Salmos

68 Ariorica irijivatanaque Tasorentsi irimanatea,

irovaraajeitanaquea quisajeitiriri, irishiapitsajeitanaqueri.

 2 Impeajeitanaquea inquempetearo cachaa

aisati jareatsiri icanteetiri cera intayeeterorica paamariqui.

¡Iroimpeajeiteri Tasorentsi caari cameetsajeitatsi!

 3 Irintiquea cameetsatatsiri iriveshireimentajeiteari Tasorentsi.

¡Inquimoshiretasanojeite catsini!

 4 Pimpampoyeacoventajeiteri Tasorentsi,

¡Pimpampoyeacoventeri pampoyeantsiqui Avincatsarite!

Pincantacoteri: Icameetsati yora ovariirori incani.

¡Pinquimoshireventeri Tasorentsi!

¡Pinquimoshireventeri itiminta!

 5 Iriotaque Tasorentsi savicatsiri Ivancoqui cameetsatatsiri;

iriotaque iriri jananequipee camayetatsiri iriri, iriniro

aisati amenacoventirori camajimentaaropee.

 6 Yora savicashitachari apaniro, ipiri isavicantari,

aisati yoipacaacoventiri yoiminqueeyetiri, isavicacairi cameetsa.

Irintiquea piatsajeitachari, irisavicajeiti quipatsiqui

caari oshiocanta panquirentsipee.

 7 Notasorentsite, pijivajeitantacariri pishanincajeitacari,

piquenacantacariri caaraiteriqui,

 8 onicanaca quipatsi, opariaque incani;

aisati onicanaca toncaari Sinaí.

Tempa avirotaque Itasorentsite ishanincajeitaniri Israel.

 9 Notasorentsite, povariasanotaquero incani,

oshiocayetanaji ivanquire iipatsitequi pirijatatsiri.

10 Yora pishanincajeitajari aitaque isavicajeitapaaqueri,

aviro Tasorentsi, neshinoncataqueriri

pipaqueri coiteaveetatsiri coiteimotariri.

11 Yora Tasorentsi icamantantaque,

oshequi tsinanepee oaaqueneriri oshanincapee:

12 “¡Shiajeitanaca pincatsariyetatsiri aisati manatacoventajeitiriri!”

Anta ovancopeequi opavacaayetacaro

yovetsiqueetiri shiacantsi ishivanquipee sampaquiti ioshitachari plata

aisati ivitipee ioshitachari oro pinatasanotachari,

yaapitsajeitaqueriri quisajeitiriri.

¡Iro cantaincha avintiquea pimanajeitaca itantoroqui pivirapee! 13 -

14 Yoimishiajeitantacariri Tasorentsi pincatsariyetatsiri

yovariaquero sharaca toncaariqui Salmón.

15 ¡Avirojei, savicayetatsiri toncaaripeequiniri Basán, antearotasanotatsiri!

¿Paita piquisacotantarori toncaari icoyeaqueri Tasorentsi irisavicanteari?

¡Aitaque irisaviqueri incantaitatiyempani! 16 -

17 Yora Tasorentsi oshequi catsini

ishiacomentopee imanatacaari.

Aitaque yaniireapaaqueri toncaariqui Sinaí

isavicantapaacaro Ivancoqui.

18 Notasorentsite, pijataji toncaariqui,

paanaqueri oshequi iperanayeevetari,

aisati paaquero ipashijeitaquempiri atiripee;

panaacotasanotaqueri quisajeitimpiri, ipincatsajeitantaquempiri.

19 Icameetsatasanotaque Avincatsarite Tasorentsi, oavisaacoteeri.

Icantani quitaiteripeequi yamitacotee pomerentsitimojeiteeri.

20 Iriotaque Atasorentsite oavisaacotantatsiri,

eiro acamajeitantatsi.

21 Intsoncasanoteri Tasorentsi quishiriri,

antapinitirori caari cameetsatatsi.

22 Icanti Tasorentsi: “Noimpiajempi nampitsiqui Basán aisati incajarequi,

23 pintsoncantajeiteariri maaroni quisajeitimpiri.

Paatiquitajeiteri iriraja

aisati iriori pitsititepee irantsojeitero.”

24 Avincatsarite Tasorentsi,

noneajeitaqueri anta Pinantariqui

veshireimentajeitimpiri, yoveshintsaajeitaca.

25 Yora pampoyeajeitatsiri ijivajeitanaque,

iro nianqui evancaropee pampoyeantarori panteretapee,

irio impoijeitatsi pampoyeantarori otsipapee.

26 ¡Pinquimoshireventasanojeiteri Tasorentsi yora Tasorentsisanori,

avirojei ishanincajeitaniri Israel apatotimentajeitariri!

27 Yora jivajeitanaintsiri iriojeitaque ishanincapeeni Benjamín,

yora vecarantarori itimi.

Impoitatsiri itimi aisati jivatacantayetatsiri ishanincapeeni Judá, Zabulón jeri Neftalí.

28 Notasorentsite, pinijaasanotenaro pitasorenca.

¡Pinquenqueshiretacaajeitenaro pimayetaqueri

pamitacojeitantaquenari!

29 Anta Pivancoqui antearotatsiri,

timatsi nampitsiqui Jerusalén,

aitaque yamapinijeitimpirori pincatsariyetatsiri ipashiyetimpiri,

30 pimpiateari egiptosatipee quempevetariri covencatatsiri;

tempa icoasanojeitaquero irashitaarantasanotea,

yoashiventaasanojeitaqueri savicayetatsiri nampitsipeequi

yaapitsajeitaqueri yashiyevetari.

¡Poimishiajeiteri coasanotirori irimanatapinijeitea!

31 Imponeaquea Egiptoqui atiri intianqueri pincatsiri,

aisati etiopiasati impoque inquenquetsatacoteri Tasorentsi.

32 ¡Pimpampoyeaventajeiteri Tasorentsi

savicayetatsiri maaroni nampitsipeequi!

¡Pimpampoyeneri pampoyeantsi Tasorentsi

33 yora quenantarori inquite timitachaniri!

Pinquemero irineane oquempetacaro otirei.

34 Piotasanotero timatsi itasorenca Tasorentsi,

ipincatsariventasanotiri ishanincajeitaniri Israel

aisati yonijayetaqueero itasorenca anta inquitequi.

35 Icameetsatasanotaque Tasorentsi anta Inantariqui.

Iriotaque Itasorentsite ishanincajeitaniri Israel,

imatacaasanotiri paitapeerica aisati ishintsitacaasanotiri.

¡Icameetsatasanotaque Tasorentsi!