Salmos

103 Nompasonquitasanoteri Tasorentsi;

Nonquearioventasanoteri, tempa icameetsatasanoti catsini.

 2 Nompasonquitasanoteri Tasorentsi,

eiro nopeacotarotsi catsini icavintsaasanotaquena.

 3 Iriotaque peacotaquenarori caari cameetsatatsi nantayetiri;

itecatsitacotajanaro maaroni nomantsiarepee.

 4 Yojocaacoventaquena eiro nocamantatsi;

inintasanotaquena, icavintsaasanotaquena.

 5 Ipapinitaquenaro cameetsayetatsiri,

noquempevetantanajariri evancari noshintsitanaji,

iquempeta ishintsiti paquitsa anteari.

 6 Icantacoventasanotiri Tasorentsi cameetsa yoashinonqueeyetiri, yamitacojeitiri.

 7 Iotacaaqueri Tasorentsi Moiseshini, aisati ishanincajeitaniri Israel,

icantacantiri aisati yantayetaqueri.

 8 Yora Tasorentsi icavintsantasanoti aisati ineshinoncatanti;

te intsipaite irishemempa, inintasanotanti catsini.

 9 Te incanteani incantimentapinijeiteero antayetiri,

aisati te iroisamaninquero inquishea.

10 Te iroasanquetaimentapiniteero caari cameetsatatsi antayetiri;

11 inintasanojeitiri catsini maaroni pincatsajeitiriri,

oquempeta inquite antearoite oni anaanaquero quipatsi.

12 Yojocaacoventajeitaqueero caari cameetsatatsi antayetaqueri,

oquempetaca areejiqui iquenapai catsirincaiteri irosati iqueanajinta.

13 Icavintsaasanotiri Tasorentsi pincatsatiriri,

oquempeta iriri icavintsaasanotiri itomipee.

14 Tempa iotacotaquee jaoca acantajeitari;

iojeitaquee arojeitaque quipatsivane.

15 Arojei, te anquisojeiteji antime,

aquempetacaro tojari,

aisati aquempetacaro inchateaquipee tomirisato.

16 Ariorica ojeaonquiro tampea ojireayetanaque,

te aneajeroji aisati tecatsi quenqueshireacotajerone.

17 Irointiquea icantani Tasorentsi inintasanojeitiri pincatsajeitiriri;

icantani icavintsaajeitiri cameetsa yora impoijeitajerine,

18 yora moncaratirori icoacaaqueriri,

aisati caari peacotaro iquemisantiro icantacantayetiri.

19 Yora Tasorentsi isaviqui inquitequi,

ipincatsariventaquero maaroni timayetatsiri.

20 ¡Pimpasonquitasanoteri Tasorentsi

avirojei inampirepee shintsitasanotatsiri!

Tempa pimoncaratiro maaroni icantayetimpiri, piquemisantiri.

21 ¡Pimpasonquitasanoteri Tasorentsi

avirojei inampirepee amitacoyetiriri

antaveetiniriri icoacaayetimpiri!

22 ¡Pimpasonquitasanoteri Tasorentsi

maaroni irovetsicanepee ipincatsariventajeitiri!

¡Nompasonquitasanoteri Tasorentsi!