¿Jaoka pinkantyari pishaninkatantyariri Tasorentsi?

1. ¿Ikemimpimpa Tasorentsi?

Ikantiri Tasorentsi maaroni atiripee: “Pinkenketsatakayena” (Salmos 65:2). Iro kantaincha, te inkemeroji maaroni kenketsatakairiri. Tempa okanti Bibiria, iriorika shirampari kaari kabintsayerone ijina, yora Tasorentsi eiro ikemiritsi iriori (1 Petero 3:7). Peerani, yora ishiraerisatipee yantapinijeitakero kaari kameetsatatsi, irootake kaari ikemisantantakari Tasorentsi iriorijei. Iro kantaincha, ari ikemakeri Tasorentsi ashaninka yojokajiro kaari kameetsatatasi. Piñanatero Joa 9:31; Itiancaneni Jesoshi 3:19.

Pamenero shiakaantsi ¿Ikemimpimpa Tasorentsi?

2. ¿Jaoka onkantyari pamanakotantyariri Tasorentsi?

Yora kemisantaperotatsiri apaniro yamaniri Yioba, tempa ipinkatsatasanotiri iriori (Mateo 4:10; 6:9). Aisati itomi Tasorentsi ikamimentajeitakee, irootake okameetsatantari tekera antsonkero amaneri Tasorentsi, ankante ibajiro itomi pajitachari Jesoshi (Joa 14:6). Ariorika pinkenketsatakayeri Tasorentsi, eiro piñanatashibeta bero, bero, bero, irointikea, pashitareneri pasankane Tasorentsi. Piñanatero Mateo 6:7; Jiriposhisati 4:6, 7.

Ariorika pinkenketsatakayeri Tasorentsi tsompoiki pasankaneki aitake ikemakempi (Salmos 139:4). Pisaikerika pobaneki, pibankoki, tekera pobari, tekera pimaye, pobashiretaka abirori, ari pimatakero pamaneri Tasorentsi. Piñanatero Salmos 55:22; Mateo 15:36.

3. ¿Paita okameetsatantari pampatotempa?

Meeka ainiro osheki kaari kemiro Iriñane Tasorentsi, aisati ishirontimentakeri kemisantajeitatsiri (2 Timoteo 3:1, 4; 2 Petero 3:3, 13). Irootake okameetsatantari pampatojeityari iyepee, aisati tsiopee, tempa iribeshireakayempi, iramitakotempi. Aisati abirori poimoshirenkayeri iriorijei. Piñanatero Ijorioririnte 10:24, 25.

Ariorika pinkarajeiteri yora nintiriri Tasorentsi, impoiji abirori pininteri Yioba. Anta apatotaantsipankoki irashi yorajei kemisantiriri Yioba piñajeri ashaninka kemisantaperotiriri Tasorentsi, aisati abirori pinkempetyari iriorijei. Piñanatero Oromasati 1:11, 12.

4. ¿Jaoka pinkantyari pishaninkatantyariri Tasorentsi?

Ariorika pinkenkeshireasanotero ikantimpiri Tasorentsi aisati irantayeteri koajika, aitake pishaninkatajeari iriori. Pinkenketsatakayeri Tasorentsi, impoiji piyotero iriotake inintanti aisati yotinkari. Piñanatero Josué 1:8; Salmos 1:1-3.

Pishaninkatantyariri Tasorentsi okameetsati pishiretasanoteri iriori, ¿jaoka pinkantyari abirori? Noshiakantempiro, pisaikantyari kameetsa poyapinitiro, pirepinitiro, ¿tempa? Aisati abirori, pishiretantyariri Tasorentsi, aikero pijatatiye pinkenkeshirero okantayetiri iriñane, aitake pimatakero. Piñanatero Mateo 4:4; Ijorioririnte 11:1, 6.

5. ¿Paita okameetsatantari ashaninkatajeari Tasorentsi?

Ikenkeshireakojeitiri Tasorentsi maaroni nintiriri. Irootake yobametantimpiri pinkemisantantyariri iriori, aisati pañantyari pinkantyani (Salmos 91:1, 2, 7-10). Aisati yobametimpiri pamenakobentantyarori pañantari, eiro pijokiitantajatsi, kameetsa pisaikantyari abirori aisati pishaninkasanori. Piñanatero Salmos 73:27, 28; Santiaco 4:4, 8.