Salmos

9 Notasorentsite,

nocoashiretsanotaque noncantempi: Picameetsati;

aisati noncamantacotero pimayetaqueri cameetsayetatsiri.

 2 ¡Aviro Jenoquisati, nocoi nonquimoshireimentempi,

antearojenca nompampoyeaventempi!

 3 Yora quisajeivetaquenari ishiapitsajeitanaquempi

ipariajeitaque, icamajeitaque maaroni.

 4 Avirotaque cantacoventantatsiri cameetsa,

pisavicaque pivincatsarimentoqui

pincantacoventantenari cameetsa.

 5 Pishintsijencataqueri pincatsatashitariri ijitasorentsiyetiri;

pitsoncaqueri caari cameetsajeitatsi.

¡Incanteani tecatsi quenqueshireacojeitajerine!

 6 Icamajeitaque quisajeitanari;

tecatsi savicantajeitajearone inampipeeni.

Pitsoncajeitaqueri, tecatsi quenqueshireacojeitajerine.

 7 Iro cantaincha irinti Tasorentsi

iriotaque pincatsari incantaitatiyempani,

isavicaque ivincatsarimentoqui, incantacoventante.

 8 Incantacoventeri cameetsa maaroni atiripee;

queario incantacoventasanojeiteri.

 9 Yora Tasorentsi iticaacoventiri yoashinonqueeyetiri

ariorica opomerentsitimotari.

10 Notasorentsite, ishiretimpi yora iojeitimpiri;

eiro pojocajeitiritsi aventimpiri.

11 Pimpampoyeneri Tasorentsi pampoyeantsipee,

yora pincatsaritatsiri anta nampitsiqui Sión.

Pincamantajeiteri atiri maaroni imayetaqueri.

12 Iquenqueshireacotiri Tasorentsi yoashinonqueetiri,

te impeacotearoji ariorica yashinoncaa,

yoasanquetairi jaanicarica oashinoncairiri.

13 Notasorentsite, pincavintsayena,

pamene, oshequi yoashinoncaaquena quisajeitanari.

¡Eiro pishinetiritsi iroyena!

14 Aitaque noncamantaqueri maaroni savicajeitatsiri nampitsiqui Jerusalén,

ocameetsati incantacotempi maaroni atiripee: Picameetsati,

Aisati oshequi noquimoshiretaque;

tempa poavisaacotaquena.

15 Yora pincatsatashijeitariri ijitasorentsiyetiri,

irisati ashinoncaimentajearone yantayetiri;

inquempeteari oashitachari icharijarequi,

irisati pariantajearone.

16 ¡Yonijantaquero Tasorentsi icantacoventanti cameetsa!

Irintiquea caari cameetsajeitatsi

irosati incantea irashinoncaimentajearo yantayetaqueri.

17 Yora caari cameetsajeitatsi, pincatsatashijeitariri ijitasorentsiyetiri,

jeri peacojeitariri Tasorentsi,

intsoncajeitea, irijate Sharincaveniqui.

18 Tempa eiro icantani impeacoyeeteari coiteaveetatsiri,

aisati eiro icantani impeero yoyeacotiri Tasorentsi iroavisaacoteri.

19 Notasorentsite, pishintsite,

eiro pishinetiritsi irishemejeite atiripee.

¡Anta pitiminta pincantacoventeri,

pincatsatashijeitariri ijitasorentsiyetiri!

20 Notasorentsite, pincantashireacaajeiteari intsaroajeitanaqueta.

¡Piotacaajeiteri atiri inaveta, tecatsi irimajeite!