YOTAANTSI 4
¿Jaanika Jesoshi?
1. ¿Jaanika betsikakeriri Jesoshi?
¿Jaoka ikantayetakeri Jesoshi?(MATEO 11:29; MARICOSHI 10:13-16).
Tekera intimeji Jesoshi kipatsiki ari itimake inkiteki. Peerani intanakarori apinti itimi Tasorentsi Yioba, tekatsi pashini (Joa 8:23). Yioba yobetsikakeri Jesoshi, iri jibatatsiri itomi, iriotake irapintite impoiji yamitakotakeri iriri, irootake otimantari maaroni (Joa 1:14). Impoiji Tasorentsi ikoyeakeri itomi, irootake ipajitantakariri irinti Kirishito. Piñanatero Proverbios 8:22, 23, 30; Corosashisati 1:15.
2. ¿Paita ipokantakari Jesoshi aka kipatsiki?
Yora Tasorentsi itiankakeri itomi aka kipatsiki, itimakaakerori otsomontetake María, iro tsinane te oñeriji shirampari, keariotake, iriri Jesoshi kaari atiri (Irocashi 1:30-35). Ipokantakari Jesoshi aka kipatsiki yantayetakero oka: 1) yobamejeitakeri ashaninka jaoka ikantari iriri, 2) yobamejeitakeri Jesoshi jaoka onkantyari ashaninka inkemisantantyariri Tasorentsi Yioba, aisati 3) ikamimentajeitakee maaroni. Piñanatero Mateo 20:28.
3. ¿Paita ikamimentantakempiri Jesoshi?
Aparoni shirampari kameetsatatsiri ipinakobentakempiri pañantyari (Éxodo 21:29, 30). Te inkoyeji Yioba yora atiri inkenkibaritanake aisati inkame. Yora Aran inkemisanterime Yioba isaikeme inkantyanime, iro kantaincha te inkemisanteriji Tasorentsi, irootake ikamantakari iriori (Génesis 2:16, 17; 5:5). Tempa okanti Bibiria: “Peerani intanakaro kaari kameetsatatsi aparoni shirampari”, yora Aran ipajenkakeri kaari kameetsatatsi maaroni atiripee, irootake akamanejeitantari. Piñanatero Oromasati 5:12, 15.
Irosati, ¿jaanikampa pinakobentakempiri pañantakari abirori? Tekatsi materone atiri iroabisakojeitee, tempa ashi airo te ankameetsateji maaroni. Piñanatero Salmos 49:7-9.
4. ¿Paita ikamantakari Jesoshi?
Yora Jesoshi te inkempetyariji atiri, tempa iritake tampatikatasanotatsiri, tekatsi irantane, irootake imatantakari yobabisakojeitakee. Inintasanojeitakee Yioba arori, tempa itiankakeri itomi aka kipatsiki, aisati Jesoshi inintasanojeitakee, irootake ipokantakari aka ikamimentajeitakee, ari ikemisantakeri iriri. Piñanatero Oromasati 5:19; Ejesosati 1:7, 8.
Pamenero shiakaantsi ¿Paita ikamantakari Jesús?
5. ¿Paita yantayetiri Jesoshi meeka aisati paita iranteri koajika?
Isaikabeitani Jesoshi aka kipatsiki, yaabintakeri jokiyetachari, yoitinaajiri kamaintsiri, yamitakotakeri ashinonkainkari aisati koajika iramitakoteri oijajeitiriri iriori (Mateo 15:30, 31; Joa 5:28). Impoiji ikamantakari Jesoshi, yora iriri yoitinaajiri irañantyari anta inkitekinta (1 Petero 3:18). Yora Jesoshi yoyairi iriri inkiteki, impoiji iriri ipeakeri Jesoshi pinkatsari, impinkatsaribentantyarori kipatsi (Ijorioririnte 10:12, 13). Meeka, yora kemisantajeitatsiri ikamantakojeitiri maaroni ashaninkapee, irinti Jesoshi ibinkatsarite. Piñanatero Mateo 24:14; Irantayeteri Jesoquirishito 11:15.
Ari, yora Jesoshi intsonkeri atiri yantayetiro kaari kameetsatatsi aisati irishajero maaroni oashinonkaantsi, irointikea yora shirejeitariri iriori, kameetsa irisaikantyari inkantyani iroakerari kipatsiki. Piñanatero Salmos 37:9-11.