Salmos

62 Apaniro Tasorentsi isavicacaana cameetsa;

iriotaque oavisaacotanari.

 2 Apaniro yoavisaacotana aisati iticaacoventana,

eiro yanaacoyeetanatsi;

tempa iriotaque naventari.

 3 Aviro quisajeitaquenari,

¿irosatimpa pincanteani pimanajeitena panaacotantenari,

pinquempetacantena tantorentsi tireayetatsiri aisati pariatsiri?

 4 Irointi iquenqueshiretapinitiro iroyena,

aisati icoasanotiro intseeyacotena.

Ineanatacoventashitana cameetsa,

iro cantaincha iquenqueshiretiro iroashinoncayena.

 5 Apaniro Tasorentsi isavicacaana cameetsa;

iriotaque noshiretasanotari.

 6 Apaniro yoavisaacotana aisati iticaacoventana,

eiro yanaacoyeetanatsi;

tempa iriotaque naventari.

 7 Iriotaque Notasorentsite oavisaacotanari

aisati matacaanari impincatsatanteetenari,

iriotaque naventari jocaacoventanari.

 8 Avirojei noshanincapee, pincanteani pishiretasanojeiteari Tasorentsi;

pinquenquetsatacaapinijeiteri, pishiretasanoteari.

Iriotaque Tasorentsi aventajeiteari.

 9 Iquempeavacaajeitaca atiripee: yora coiteaveetatsiri

aisati ashitaarantachari;

tecatsi irijijetea.

Ariorica amoncarateri moncaramentotsiqui, tecatsi anaacotantatsine intenate.

10 Eiro pishiretarotsi poante.

Eiro poyeacotatsi paantearo paitapeerica picoshitiri

ariorica pashitaarantaquea, eiro paventaritsi quireequi.

11 Oshequi noquemapinitaquero icantiri Tasorentsi:

“Narotaque mayetirori maaroni.

Narotaque nintasanotantatsiri

aisati narotaque pinaterine atiripee aparopeeni yantayetiri.” 12 -