Deuteronomio

19 “Ariorica irimatacaajeitaquempi Avincatsarite Tasorentsi pintsoncajeitanteariri savicayetatsiri nampitsipeequi, paajeitaquerorica iipatsitepee aisati ivancopee, ocameetsati pinashitacayea mava nampitsipee. 2 - 3 Aisati poameetsatacantayetero avotsi jatantachaneri anta nampitsiqui. Aisati pinashitacayetaquea mavatatsiri ora quipatsi impashitempi Avincatsarite Tasorentsi. 4 Aitaque irijayeteri oantatsiri eiroquea yoanteetaritsi iriori, teerica intsataantavetea, aisati teerica inquisanentaveteari. 5 Oquempetaca: Intimerica caraterine ishaninca inchaquite itsima, ariorica ontsopaanaquea ishachane ontsecapaaqueririca incamaque, yora tsecantacariri aitaque irishianaqueri eiro yoanteetajaritsi iriori. 6 Irompa ariorica intime ishaninca quempeji irineapaaqueririca camaque, incoaquerica impiacoventajeari, irosati iroijanatantanaqueari. Areejitatsiquerarica nampitsi, ariorica irareetavajeari irosati iroantavajeari. Iro cantaincha te oncameetsaveteaji iroyerime; tempa te inquisanentapinivetearini. 7 Irotaque nocantantimpiri, ocameetsati pinashitacayea mava nampitsipee. Ariorica irantearoiteacaasanotaquempiro Avincatsarite Tasorentsi piipatsite, irimoncarataquero icantasanotaqueriri intacantajeitaqueerini, 8 - 9 ariorica pinintasanoteri, pincanteani pimatapinitero maaroni icantacantiri nocamantajimpiri, pinquemisantasanoteri; irosati pinashitacantajea aisati mava nampitsipee. 10 Tecatsiquea oncantea iroyeeteri caari tsatantavetacha iroante pinampiyetapemparonta impempiri Avincatsarite Tasorentsi, eiroquea icantimentanteetimpiritsi camayetatsine.

11 “Irompa iriorica quisanentiriri ishaninca irineaqueririca apaniro, irosati iroantaqueari, irishiavetanaquearica anta pinashitacaayetacari nampitsi, yora jivatacantatsiri inampiqui ocameetsati intianque aajerine. Ariorica iramajeri, irosati impantaqueari ishanincasanori camaintsiri iroantajeariri iriori. 12 - 13 Eiro pintacotaritsi oantatsiri, eiroquea picarajeitantaritsi, pintimantajeiteari cameetsa.

14 “Anta pinampiyetapemparonta impempiri Avincatsarite Tasorentsi, ocameetsati pimpincatsatavacayea jaocarica intsapiyetaquerori iipatsitepee pishaninca. Te oncameetsate poaitayeteri yoatiashiyetirori paitanteariri capichaji.

Jaoca incanteriri tseeyacotantashiyetachari.

15 “Eiro imatiro iroashinoncaacanteri aparoni cantacotashitearine ishaninca yoantaque, aisati paitarica irantaque. Irompa incarataquerica apite ariorica mava cantacoterine, aitaque irimatacantaqueri.

16 “Iriorica tsimantachari cantacoventashitearine pashini: ‘Yoantaque yoca,’ ocameetsati paanaqueri apiiteroqueti anta Ivancoqui Tasorentsi, itiminta antaveetatsiri jeri cantacoventantayetatsiri. 17 - 18 Impoijiquea yora cantacoventantatsiri irisampitasanoteri queariotaquerica, irompa itseeyacotashitacaririca, irisati quemaatsicatajearone icoacaavetacariri itsipa incantacanterime, eiroquea ishequiantanacatsi tsimantachane picaratiri. 19 - 20 Ariorica inquemacojeitaqueri pishanincapee, irotaque intsaroajeitantanaqueari, eiroquea itsimaantashiyetatsi iriori. 21 Eiro catsini pintacotaritsi: ocameetsati impiacoventavacayea, iroanterica itsipa, iroyeetajerita iriori; inquitsoreajaquitanterica itsipa, inquitsoreajaquiyeetajerita iriori; irajireiteririca iraji itsipa, irajireiteetajeri iriori; imposanterica itsipa, imposheetajerita iriori; incarajiteririca iiti itsipa, incarajiteetajeri iriori.