Salmos

 2 Noashiretantacari, naventari Tasorentsi,

nocantani tsiteniriquipeequi novanquiro naco noquenquetsatacairi.

Iro cantaincha te noneeroji oimoshirenquenane.

 3 Ari noquenqueshiretiri Tasorentsi, niraaca,

aisati te noncoashiretanaje.

 4 Notasorentsite, te pishinetena nomaaje.

¡Oshequi ocantimonentaquena,

te nomateroji paitarica noneanateri!

 5 Nocantani noquenqueshireyetiro jaoca nocantaniri peerani.

 6 Nopampoyeayeti tsiteniripeequi:

noquenqueshireti, nocanti:

 7 “¿Irosatimpa incanteani inquishea Tasorentsi?

¿Eirompa aisati icavintsaajeitajanatsi?

 8 ¿Opeacampa inintanti?

¿aisati otsoncacampa icantasanotaquenari oncanteani?

 9 ¿Ipeacotacarompa Tasorentsi icavintsanti?

¿Iquisasanojeitaquenampa, eiro ineshinoncajeitajanatsi?”

10 Iro cantimonentasanotaquenari ariorica nonquenqueshiretero,

te quiso iroajeitajee Tasorentsi Inquitequiniri;

te inquempetajea peerani.

11 Nonquenqueshiretajero imayetaqueri Tasorentsi peerani;

12 noncanteani nonquenqueshiretero maaroni yantayetaqueri.

13 Tasorentsi, picameetsatasanoti,

aisati ocameetsati maaroni pantayetaqueri,

¡te aneeriji ijitasorentsiyeetiri quempetempineri!

14 ¡Avirotaque mayetirori caari ineanapiniyeeti!

¡Ponijaasanotaqueri pitasorenca atiripee!

15 Poavisaacotajiri pishanincajeitajari pitasorencaqui,

yora itomipeeni Jacobo aisati José.

16 Tasorentsi, piquempejitantapaacarori incajare,

otsaroacaanaquempi,

aisati oshevajatanaca nija saanajatatsiri.

17 Ora mencoripee opariasanotanaque incani,

otireanaque inquitequi aisati oporecayetanaque maaroni.

18 Iquemasanoyeetaquero poimatasanotatsiri otirei

timatsiri apishoiricachari tampea;

iquitasantetacotasanotiro porecatsiri quipatsi aisati oshevataca.

19 Pitencareajataquero incajare yavisajeitantanacari;

iro cantaincha tecatsi neerone paaticampoiretanaque.

20 Pijivatacantacariri pishanincajeitajari,

picoyeaqueri Moiseshini jeri Aaróni iraanaqueri;

piquempetacantaqueri shentiriri ovisha.