Proverbios

9 Ora iotantsi ovetsicaquero ovanco,

oatiaque otincamipee ocarataque 7, oanencayetaquero.

 2 Ari oaque virantsipee oajeiteari, cameetsa ovetsicayetaqueri,

aisati oameetsajataquero ovaja, oameetsayetaquero meesa.

 3 Irosati otiancantacaro onampirepee toncaariqui nampitsiquiniri, oncajemayete:

 4 “¡Pimpocajeitanaque aca evancaripee caari iojeitatsi!”

Aisati ocajemacantaqueri caari quenqueshireacha, ocanti:

 5 “Pimpocajeite poajeitearo novetsicaqueri oanarontsi,

aisati pirajeitero noameetsajataqueri ovaja.

 6 Pinquenqueshireajea pisavicantajeari cameetsa,

pinquempejeitajeari atiri quenqueshireajeitachari cameetsa.”

 7 Poamevetearirica cantimatantatsiri,

ari intseencanaquempi aisati inquisanentanaquempi.

 8 Pinquenquejaavetearirica cantimatantatsiri, ari inquisanaquempi;

irintiquea iotatsiri poameteririca, ari irineacameetsataquempi.

 9 Piotacaasanoteririca iotatsiri, iriotasanotantanaqueari.

Poametasanoteririca atiri cameetsatatsiri, iriotasanotantanaqueari.

10 Ayotasanotanteari, ocameetsati ajivate ampincatsateri Tasorentsi;

ayoteririca Tasorentsi cameetsatasanotatsiri, ari ontimimotanaquee quenqueshireantsi.

11 Ocameetsatasanotaque iotantsi,

irotaque oaneajeitempine osamani.

12 Avirorica iotatsiri, pisavique cameetsa;

irompa avirorica cantimatantatsiri, avisati cantacayearone.

13 Yora caari iotatsi iquempetacaro tsinane

ovaayetirori neantsipee caari queariotatsi.

14 Osaviqui savicamentotsiqui oqueantapinitaroriqui ovanco

anta toncaariqui nampitsiquiniri,

15 ocajemayetiri avisayetatsiri antayetirori cameetsatatsiri:

16 “¡Pimpocajeitanaque aca evancaripee caari iojeitatsi!”

Aisati ocajemacantaqueri caari quenqueshireacha:

17 “Ora nija icoshiyeetiri ocameetsajatasanotaque;

aisati tanta yoyeetari imanacayeetari, oposhinitasanoti.”

18 Iro cantaincha te irioteji, yora queaintsiri ovancoqui,

ari ijajeitaqueri otiminta caamanentsi.