Salmos

86 Notasorentsite, pinquemena,

Oshequi noashiretaca aisati nocoiteaveetaque.

 2 Pojocaacoventena, tempa noquemisantimpi.

¡Avirotaque Notasorentsite, poavisaacotena

narotaque quemisantimpiri, noshiretimpiri!

 3 Notasorentsite pineshinoncatena,

avirotaque naventacari maaroni quitaiteripeequi.

 4 Nocoaque piveshireacayena, narotaque quemisantimpiri;

tempa avirotaque noquenquetsatacairi.

 5 Oshequi picameetsati, pipeacotantiro caari cameetsatatsi

aisati pinintasanotiri maaroni quenquetsatacaimpiri.

 6 Notasorentsite, pinquemena noquenquetsatacaimpi,

¡pamitacotena!

 7 Ariorica opomerentsitimotana, naventaquempi,

ari pamitacotaquena.

 8 ¡Tasorentsi, tecatsi ijitasorentsiyeevetari quempetempine!

¡Tecatsi mayeterone quempetarori pimayetiri!

 9 Notasorentsite, aviro vetsicajeitiriri maaroni atiripee;

irotaque impocashijeitantempiri impincatsatempi,

aisati incantacotempi: Picameetsati, Pitasorentsitasanoti.

10 Tempa apaniro Pitasorentsitasanoti;

¡pimatasanotiro caari ineapiniyeeti!

11 Notasorentsite, poametasanotenaro picoacaanari,

nonquearioventantearori nonquemisantero.

Pimatacayena nompincatsatempi.

12 Tasorentsisanori Notasorentsite, noncantacoshiretasanotempi: Picameetsati,

aisati nocanteani noncantacotempi: Pitasorentsitasanotaque.

13 ¡Oshequi catsini pinintasanotana!

¡Pojocaacoventaquena caari nocamanta!

14 Notasorentsite, ipocashitana shemejeitatsiri

jeri oantatsiri, caari quenqueshiretimpi,

icoaque iroashinoncaajeitena iroantenari.

15 Iro cantaincha pashi poiro picavintsanti, aisati pineshinoncatanti,

te intsipaite pinquishea, pinintanti aisati piquearioventanti.

16 ¡Pamitacotena, pineshinoncatena!

¡Poavisaacotena, narotaque quemisantimpiri,

aisati pishintsitacayena!

17 Ponijaasanotenaro queario picavintsaasanotana;

ariorica irineaquero quisajeitanari, impashiventasanotanaquea.

¡Aviro, Tasorentsi, amitacotenane aisati oimoshirenquenane!