Salmos

4 ¡Notasorentsite jocaacoventanari,

pamitacotena ariorica naventimpi!

Tempa avirotaque oimoshirencanari ariorica opomerentsitimotana.

¡Pincavintsayena, pinquemisantero noquenquetsatacaimpiri!

 2 Avirojei jitacantashitachari pineaperojeita,

¿irosatimpa pincantajeitea pantanatena aisati pintseencanatena?

¿Irosatimpa pincantajeitea pincoashiyetearo

pantayetero caariperotatsiri, tseeyantsi?

 3 Piotasanojeitero oca:

icoasanotiri Tasorentsi quemisantiriri;

aisati piojeitero iquemaquena ariorica naventari.

 4 ¡Pintsaroacayeari, eiro pantajirotsi aisati caari cameetsatatsi!

Ariorica pinarempa pimaantariqui, pimajerete,

pinquenqueshiretasanotea jaoca picanta.

 5 Pimatasanoteneri cameetsa icoiri Tasorentsi,

aisati pishiretasanoteari.

 6 Ainiro oshequi cantajeitatsiri:

“¿Jaanica nijayeeroneri asavicajeitanteari cameetsa?”

¡Notasorentsite, nocoaque pineacameetsajeitena!

 7 Piquimoshiretacaasanotaquena,

nanaacotaqueri aasanovetachari oshequi tirico aisati ovaja.

 8 Ariorica nonareanaca, cameetsa nomaasanoti;

tempa avirotaque Notasorentsite, timacaanari cameetsa.