¿Jaoka onkantyari pinkimoshiretantyariri pishaninkasanori?

1. ¿Paita okameetsatantari paabakayea anta Municipalidad?

Ikoake Tasorentsi maaroni ashaninka irisaikajeite kameetsa (1 Timoteo 1:11). Yobetsikantakariri Tasorentsi Aran ipakeri tsinane ijinantyari. Aisati abirori tekera paye shirampari, tsinane, pijate anta Registro Civil pisankenatakotantyari, ariorika pantero oka pinkimoshiretabakaajeitya pishaninkasanori. Piñanatero Irocashi 2:1, 4, 5.

Ikanti Tasorentsi iraabakayea aparoni shirampari, aparoni tsinane. Aisati te inkoyeji iriori shirampari yaimentaro ijina, tsinane aimentari ojime (Ijorioririnte 13:4). Ikisanentiro katsini Yioba yojokabakaaka ashaninka (Maricoshi 10:8, 9). Ariorika yora shirampari yaakero pashini tsinane, ijinasanori omaterome ojokerime ojime. Piñanatero Mateo 19:3-6, 9.

2. ¿Jaoka inkantyari kameetsa shirampari aisati tsinane?

Yobetsikakeri Yioba shirampari aisati tsinane iramitakotabakaajeitantyari (Génesis 2:18). Yora shirampari iritake jibatakayerine ishaninkasanori, irootake okameetsatantari impayetero koiteimotiriri ishaninka, aisati irobamejeitero ijina, itomipee Iriñane Tasorentsi. Kempe yora shirampari ikabintsaaja irisati, aisati inkabintsayero ijina. Aisati inintabakaajeitya, impinkatsatabakaajeitya. Yora shirampari, tsinane, maaroni chora antane, pinkeariobentero pintakotabakaajeitya maaroni. Piñanatero Ejesosati 4:31, 32; 5:22-25, 33; 1 Petero 3:7.

3. ¿Okameetsatimpa pijokeri pijime, pijina?

Ariorika yora shirampari, tsinane ikisabakaajeita, ontimatiye intsipaite inkabintsaabakaajeitya (1 Corintosati 13:4, 5). Okantimpi Iriñane Tasorentsi, eiro pojokabakaajatsi. Piñanatero 1 Corintosati 7:10-13.

4. ¿Paita ikoakaakeriri Tasorentsi jananeki, ebankari?

Jananeki, ebankari, ikoiri Tasorentsi kimoshire pinkantya, irootake yobametantimpiri. Okameetsati piyotero iyotantari piri, piniro, tempa yanaakojeitimpi iriorijei (Corosashisati 3:20). Aisati ikoiri Tasorentsi, ariorika pantabeeteneri iriori aisati itomi, ari pinkimoshiretanake. Piñanatero Mateo 19:13-15; 21:15, 16; 2 Timoteo 3:15.

5. Ashaninka, ¿jaoka pinkantyari pinkimoshirebenteri pitomipee?

Okameetsati pimpayeteri pitomipee koiteimotiriri (1 Timoteo 5:8). Aisati pinkemisantakaajeiteri pitomipee inkemisantantyariri Tasorentsi (Ejesosati 6:4). Ariorika pitomi iramenempi abirori piñanatiro Bibiria, pamaniri Tasorentsi, pikamantantiri pashinipee aisati papatotapinita, impoiji pitomi irantero kempe abiro. Piñanatero Deuteronomio 6:4-7; Proverbios 22:6.

Ariorika pitomi yamitakotakempi aisati yantayetakero kameetsatatsiri, pinkanteri pitomi: ¡Pasonki, pantakero kameetsa! Irointikea, terika inkemisantempiji aisati yantayetiro kaari kameetsatatsi, ontimatiye pobameteri, pinkamanayeri. (Proverbios 22:15). Te onkameetsateji payero sabiri, inchaki, mapi pimpasatantyariri pitomi. Piñanatero Corosashisati 3:21.

Yorajei kemisantiriri Yioba timatsi osheki sankenarentsi amitakotempine piyotakayeri pitomi Iriñane Tasorentsi. Piñanatero Salmos 19:7, 11.