Proverbios

13 Yora evancari iotatsiri iquemisantiro yoametiriri iriri;

irintiquea piatsatariri, te inquemisanteri icantimentavetariri.

 2 Aparopeeni avishimoteri paitarica ineanataqueri;

irintiquea aacantantayetatsiri, icoasanotiro iroashinoncante.

 3 Yora aamaventacotarori irineaveete, yaamaventacotaja irisati;

irintiquea neanatashiyetachari oshequi, irisati oashinoncaajancha.

 4 Yora peranti icoasanoyevetaro paitapeerica, iro cantaincha tecatsi iraye;

irintiquea antaveetasanotatsiri, otimimotasanotiri paitapeerica.

 5 Yora cameetsatatsiri te incoyeroji tseeyantsi;

irintiquea caari cameetsatatsi, iroashiventayeeteri aisati eiro ipincatsayeetiri.

 6 Ora cameetsatatsiri ojocaacoventiri caari timatsine irantane;

irointiquea yantayetiri caari cameetsajeitatsi, ontsoncacanteri.

 7 Ainiro caari otimimoti paitapeerica, iro cantaincha iquempetacantashitaca ashitaarantincari;

ainiro aisati otimimotasanovetari, iquempetacantashitaca coiteavetatsiri.

 8 Ora irovaararo ashitaarantincari ojocaacoventiri, eiro yoanteetaritsi;

irintiquea caari otimimoti, tecatsi coatsine iroyeeteri.

 9 Yora cameetsajeitatsiri iquempetacari tsiorontsi quitasantetatsiri;

irintiquea caari cameetsajeitatsi, iquempetacari tsiorontsi tsivacatsiri.

10 Yora shemetatsiri iriotaque intacantarori yantanti;

irintiquea caari shemejeitatsi, otimimotiri iotantsi.

11 Ora ovaararontsipee yaashiyeetari intsipaite, ontsoncaarantea;

irintiquea apatotirori intsiquero, oshequitasanoti.

12 Ora acoasanoyeevetari caari moncaratacha, oashiretacanta;

irointiquea moncaratachari acoiri, oquempetacaro inchato oaneantatsiri.

13 Yora caari quemisanterone icanteevetariri, iroashiretimentearo;

irintiquea antirori icanteetiriri, impinayeeteri.

14 Ora yoametantiri iotatsiri, oaneanti,

aisati ojocaacoventantiro caamanentsi.

15 Yora quenqueshiretachari cameetsa ineacameetsajeitiri itsipapee;

irintiquea aacantantashiyetachari, irashinoncaajeitea.

16 Yora quenqueshireachari yonijantiro cameetsa iotasanoti;

irintiquea caari iotatsi, ishemetimentiro yantashiyetari.

17 Yora camantantatsiri caari cameetsatatsi yamayetiro cantantsiyetatsiri;

irintiquea camantantatsiri cameetsa, yoimoshirencanti.

18 Yora tseenquirori oametantsi incoiteaveeyete, aisati eiro ipincatsayeetiri;

irintiquea quemisantirori yoameyeetiriri, impincatsayeeteri.

19 Ora moncaratachari icoasanoyeetiri, oimoshirencanti;

yora caari iotatsi te incoye irojoquero caari cameetsatatsi.

20 Pincarateri iojeitatsiri, piotanaque avirori;

irompa pincarateririca caari iojeitatsi, impeacayempi.

21 Yora antajeitirori caari cameetsatatsi oijanajeitiri covencatatsiri;

irintiquea cameetsajeitatsiri, irineero cameetsatatsiri.

22 Ora yashiyetari cameetsatatsiri, irojocanaqueneri icharinepee;

irintiquea antirori caari cameetsatatsi, ipioyevetaro ovaararontsi, iraajero impoiji cameetsatatsiri.

23 Anta iroanequi coiteaveetatsiri otimasanoti ivanquirepee;

iro cantaincha oshequi amparatanaquea, eirorica yantirotsi cameetsayetatsiri.

24 Yora caari oameterine itomi, te irininteriji;

irintiquea nintasanotiriri, yoametiri.

25 Yora cameetsatatsiri iquemaro yoari, te intasheeji;

irintiquea caari cameetsatatsi, aasanotiri itashe.