Salmos

89 Novincatsarite, noncanteani noncante novampoyeanequi:

“Avirotaque cameetsatasanotatsiri.”

Noncanteani nonquenquetsatacotempi,

avirotaque queariotasanotatsiri.

 2 Noncamantacotempi picantaitatiani pinintanti,

piquearioventiro te pimpashiniyero;

piquempetacaro inquite ocantani otimi.

 3 Picaratasanotaqueri David, yora picoyeane quemisantimpiri,

picantasanotaqueri:

 4 “Naro pincatsaritacayerine pishanicajeitajeari

incanteani impoyetajempi”

 5 Novincatsarite, maaroni pinampirepee inquitequiniri icantacotimpi piqueariotasanoti,

aisati pimayetaquero caari ineapiniyeeti.

 6 ¡Tasorentsi, tecatsi jitasorentsitatsiri

timatsiri inquitequi quempetempineri!

 7 Pitasorentsitasanotaque catsini, ipincatsayeetiri,

ishoncaquempi pinampirepee inquitequi.

 8 Novincatsarite Tasorentsi, mayetirori maaroni,

apaniro otimimotimpi pitasorenca aisati queariotatsiri.

¡Tecatsi catsini moncaratempine!

 9 Panaacotiro incajare quisaajavetachari,

aisati poimajerentiro otavoncaajare.

10 Poimpiaqueri covencayevetachari incajaresati,

pinquempetacantaqueri camatsiri.

Povaraajeitaqueri pitasorencaqui quisajeivetaquempiri.

11 Ora inquite aisati quipatsi irotaque pashi,

pivetsicayetaqueri maaroni timantayetarori.

12 Aisati pinashitacaacaro quirinca jero catonco,

ora toncaaripee Tabor jero Hermón

opampoyeajeiti oquimoshireventasanotimpi.

13 Pishintsitsanoti aisati panaacotasanotanti,

oquempetaca otimi pijempequi pishintsitantari, aisati pacosanori.

14 Picantatiani pipincatsariventanti picantacoventanti

tampatica pimataquero pinintanti, aisati piquearioventanti.

15 Notasorentsite, iveshireajeita pishanincatajari,

iotatsiri icantacotimpi cameetsa, inquimoshireventempi,

isavicajeiti cameetsa, icarajeitimpi.

16 Icantani iquimoshireventasanojeitimpi,

aisati iveshireimentaro piquearioventiri.

17 Queariotaque aviro shintsitacairiri, pimatacairi yanaacotanti;

tempa pineshinoncatasanotana,

aiquero pishintsitacaasanojeitanari.

18 ¡Iriotaque Atasorentsite jocaacoventeeri!

¡Yora iquemisantiri Israel, iriotaque Avincatsarite cameetsatasanotatsiri!

19 Peerani pinijantaca pineanataque

picantaqueri quemisantasanoyetimpiri quearioventimpiri:

“Nocoyeaqueri aparoni neaperotachari, noshanincatajari,

namitacotaqueri yanaacojeitiri itsipapee ipincatsariventanti.

20 ¡Iriotaque David, quemisantaquenari, nonashitacaacari.

Nosainatacantaqueri quejitsi cameetsajatatsiri, ipincatsaritantacari!

21 Tecatsi coiteimotearine noncanteani namitacoteri.

¡Narotaque matacayerine, noshintsitacayeri!

22 Eiro imatiritsi quisajeitiriri irimanajeivetearirica,

aisati eiro yanaacojeitiritsi caari cameetsajeitatsi.

23 Nanaacoteri quisajeitiriri, ¡Eiro itimajeitanajitsi!

Nontsoncajeiteri maaroni tseenquiriri.

24 Noncanteani nonintasanoteri aisati nonquearioventeri,

aisati nomatacayeri impincatsaritasanote.

25 Nomatacayeri impincatsariventero iipatsite

omponeanaquea incajarequi Mediterráneo

irosati nijaqui Éufrates.

26 Incantena: ‘Avirotaque Apa, Notasorentsite,

oavisaacotanari aisati jocaacoventanari.’

27 Aisati nonquempetacanteri notomi jivatatsiri itimi;

iriotaque pincatsariventerine pincatsariyevetachari quipatsipeequi.

28 Noncanteani nonintasanoteri, noncaratapiniteri,

nomoncarateneri nocantasanotaqueri.

29 Yora irishanincajeitajeari iriori incanteani impincatsarite, ainiroquera otimi inquite.

30 Irompa irojocanajerorica noameyevetacariri,

aisati eirorica imatiro nocantacantiriri,

31 aisati impeacotanajearorica nocantacantayevetari,

eirorica iquemisantiro nocoacairiri;

32 ari noasanquetaimentaqueri ipiatsataca,

aisati noashinoncaimeneri caari cameetsatatsi yantayetiri.

33 Iro cantaincha, eiro nojoquiritsi David,

noncanteani nonintasanoteri, quiso noyeri.

34 Eiro nopeacotarotsi noncarateri,

aisati eiro opeatsi noneanataqueri.

35 Tempa nocantasanotaque: ‘Nocameetsatasanotaque:

Eiro namatavitiritsi:

36 yora irishanincajeitajeari coajicani,

iriotaque poyeetajearine incanteani impincatsarite,

ainiroquera itimi catsirincaiteri,

37 aisati incanteani impincatsarite iquempeta itimi cashiri,

aisati ainiroquera otimi inquite.’ ”

38 Iro cantaincha, pojocaqueri pincatsari picoyeavetacari. ¡Piquisaqueri!

39 Pipeaquero picaravetacari quemisantimpiri;

te pincoacayeri impincatsaritaje.

40 Pishinecoventaquero iporoqueetaquero otantotacoyevetaniri nampitsipee

aisati piporocacantasanotaquero maaroni.

41 Maaroni avisayetatsiri iqueajeitaque icoshiti,

aisati yaayetaquero paitapeerica.

Yora saviquimojeitiriri ishirontimentari.

42 Pishinetaqueri quisajeitiriri yoancajeitiro iraco,

iquimoshireventajeitiro yanaacotantaque.

43 Poveapitsataqueri otsampitini isataamento,

aisati te pamitacoteriji irimanatanteari.

44 Te pishinetajeri impincatsaritaje, aisati eiro ipincatsariventantaji;

45 te pishineteri iraneasanote osamani,

irointi poashiventaasanotaqueri.

46 Tasorentsi, ¿Jaoca oncarate pimpeacotajearo pimanapitsatana?

¿Pincanteanimpa pinquishea, pinquempetearo paamari?

47 Novincatsarite, pinquenqueshiretero eiro osamanititsi nanee;

aisati iquempeta atiripee povetsicajeitaqueri, yanei capichaji.

48 ¡Tecatsi materone iraneasanote, eiro icamitsi catsini!

Aisati ¡tecatsi matachane irojocaacoventea irisati, eiro icamantatsi!

49 Novincatsarite, ¿paita caari pinintasanotantajari David

piquempetiri iroaquerani peerani

piquearioventaquero picantasanotaquerini?

50 Novincatsarite, pinquenqueshiretajeri quemisantajeitimpiri.

Oshequi atiri icantimataqueri;

iro cantaincha namavetaquero.

51 Notasorentsite aitaque icantapinijeitaquenari quisajeitimpiri,

aitaque icantapinitaqueriri picoyeaqueri.

52 Notasorentsite, picantani picameetsatasanotaque.

¡Aitaque oncanteari!