Proverbios

11 Te irineacameetsateri Tasorentsi amatavitantashiyetarori moncaramentotsi;

irintiquea ineacameetsati moncarayetantarori cameetsa.

 2 Yora shemetatsiri, tecatsi pincatsaterine;

irintiquea caari shemetatsi, otimimotiri iotantsi.

 3 Yora cameetsatatsiri oametiri tampaticatatsiri iotiri;

irintiquea amatavitantatsiri, opeacaari yamatavitantayeti.

 4 Ora ashiyevetari, eiro omatirotsi ojocaacoventante

ariorica omoncarataquea incantacoventetee;

irointiquea cameetsatatsiri antaqueeri

ojocaacoventeero caamanentsi.

 5 Ora tampaticatatsiri oameetsatiri yantayetiri cameetsatatsiri;

irintiquea caari cameetsatatsi, irisati ashinoncaimentajearone yantayetiri.

 6 Ora tampaticatatsiri ojocaacoventiri atiripee cameetsayetatsiri;

irintiquea aacantantashiyetachari oashinoncairi, inevetashiyetari.

 7 Ariorica incamaque caari cameetsatatsi,

aitaque impeasanoteari aisati iroori icoashiyetaniri.

 8 Yojocaacoventeri Tasorentsi cameetsatatsiri ompomerentsitimovetearirica;

irintiquea caari cameetsatatsi, ipinaajiniri ompomerentsitimotanajeari.

 9 Ora irineanepee caari cameetsatatsi ontsoncacantajeiteri icarajeitiri;

irointiquea iquenqueshiretasanotiri cameetsatatsiri, oavisaacotacantanti.

10 Intimajeiterica cameetsa cameetsajeitatsiri, inquimoshirejeite iriori inampiquiniri.

Ariorica incamajeite caari cameetsatatsi, inquimoshirejeite.

11 Ora imayetiri cameetsajeitatsiri osavicacaajeitiri cameetsa ishanincapee;

irointiquea ineanayetiri caari cameetsajeitatsi, otsoncacantanti.

12 Yora caari quenqueshireacha icantimatiri itsipatapinivetari;

irintiquea quenqueshireachari, imajereti.

13 Yora ovaayetirori neantsipee te irimaneroji;

irintiquea iotatsiri, imaniro iquemayevetari.

14 Teerica impincatsariventante cameetsa pincatsari,

oshequi ompomerentsitimoteari atiripee;

iranaacotante cameetsa intimerica oshequi amitacoyetiriri.

15 Ompomerentsitimoteari pinacoventiriri pashinisati;

irintiquea caari coatsi impinacoventante, irisavique cameetsa.

16 Ora tsinane cameetsatatsiri impincatsayeetero;

irintiquea shirampari neaperotachari, irashitaarantea.

17 Yora cavintsantatsiri icavintsaaja irisati;

irintiquea oashinoncantatsiri, yoashinoncaaja irisati.

18 Yora caari cameetsatatsi ipinayeevetari oshequi, iro cantaincha yatsipetashitaro;

irintiquea antapinitirori cameetsayetatsiri, oqueariotaque impinayeeteri.

19 Yora antayetirori cameetsayetatsiri iraneasanotaje;

irintiquea antayetirori caari cameetsatatsi, incamajeite.

20 Iquisaqueri catsini Tasorentsi quenqueshiretashiyetarori caari cameetsatatsi;

irintiquea caari timatsi irantane, iquimoshireventiri.

21 Queario, eiro ineashiyetaritsi antayetirori caari cameetsatatsi, aitaque iroasanqueetaqueri;

irintiquea cameetsayetatsiri, irojocaacoventeeteri.

22 Ora tsinane cameetsavorovetachari caari iotatsi,

oquempetacari chancho yoyeetiniri ishintaquiqui aniiyo yovetsiqueetiri oro.

23 Ora icoasanotiri cameetsajeitatsiri, incanteani irantayetero cameetsa;

irointiquea yantayetiri caari cameetsajeitatsi, oshequi oquisacantanti.

24 Ainiro atiri pimantashiyetachari, aiquero oshequiasanotanaqueri timimotiriri;

irintiquea mashitsatatsiri, intsoncacotasanotea incoiteavete.

25 Yora pashitantachari ontimimotasanoteri irashiyeteari;

aitaque incanteari, aisati impeetajeri iriori.

26 Yora manapitsaterine ishaninca tirico yoamaimatiri atiri;

irintiquea pimantenerine, irineacameetsayeeteri.

27 Yora antapinitirori cameetsayetatsiri icoi irineacameetsayeeteri;

irintiquea antapinitirori caari cameetsatatsi, oshequi ompomerentsitimoteari.

28 Yora shiretashitarori timimoyetiriri intsoncajea, inquempetearo camashitatsiri oshi;

irintiquea cameetsatatsiri, inquempetearo inchato shiocajempequiyetatsi.

29 Yora caari amenerine cameetsa ivancoquiniri, tecatsi timimoterine;

yora caari iotatsi incanteani iromperanateari iotatsiri.

30 Yora savicatsiri cameetsa yaneasanoti osamani;

irintiquea caari cameetsatatsi, eiro osamanititsi iranee.

31 Ariorica itasoncacoventeetiri cameetsatatsiri aca quipatsiqui;

tempa iroasanquetaasanoyeeteri iriori antayetirori caari cameetsayetatsi.