Salmos

104 ¡Nompasonquitasanoteri Tasorentsi!

¡Notasorentsite, Pitasorentsitasanotaque!

Oshequi ipincatsatasanoyeetimpi, aisati pishipaquireasanotaque catsini.

 2 Piquitaiteasanotaque catsini

pantearoiteacaaquero inquite,

piquempetacantaquero tocoya imaronqueetiro.

 3 Poaquero Pinantari jenoqui, panaanaquero nija inquitequiniri,

pipeaquero mencori pishiacomento,

aisati pijayetaque jaocapeerica tampeaqui.

 4 Yora pinampirepee camantacotimpiri iquempejeitacaro tampea,

yora antaveetimpiri iquempejeitacaro paamari.

 5 Peerani povetsicantacarori quipatsi

otimaque quisotacairori, eiro ovaatsi.

 6 Ora incajare saanajatatsiri

anaaquero maaroni quipatsi aisati toncaaripee,

oquempevetacaro pashicarontsi.

 7 Oquemantaquempiri pishintsitsataquero piquempetacaro otirei,

intsipaite oshiaajatanaca.

 8 Otoncaanaquero toncaaripee irosati oirincaiteayetapaaca,

ojatanaque jaocarica pinintacaaquerori,

 9 irosati picantaqueronta: “¡Eiro pavishitsi!”

Eiroquea omatantajatsi aisati anaajero quipatsi.

10 Poncaajayetaquero nija omoronajapeequi,

oquenaajayetantanacari toncaaripeequi.

11 Ora nijapee irotaque irajeitiri poshiniripee,

coquiyetatsiri aisati aashinopee toncaarisati.

12 Anta otsapijapeequi nija

aitaque itimayetiri tsimeripee imencoyeta.

¡Ineayeti aisati yaatayeti inchatopeequi!

13 Avirotaque ovariirori incani poneachari jenoqui,

otsincacotantarori quipatsi oshiocantayetari panquirentsipee.

14 Pishiocacaayetiro paashitopee yoajeitari virantsipee

aisati panquirentsipee yoajeitari atiripee,

15 ora yoajeitari irotaque shintsitacairiri

aisati ovaja oquimoshiretacairi

oquitioncavorotacairi, anaacotiri quejitsi,

16 Pitsincacotiro inchatopee, ora santaripee,

pipanquitiri otishiqui Líbano.

17 Irotaque yaatantayetari tsimeripee imencoyeta

aisati antearoyetatsiri inchatopee

aitaque itimiri iriori tsomparipee.

18 Ora toncaaripee irotaque itimantayetari chiivopee,

aisati imperitaqui itsitiyetari quiimapee.

19 Povetsicaqueri cashiri omoncaratantayetari ishoncapiniyeta cashiripee,

aisati catsirincaiteri piotacaaqueri inqueantanajeari.

20 Ariorica pitsitenitacairo,

aitaque isoquijiri poshiniripee inchatomashiquiniri.

21 Yora anteariite maniti yamoroacotiri iovintsane,

icoacotiri Tasorentsi iroyeari.

22 Ariorica yoancapaaja catsirincaiteri

iqueanaji omoroqui imoreapaaja.

23 Impoiji iriori atiri ijayetaji yantaveeti,

irosati ontsitenijencaiteanaje.

24 ¡Tasorentsi, oshequi catsini pimayetaqueri!

Piotasanoti cameetsa povetsicayetaquero maaroni.

¡Ora quipatsi otimantajeitacaro povetsicayetaqueri!

25 Jero iroori incajare antearojatatsiri

itimayeti oshequi catsini shimapee,

antearitasanoyetatsiri aisati irijaniquiyetatsiri.

26 Irotaque oquenantari antearoyetatsiri pitotsi,

aitaque ineatsatari covencatatsiri antearitasanotatsiri icanteetiri Leviatán.

27 Yoyeacojeitimpi pimpapiniteri iroyeari

ariorica omoncarata pipapinitanariri.

28 Ariorica pipiri, yoajeitaro cameetsayetatsiri iquemasanojeita.

29 Eirorica pipajiritsi, intsaroajeite,

paapitsateririca yaneantari,

incamajeite impeajea quipatsi.

30 Irosatirica poaneajeiteri,

irosati incantea iraneajeite quipatsiqui.

31 ¡Icantani Tasorentsi Itasorentsitasanoti,

aisati yoveshireimentaro yovetsicayetiri!

32 Ariorica yameniro quipatsi, onica,

¡ariorica yantiro toncaaripee ocachaajencati!

33 Ainiroquera nanei,

nompampoyeeneri pampoyeantsipee Novincatsarite Tasorentsi.

34 Icoaque Tasorentsi irineacameetsatitenaro noquenqueshirejeitiri;

tempa iriotaque apaniro oimoshirencanari.

35 ¡Ocameetsati impeajeitajea quipatsiqui

antayetirori caari cameetsatatsi;

eiro itimajeitajitsi caari cameetsajeitatsi!

¡Nopasonquitasanoteri Tasorentsi,

noncantacoteri: Icameetsati!