Salmos

65 Notasorentsite, savicatsiri nampitsiqui Sión,

ocameetsati incantacoyeetempi: Picameetsati.

Ocameetsati nomoncaratempiro nocashiacaimpiri.

 2 Tempa piquemisantiro amanantsi,

irotaque maaroni atiripee ipocashijeitantimpiri.

 3 Ora nantajeitiri oatsinaajeitaquena,

iro cantaincha pipeacojeitaquenaro.

 4 Inquimoshirete atiri picoyeaqueri, irisaviquimotempi Pivancoqui.

Noveshireasanotea nontimantearo Pivanco cameetsatasanotatsiri.

 5 Notasorentsite, oavisaacotanari,

pimatasanotaquenaro caari noneapiniti,

ocameetsataque picantacoventanti.

Maaroni savicajeitatsiri quipatsiqui ishirejeitaquempi,

aisati iriori areejiquiniri ovecaratapaaca incajare.

 6 Avirotaque quisotacairori toncaaripee

pimatasanotiro pitasorencaqui.

 7 Poimajerentiro omotoncane incajare

aisati atiripee quisavacaajeitachari.

 8 Aisati iquempejeita savicajeitatsiri areejiqui,

itsaroacaajeitacaro pimayetaqueri.

Avirotaque iquimoshireventiri quimojenca

savicayetatsiri acaqueroca aisati antaqueronta.

 9 Pamenacoventiro quipatsi, povariiro incani,

pishiocacairo panquirentsipee;

pitimacaayetiro nijatenipee antearojayetatsiri,

povetsicanontiro oshiocanteari oitsoqui.

Aitaque picantirori povetsicanontiro quipatsi.

10 Pitsincacotiro quipatsi ipanquitanteetarori oitsoquipee,

pitencanayetiro oquenaajatantari incani

aisati pitasoncacoventiro oitsoqui panquirentsipee.

11 Picantani pitasoncacoventiro osarentsipeequi,

aisati poipariiro incani otimasanotantayetari oitsoquiyetatsiri.

12 Ora paashitomashipee caaraiteriquiniri oshiocayetanaji

aisati oquempeta toncaaripeequiniri, oquenashimashitanaji.

13 Ora opampaiteyeti ishequiasanotanaque ovishapee

aisati oirincaiteayetapaaca otimasanoyetanaque tiricomashipee.

Maaroni timantayetarori ipampoyeajeiti aisati icajemajeiti, iquimoshiretasanojeiti.