Salmos

116 Nonintiri Tasorentsi;

tempa iquemaquero noacotiriri,

 2 Noncanteani nonquenquetsatacayeri;

tempa iquemapinitana.

 3 Irovetaincha noncameme, ocantimonentasanotanaquena,

ari noashiretasanotanaca catsini,

oshequi notsaroasanotanaque,

noquemaatsitasanotaca.

 4 Irosati noquenquetsatacantacari Tasorentsi,

nocantasanotaqueri iroavisaacotena.

 5 Yora Tasorentsi itampaticatasanoti, ineshinoncatanti,

aisati oshequi icavintsanti.

 6 Yora Tasorentsi ishentiri caari neaperojeitacha.

Noneantacari narori te noshintsitanaje, yoavisaacotaquena.

 7 Meeca nosavicaji cameetsa;

tempa icavintsaaquena Tasorentsi.

 8 Yojocaacoventaquena noncamaqueme,

ipeajanaro noashireveta,

aisati te irishinetenaji nashinoncaasanotea.

 9 Noncanteani nonquemisantasanoteri Tasorentsi

ainiroquera nocaratiri aneajeitatsiri.

10 Noshiretacari Tasorentsi, omavetaquea nocanti:

“Opomerentsitimotaquena.”

11 Ainiroquera ocantimonentaquena, nocantasanotanaque:

“Maaroni atiri irinti tseeyari.”

12 ¿Paita nompinatajeriri Tasorentsi oshequi itasoncacoventaquena?

13 Nompashiteari ovaja nompasonquitanteariri yoavisaacotaquena,

aisati nonquenquetsatacayeri.

14 Nomoncarateneri nocashiacaaqueriri Tasorentsi,

noncarajeiteri ishanincajeitajari.

15 Oshequi ocantimonentari Tasorentsi

ineiririca icamajeiti nintajeitiriri.

16 Notasorentsite, narotaque quemisantimpiri,

aisati narotaque otomi quemisantimpiri;

poavisaacotajana, yoashinonqueevetaquena.

17 Ocameetsati noyempiri virantsipee nompasonquitantempiri,

aisati nonquenquetsatacayempi.

18 Nomoncaratempiro nocashiacaaquempiri,

noncarateri pishanincajeitajari

19 anta oyaaraiteritequi Ivanco Tasorentsi,

timatsiri nampitsiqui Jerusalén.

¡Icameetsataque Tasorentsi!