Salmos

141 Notasorentsite, aviro naventari.

¡Shintsini pimpoque!

¡Pinquemero ariorica noquenquetsatacaimpi!

 2 Pineacameetsatero noquenquetsatacaimpiri;

oquempeta pineacameetsajencatiro casancapatsatatsiri itaapiniyeetimpiri;

aisati noanquimotimpirorica naco,

oquempetacaro itaapiniyeetimpiri ishaaviniji virantsi.

 3 Notasorentsite, pishentenaro novante

ariotica noneanate.

 4 Pojocaacoventena, eiro noquenqueshireantarotsi nantero caari cameetsatatsi;

eiro pishinetanatsi nantashiyetearo caari cameetsayetatsi

aisati eiro nocaratiritsi iroajeitearica caari cameetsajeitatsi.

 5 Ocameetsatimotana iroasanquetayena cameetsatatsiri,

aisati incantimentenaro nantayetiri, iroametantenari.

Oquempeta isainatantaquenaro casancajari, eiro nopiatsataritsi,

oncantimonentavetena, aiquero nojatatiiye namanapinite.

 6 Yora jivatacaajeitiriri caari cameetsajeitatsi iroariyeejeiteri imperitaqui,

aitaque iriojeitanaqueri atiripee ocameetsatasanotaque noneane nocantavetariri.

 7 Ora itonquipeeni ojocaveetanaquea itiminta itijaari quipatsiqui

inquempetanaquearo inquichayeeterorica quipatsi.

 8 Novincatsarite, avirotaque Tasorentsi noquenqueshiretiri,

avirotaque naventapinitari, eiro pojocanatsi.

 9 Pojocaacoventena icoacaashitacari caari cameetsajeitatsi, iroashinoncayena;

oquempetaca yoashitaquena oashirentsi.

10 Ocameetsati irashinoncaimentajearota irisati yantayetiri,

naintiquea aiquero nojatatiiye nonquemisantasanotempi.