Salmos

143 Notasorentsite, pinquemena noquenquetsatacaimpiri.

¡Panquenaro; tempa aviro cameetsatatsiri aisati queariotatsiri!

 2 Eiro picantimentanarotsi nantaqueri;

tempa naro quemisantimpiri;

aca quipatsiqui, te intimeji cameetsatimotempine.

 3 Yora quisajeitanari yoijanajeitaquena,

yoashinoncaasanotaquena catsini.

Ishintsinatana yoiminqueana omoroqui tsitenishaatsiri,

noquempevetacari camitainchari peerani.

 4 Oshequi noashiretasanotaca catsini,

ocantimoshireaquena.

 5 Noquenqueshiretiro peerani, maaroni pimayetaquero.

 6 Noanquimotimpiro naco, naventimpi,

nocoasanotimpi, noquempetacaro quipatsi pirijatatsiri.

 7 ¡Notasorentsite, pamitacotena intsipaite;

tempa irotaintsi noncamashitea!

¡Eiro pitsaneapitsatanarotsi pamitacotena!

Tempa ari nonquempetaqueari camayetatsiri.

 8 Ariorica oquitaiteapiniti piotacayenaro pinintasanotana;

tempa noshiretasanotimpi.

Piotacayena jaoca noncanteari nontime cameetsa;

tempa avirotaque naventari pimpenaro nocoayetiri.

 9 Notasorentsite, pojocaacoventenari quisajeitanari;

avirotaque naventari, pinticaacoventena.

10 Poametasanotena nantantempirori picoacaanari;

tempa avirotaque Notasorentsite.

¡Nocoaquero Pishire cameetsatatsiri ontimacayena cameetsa!

11 Notasorentsite, pimoncaratero picantasanotiri. ¡Poaneajena!

¡Tempa aviro cameetsatatsiri,

pojocaacoventenaro pomerentsitimotaquenari!

12 ¡Tempa aviro queariotatsiri, pintsoncajeiteri quisajeitaquenari!

¡Pintsoncasanojeiteri maaroni;

tempa naro quemisantimpiri!