Salmos

26 Notasorentsite, pincantacoventena;

tempa nomoncarataquero picoacaanari, tecatsi nante;

nocantani noshiretasanotimpi.

 2 Pamenasanotena jaoca nocantari.

¡Pineantearo noquenqueshireyetiri

aisati nocoashireyetiri!

 3 Noquenqueshiretapinitiro pinintasanotana

aisati noquemisantimpi.

 4 Te catsini noncarateri tseeyajeitachari

aisati amatavijeitantatsiri.

 5 Te noneacameetsateroji yapatojeitarica caari cameetsajeitatsi.

¡Te catsini nontsipateari piatsatachari!

 6 Notasorentsite, noameetsataca, te aneajeroji nantane,

meeca nocoi nojate otiminta altar,

 7 nompampoyempiro pampoyeantsi cantacotirori: Picameetsati,

aisati noncamantacotero pimayetaqueri caari ineapiniyeeti.

 8 Notasorentsite, nonintasanotiro Pancotsi Pinantari,

otimasanotinta pitasorenca.

 9 Eiro poamanatsi pitsipataanaricari

antirori caari cameetsajeitatsi,

aisati eiro poashinoncaanatsi

pitsipataanaricari oantajeitatsiri,

10 aisati aantariri quireequi ishaninca yoashinoncantariri.

11 Naintiquea, tecatsi nante.

¡Poavisaacotena aisati pincavintsayena!

12 Noquearioventasanotaquero noshiretimpi.

¡Nompasonquiteri Tasorentsi noncarateri noshanincapee!