Salmos

92 Tasorentsi Inquitequiniri, ocameetsati nompasonquitempi

aisati nompampoyempiro pampoyeantsi, nompincatatempi.

 2 Nonquenquetsatacotamanempi aisati ontsitenitanajerica;

tempa piquearioventiro pinintasanotanti.

 3 Nompampoyeantearo poimajencatatsiri

yoveetsiquetiri arpa jero salterio cameetsajencatatsiri.

 4 Notasorentsite, poimoshirencantasanotanaro maaroni pantayetiri;

noquimoshireventiro maaroni pimayetaqueri.

 5 ¡Antearoite catsini pimatasanoyetiri

aisati ompomerentsitimotana nontsoteero piquenqueshiretiri!

 6 ¡Irinitiquea caari iojeitatsi, eiro imatirotsi iriotacotero!

 7 Ariorica iroshequiajeivetea caari cameetsajeitatsi,

inquempetearo tojari, aisati irashitaarantavetea,

iro cantaincha intsoncasanojeitea incantaitatiyempani.

 8 Irompa avinti Notasorentsite,

pincanteani pintime anta inquitequi.

 9 Notasorentsite, queariotasanotaque pintsoncajeitajeri quisajeitimpiri,

aisati caari cameetsajeitatsi povaraajeiteri jaocapeerica.

10 Naintiquea aiquero pishintsitacaasanotenari,

oquempeta ishintsiti vaca,

aisati pisaitantenaro casancajari noitoqui.

11 Noneeri quisajeitanari oquempetaca ipariaque,

aisati nonquemero incavintsaajeita caari cameetsajeitatsi.

12 Irintiquea cameetsajeitatsiri, incanteani iraneasanojeiti

inquempetearo compiroshipee,

aisati inquempetearo santaripee timatsiri otishiqui Líbano.

13 Aisati panquitachari Ivancoqui Tasorentsi,

teaquitatsiri oyearaiteritequi Inantari Atasorentsite.

14 Ompeesatovetanaquea, irosati oitsoquite

aisati irosati oncantea eereshite.

15 Oncamantacoteri yora Tasorentsi

iriotaque jocaacoventanari itampaticatasanoti,

te otimimoteriji amatavitantsi.