Salmos

71 Notasorentsite, naventimpi, pojocaacoventena.

¡Eiro catsini pamatavitanatsi!

 2 ¡Pojocaacoventena, poavisaacotena;

tempa picameetsatasanoti!

Pinquemena, poavisaacotena.

 3 Avirotaque naventapinitari jocaacoventanari

aisati oavisaacotanari;

piquempetacaro imperita

aisati pancotsi quisotatsiri tantotacotachari.

 4 Notasorentsite, pojocaacoventena;

eiro yoashinoncantanatsi caari cameetsajeitatsi oantatsiri.

 5 Tempa avirotaque Notasorentsite, noshiretasanotari;

quiso poaquena peerani nevancaritantapaacari.

 6 Ainiroquera otsomontetanani ina, pamitacotaquena.

¡Avirotaque timacaaquenari!

¡Noncanteani noncantacotempi: Picameetsati!

 7 Oshequi amenashijeitaquenari,

iro cantaincha avirotaque ticaacoventanari.

 8 Nocantani quitaiteripeequi noveshireimentasanotimpi,

nopampoyeacoventimpi;

tempa picameetsatasanotaque.

 9 Eiro pipincanatsi nanteashipatanaquerica;

eiro pojocanatsi teerica noshintsitanaje.

10 Yora quisajeitaquenari iquenquetsatacaavacaajeita iroantenari.

11 Icantajeiti: “¡Poijanateri, pajiriqueri;

tempa yojocaqueri Tasorentsi,

tecatsi oavisaacotajerine!”

12 Notasorentsite, eiro pinijantareanatsi.

¡Pamitacotena intsipaite!

13 ¡Impashiventajeitanaqueata!

¡Intsoncajeiteata quisajeitanari,

yora coajeitatsiri nashinoncayea!

14 Naintiquea noncanteani noyeacotempi

aiquero nojatatiiye noncantacotempi: Picameetsati.

15 Maaroni quitaiteri nonquenquetsatacotempi

poavisaacotaquena, picantacoventaquena cameetsa.

¡Eiro nomatirotsi nontsoteajero niotacotasanotempi!

16 Notasorentsite, nonquenquetsatacotero

pimatasanoyetaqueri cameetsatatsiri.

Noncamantacotempi,

¡Apaniro picanta picameetsatasanoti!

17 Notasorentsite, poametasanotaquena nevancaritantapaacari,

irosati nocanta meeca noquenquetsatacotiro pimatasanoyetaqueri.

18 Notasorentsite, eiro pojocanatsi ariorica nanteashipatanaque,

omavetaquea nompajetanaque;

aiquero nojatatiiye nonquenquetsatacotero pimatasanoyetaqueri pitasorencaqui.

Nocoaque noncamanteri timajeitatsiri meeca

aisati impoijeitajantsineri coajica.

19 Notasorentsite, oshequi pintacotaquena catsini;

Pimatasanoyetaquero paitapeerica.

¡Tecatsi quempetempine!

20 Omaveitea pishinetaquena noneaquero oashinoncantsi aisati covencatatsiri,

Iro cantaincha ari poaneajena,

aisati pintinaajena noncamavetaquearica.

21 Aiquero pimatacayenari nompincatsaritasanotanaje

aisati pimpiaje poimoshirencajena.

22 Naroquea pampoyempirone pampoyeantasi arpaqui aisati salterio,

noncantacotero ocameetsati piqueariotasanoti.

Avirotaque Notasorentsite, cameetsatasanotatsiri,

Itasorentsite ishanincajeitaniri Israel.

23 Oshequi noveshireimentempi, nompampoyeacoventempi;

tempa poavisaacotaquena.

24 Aisati noncanteani nonquenquetsatacotempi picameetsatasanotaque;

tempa yora coajeivetachari nashinoncayea, poashiventaasanotaqueri.