Proverbios

27 Eiro pishemetimentirotsi paita panteri osaitequera;

tempa, te pioteji paita avisatsineri.

 2 Te oncameetsateji pineacameetsatashitea avisati,

irintiquea neacameetsatempine pashini.

 3 Ora mapi aisati impanequi oshequi otenati,

iro cantaincha opomerentsitasanota ariorica inquishea caari iotatsi.

 4 Ora tsimaajencatantsi oashinoncanti, aisati quiisantsi otsoncanti;

iro cantaincha yora tsaneacotantachari, eiro imayeetiritsi iroimajerenteeteri.

 5 Ocameetsati incantimentasanoyeeteri cameetsa timatsiri irantane,

anaacotiro inintantaveta, terica ironijantero.

 6 Ocameetsati aventeari tsipavintsateeri iroashinoncaavetee.

Irintiquea quisheeri irovetsaveteerica cameetsa, aamaventeari.

 7 Yora quemachari, impincanaqueri ija pitsi;

irintiquea tasheasanotatsiri, impochatimotanaqueri quepishivetachari.

 8 Yora jayetatsiri areejiqui, yojoquiro inampi,

iquempetacari tsimeeri arayetatsiri areejipeequi, yojocanaquero imenco.

 9 Ora casancajencatatsiri oimoshirencanti intiriyeetearorica;

aisati oquempeta incanteerica atsipavintsatari, cameetsa anquimoshiretanaque.

10 Eiro pojoquiritsi pitsipavintsatari aisati itsipavintsatari piri.

Ariorica ompomerentsitimotempi, eiro picantiritsi pirenti.

Ocameetsati paventeari irinti saviquimotimpiri quempeji,

yanaacotiri pirenti savicatsiri areejiqui.

11 Notomi, ocameetsati piotasanote, pinquimoshiretacantenari;

irotaque nomatanteariri nanqueri cantanatanari.

12 Yora quenqueshireachari yamaacoventasanotaro covencayetatsiri, eiro avishimotantaritsi;

irintiquea caari quenqueshireacha, aiquero irijatatiye inquemaatsitearo.

13 Yora coatsiri impinacoventeri pashinisati, ocameetsati iraiteri iriori iitsaare,

irosati impinatantajeariri ireevetiriri.

14 Ariorica povetsatari tsipavintsatimpiri capichajirica quitaite, picajemacotiririca,

oquempetaca piquisanentaqueri.

15 Ora tsinane quishincaro;

oquempetacaro ovitejapinitantari opariirica incani.

16 Ariorica ancoavetea aimajerentero,

oquempeta acoaveta aimajerentero tampea, aisati ajiricaajaterime quejitsi.

17 Ora ashiro yameecanteetaro oshaninca,

aisati iriori atiri iroametavacayea.

18 Yora tsameetacotirori inchato iyera, iriotaque oyearone oitsoqui;

aisati amenacoventiriri cameetsa nampitariri, irineacameetsatasanoteri.

19 Ora iquenqueshireantari atiri, iotacairi jaoca icantari;

oquempetaca yamenaajatiro nija, oconijatanaque ivoro.

20 Ora caamanetantsi, itijanteetari aisati icoasanoyevetari atiri,

eiro catsini ojoquiritsi.

21 Yora oro aisati plata itayeetiri paamariqui, icameetsatantari,

yora atiri iotanteetariri, icantacoyeetiri: Icameetsati.

22 Yora caari iotatsi impasanatapiniyeevetearirica,

eiro yojoquirotsi iquenqueshiretiri caari iotanta.

23 Pamenasanoteri cameetsa povishatepee,

aisati pinquenqueshireacoteri itsipapee pivira;

24 tempa ora yashiyeevetari aisati pincatsariventantsi

eiro ocantani ontime.

25 Ariorica oshiocanaje paashitomashi toncaaripeequi,

irotaque iroajeari povishatepee,

26 aisati ontimasanote iviti pivirapee, pinquitsaajeiteari,

iriotaque pimpimanteri pamanantanteari piipatsite,

27 aisati ontimasanote otsomi: tecatsi coiteimotempine;

irotaque poacaajeiteariri pitomipee jeri pinampirepee.