Salmos

51 Notasorentsite, pincavintsayena;

tempa oshequi pinintasanotanti.

Pincavintsaasanotena; pimpeajero nocantacayetacari.

 2 ¡Poameetsashiretasanotajena,

pojocajenaro caari cameetsatatsi nantaqueri!

 3 Niotacotaca nopiatsataquempii,

te ompempa noquenqueshiretiro nantaqueri.

 4 Avirotaque apaniro nantimotaqueri caari cameetsatatsi,

nantaquero poasanquetaimentiriri antayetirori.

Irotaque oqueariotasanotantacari picantacoventanti;

tampatica picantimentanaro.

 5 Queario, te noncameetsateji notimantapaacari;

ainiroquera otsomontetana ina, te noncameetsateji.

 6 Queario, pinintiri cameetsashiretatsiri;

tempa pipaquenaro iotantsi.

 7 Poameetsashiretajena, noncameetsatantanajeari,

onquempetea pitsiquirijantajanaro hisopo;

aisati pinquivashiretajena noncameetsashiretantanajeari,

nanaacotanajero oquitamaroti sharaca.

 8 Piveshireacaajena, aisati pinquimoshiretacaasanotajena,

omavetaquea poashinoncaasanotaquena.

 9 Eiro piquenqueshiretajirotsi caari cameetsayetatsi nantaqueri

aisati pimpeajero maaroni nantayetaqueri.

10 Notasorentsite, poameetsashiretajena.

¡Poaquerashiretajena, nonquearioventantempiri!

11 Eiro pinijantareanatsi pitsipatana,

aisati eiro paapitsatanarotsi Pishire cameetsatasanotatsiri.

12 Piveshireacaajena aisati, tempa poavisaacotaquena;

pishintsishiretacaajena, nonquemisantantajempiri,

13 nomatantearori noameteri piatsajeitachari picoacairiri

aisati iriori caari cameetsajeitatsi, impiashijeitantajempiri.

14 Notasorentsite oavisaacotantatsiri, pojocaacoventena,

eiro nomatantatsi noantayete;

irointiquea nompampoyeacoventempi,

noncamantacotempi: Picameetsatasanoti.

15 Novincatsarite, poameetsatenaro novante,

nompampoyeantempirori cantacotimpiri: Picameetsati.

16 Te onimotempiji nompapinitempiro panquirentsi nocashiacaimpiri,

aisati noapinitempiri virantsi; aitaque nompaquempirime,

iro cantaincha te irio pineacameetsate.

17 Ora ipeetiriri Tasorentsi nimotasanotiriri, irointi avashiretanaquea ashirequi;

Notasorentsite, te pojocajeiteriji oashiretachari, irointi paacameetsatiri.

18 Pintasoncaventajero nampitsini Sión;

tempa picavintsantasanoti,

povetsicajero aisati otantopee nampitsini Jerusalén.

19 Irosati pineacameetsatantajeari noajempiri virantsipee picoiri,

aisati nompayetajempi panquirentsipee,

aisati maaroni vacajaniqui nontaasanoyetajempiri altariqui.