Notasorentsite poamaajeiteri caari cameetsajeitatsi,

pinijantareacoventenari oayeripee,

20 yora cantimajeitimpiri avirori;

tempa yatsipetashijeitacaro ipiatsajeitaquempi.

21 Notasorentsite;

¿tempa noquishiri yora quisajeitaquempiri avirori,

aisati nopinquiri yora piatsajeitimpiri?

22 ¡Noquisashireasotaqueri catsini,

iriojeitaque nojitaqueri quisajeitanari!

23 Notasorentsite, piotasanotena jaoca nocantashiretari,

pineantena, piotasanotero noquenqueshireantari;

24 piotana nantashiyetarorica caari cameetsatatsi;

poametena irointi nantapinitero queariotasanotatsiri.