Salmos

18 ¡Notasorentsite, avirotaque matacaanari,

nonintasanotimpi!

 2 Avirotaque jocaacoventanari naventari, oipacacoventanari.

Notasorentsite, piquempetimotaquena ojenoquiti imperita jocaacoventanari

jero ashirotatsiri ticaacoventanari,

aisati Oavisaacotanari pitasorencaqui,

eiro imatacoyeetantanatsi nomanapinitantari.

 3 Notasorentsite, ocameetsati noncantacotempi: Picameetsati.

Ariorica naventimpi, poavisaacotana,

caari imatantana quisajeitanari.

 4 Irovetaincha noncameme,

oshequi notsaroacaacaro covencatatsiri aavetaquenari;

 5 oquempetaca noquempejitacaro itimajeitinta camayetatsiri.

 6 Opomerentsitimotantaquenari, naventacari Notasorentsite,

nocantaqueri iramitacotena.

Ari iquemaquena anta Ivancoqui;

iquemasanotaquero nocajemantacariri.

 7 Irosati imatantacaro Tasorentsi

onicanaca antearoite quipatsi,

onicana toncaaripee irosati ishaaviji;

tempa iquisanaca

 8 ¡Osoquijanaquero cachaajenca,

aisati paamari tsoncantatsiri

jero omenqui parashetatsiri!

 9 ¡Otencareanaque inquite!

¡Yaniireantapaacaro antearoite mencori tsitenishaatatsiri!

10 Iquijacotacari inampire,

yaranaque tampeajencaqui.

11 Imanacaro mencori tsitenishaatasanotatsiri

otimantari nija oshoncacari.

12 Oporecanaque, oponeanaca itimaquenta,

aisati iriniqui jero omenqui parashetatsiri,

oponeanaca mencoriqui.

13 Ari ineanataque Tasorentsi Inquitequiniri,

iquempetacaro otirei;

otimaquenta iriniqui aisati omenqui parashetatsiri.

14 Antearoite iporecayetanaque,

iquempetacaro chacopipee.

Yoimishiajeitaqueri quisajeitaquenari, yovaraajeitanaca.

15 Iquisatsatantanacari Tasorentsi,

itiancaquero tampea shintsijencatatsiri

itasoncaajataquero incajare oconijatanaque tsompoinaqui,

ineajeitaquero maaroni.

16 Yora Tasorentsi savicatsiri inquitequi

yamitacotaquena aca quipatsiqui,

yoavisaacotaquena antearojaqui incajare.

17 Yoavisaacotajana iroyename quisajeitaquenari

neaperotasanotachari, yanaacotaquena nainti.

18 Opomerentsitimotantaquenari imapocaquena yoashinoncaaquena.

Iro cantaincha yamitacotaquena Tasorentsi.

19 Yoipacaacoventajana, yoavisaacotajana;

tempa icavintsaaquena.

20 Itasoncacoventaquena Tasorentsi, intacotaquena,

ineaquena nantayetaquero cameetsatatsiri.

21 Tempa noquemisantasanotaqueri,

¡te catsini nompiatsateariji Notasorentsite!

22 Noquenqueshiretapinitiro icantacantiri.

¡Te catsini nompiatsatearoji!

23 Cameetsa nosaviqui, tecatsi nantimoteri;

nojocaquero caari cameetsatatsi.

24 Itasoncacoventaquena Tasorentsi, intacotaquena;

tempa nantimoyetaqueneri cameetsatatsiri.

25 Notasorentsite, aviro moncaratirori picantiri,

quiso poaqueri quearioventimpiri,

aisati savicatsiri cameetsa;

26 ponijaaqueri cameetsa yora cameetsashirejeitatsiri.

Irintiquea ioyevetachari yamatavitanti,

panaacotasanotiri piotasanoti avinti.

27 Poavisaacotiri caari shemetatsi,

irintiquea shemetatsiri poashiventairi.

28 Notasorentsite, piveshireacaayena,

nosavicanteari cameetsa.

Onquempetimotantenari piquitaiteacotana tsiteniriqui.

29 Pamitacotena nomanatanteariri quisajeitaquenari,

navisanaquerota otantotacoro inampipee.

30 Ora yoametantiri Tasorentsi ocameetsatasanotaque,

aisati icashiacaaqueeri, irotaque ashiretasanotantearori.

¡Iticaacoventiri Tasorentsi maaroni shiretariri!

31 ¿Timatsimpa pashini tasorentsitatsiri quempetariri Notasorentsite?

¿Timatsimpa ijitasorentsiyeetiri materone inticaacoventajeitee?

32 Iriotaque Tasorentsi matacaanari

aisati oameetsatanari nosavicantari cameetsa.

33 Iriotaque shintsitacaanari noquempevetacari maniro,

naniitantari cameetsa toncaaripeequi.

34 Iriotaque oametanari nomatanteari nomanatea,

aisati ishintsitacaana nontsiero pea vetsicachari bronce.

35 Avirotaque ticaacoventanari aisati oavisaacotanari.

Pamitacotaquena pitasorencaqui,

picavintsaasanotaquena, nosavicantari cameetsa.

36 Poameetsataquenaro avotsi noquenantacari,

eiro nopariantatsi, imatantacanari quisajeitanari

irotaque caari yanaacotantajeitana.

37 Noijanajeitanaqueri quisajeitanari nareejeitavajari,

notsoncajeitavajiri, irosati nopiantaja.

38 ¡Notsoncasanojeitaqueri,

te intinaajeitajeji, naaticanaqueri!

39 Pishintsitacaaquena nomanajeitaqueri

picantacashireacaacari piatsajeitachari ipincatsataquena.

40 Ishiapitsajeitanaquena maaroni quisajeitanari,

aitaque nocantaqueriri notsoncajeitaqueri.

41 Icoavetanaca amitacoterineme.

Iro cantaincha tecatsi amitacoterine;

Yaventavetanacari Tasorentsi,

iro cantaincha te iramitacoteriji.

42 ¡Novejaaqueri quempetanaca quipatsivane

aajencatiri tampea!

¡Naaticaqueri noquempetacantaqueri cajavatsari yaaticapiniyeetiri!

43 Poipacaacoventaquena caari imatantana atiripee piatsatachari.

Pipeaquena jivatacayerineri savicayetatsiri nampitsipeequi.

Yora pashinisatipee caari nioti, iquemisantaquena.

44 Ariorica iquemana, iquemisantajeitana,

aisati iquempeta pashinisatipee atiri, ineacameetsatana.

45 Itsaroacaaquena, te irineaperotanajea,

itsitireanaja imanaveita aisati ipioncajeitanaca.

46 ¡Yaneasanoti Tasorentsi!

¡Icameetsataque jocaacoventanari!

¡Ocameetsati impincatsayeeteri Tasorentsi Oavisaacotanari!

47 Iriotaque Tasorentsi piacoventaquenari

aisati coacaaquenari impincatsajeitena atiripee.

48 Yoavisaacotaquena itsimaajeivetaquena quisajeitanari,

yora piatsajeitachari pocashijeivetaquenari.

¡Tasorentsi, avirotaque oavisaacotaquenari,

caari imatantana oantatsiri!

49 Irotaque nocantacotantimpiri: Picameetsati;

aisati nopampoyeacoventantimpiri,

iquemajeitaquena savicayetatsiri nampitsipeequi.

50 Pimatacaaquena nanaacotantaque;

tempa naro pincatsari picoyeaqueri;

picantani pincavintsaaqueri David

aisati iriori irishanincajeitajeari.