Proverbios

12 Yora nintirori iroametasanoyeeteri inintiro iriotasanote;

irintiquea caari coyerone incantimenteeteri yantiri, eiro iotitsi.

 2 Yora Tasorentsi ineacameetsatiri cameetsajeitatsiri;

irintiquea quenqueshiretirori caari cameetsatatsi, yoasanquetairi.

 3 Ora yantayetiri atiri caari cameetsajeitatsi, eiro osavicacantitsi cameetsa;

irointiquea yantayetiri cameetsatatsiri, osavicacanti cameetsa oncanteani.

 4 Ora tsinane antayetirori cameetsatatsiri opincatsatacantiri ojime;

irointiquea caari cameetsatatsi, oashinoncacantasanotiri.

 5 Yora cameetsatatsiri iquenqueshiretapinitiro cameetsayetatsiri;

irintiquea caari cameetsatatsi, irointi iquenqueshiretapiniti iramatavitante.

 6 Ora irineane caari cameetsatatsi, irointi amatavitantsi oamantatsiri;

irointiquea irineane cameetsatatsiri, oavisaacotanti.

 7 Yora caari cameetsajeitatsi incamaquerica, intsoncajeitea;

irintiquea irishanincajeitajeari cameetsajeitatsiri, incanteani intime.

 8 Irineacameetsayeeteri iotatsiri;

irintiquea caari iotatsi, intseencanayeeteri.

 9 Ocameetsati eiro ineacameetsayeteetsi, iro cantaincha itimi amitacoyeeteeri,

anaacotiro impincatsayeevetee, iro cantaincha eiro avatsi cameetsa.

10 Yora cameetsatatsiri iquenqueshireacotapinitiri ivirapee;

irintiquea caari cameetsajeitatsi, te irintacojeiteariji.

11 Yora antaveetirori iroane otimimotasanotiri yoari;

yora caari quenqueshireacha yantashiyetaro paitapeerica.

12 Ora icoashiyetari caari cameetsajeitatsi, irotaque peacaariri;

irointiquea yaayetiri cameetsatatsiri, osavicacanti cameetsa osamani.

13 Yora caari cameetsatatsi yashinoncaimentaro irisati itseeyashiyetari;

irintiquea cameetsajeitatsiri, tecatsi oashinoncayerine.

14 Aparopeeni avishimoteri paitarica, ineanataqueri aisati yantaqueri,

15 Yora caari iotatsi ijitacantashita cameetsataque maaroni yantayetiri;

irintiquea iotatsiri, iquemisantiro icanteetiriri.

16 Yora caari iotatsi intsipaite itsimaa;

irintiquea quenqueshireachari, ipeacotaro icantimayeevetari.

17 Yora cameetsatatsiri icamantacotiro queariotatsiri;

irintiquea caari cameetsatatsi, icamantacotashitaro tseeyantsi.

18 Ainiro neanatantarori caari cameetsatatsi oashinoncanti;

irointiquea ineanatiri iotatsiri, oveshireacanta.

19 Yora neanatirori queariotatsiri incantaitatiyempani intime;

irintiquea tseeyaripee, eiro itimasanotitsi.

20 Ora iquenqueshiretiri caari cameetsajeitatsi irantayeteri, irointi iramatavitante;

irointiquea yoametantiri aacameetsatantatsiri, oveshireacanta.

21 Yora cameetsajeitatsiri eiro catsini avishimoyetiritsi pomerentsitimotearine;

irintiquea caari cameetsajeitatsi, oashinoncaajeiteri.

22 Yora Tasorentsi iquisaqueri amatavijeitantatsiri;

irintiquea antayetirori queariotatsiri, iquimoshireventiri.

23 Yora quenqueshireachari te irishemetimenteroji iotiri;

irintiquea caari iotatsi, ishemetimentiro yantashiyetari.

24 Yora antaveetatsiri cameetsa irimatasanotero irijivatacante;

irintiquea peranti, imperanayeeteari.

25 Ora oashiretantsi, oquenqueshireacaari atiri;

ora neantsi cameetsatatsiri, oquimoshiretacairi.

26 Yora cameetsatatsiri yoametiri ishaninca;

irintiquea caari cameetsajeitatsi, te irioteji intime cameetsa.

27 Yora peranti inquenayevetea, eiro yamitsi poshinirintsi;

irintiquea antaveetatsiri, otimimotasanotiri yashiyetari.

28 Anterorica cameetsayetatsiri ari oaneasanojeitaquee;

irompa eirorica aquenqueshiretatsi cameetsa, aitaque ajataque caamanentsiqui.