Abiro pimatero pintsipabintsatyari Yioba

Ikoake Yioba piyotasanoteri, ¿paitakea? Iyoti Tasorentsi ariorika piyotero jaoka ikantari, paita yantayetiri aisati paita ikoiri pinkoasanote abiro pintsipabintsatyari iriori. ¿Keariompa amatero antsipabintsatyari iriori? (Piñanatero Salmos 25:14). ¿Paita panteri abiro pimatantyarori oka? Ora Bibiria ankero sampitaantsipeeka aisati okanti paita okameetsatasanotantari antsipabintsatyari Yioba.

1. ¿Paita ikantimpiri Yioba?

“Pinquenqueshireteri Tasorentsi, quiso iroantempiri irinti” (Santiaco 4:8). ¿Paita kantakotachari ñantsika? Ikantimpi Yioba pimatero pintsipatyari. Timatsi atiri okomitimotari intsipabintsatyari kaari iñeti, kemperi Tasorentsi. Iro kantaincha ipakee iriori iriñane ayotantyariri aisati antsipabintsatantyariri. Irinti Tasorentsi kaari iñeti, iro kantaincha añanaterorika Bibiria ari amatakero antsipabintsatyari.

2. ¿Iritakempa Yioba atsipabintsare kameetsatatsiri, paitakea?

Inintasanotimpi Yioba. Ikoake kimoshire pisaike, aisati otimirika pomerentsi ikoake pamaneri, pinkanteri: “Oshequi noquenqueshireaca. Pamitacotena”, aitake ikenkeshireakotimpi Tasorentsi (1 Petero 5:7). Ikantani Yioba ikoasanoti iramitakoteri itsipabintsarepee, iribeshireakayeari aisati inkemisanteri (piñanatero Salmos 94:18, 19).

3. ¿Jaanikapee itsipabintsare Yioba?

Inintiri Yioba maaroni atiripee, iro kantaincha “ineacameetsatiri cameetsajeitatsiri” (Proverbios 3:32). Ikoake Yioba eiro yantirotsi kaari kameetsatatsi itsipabintsarepee, irointikea irantero kameetsayetatsiri. Aparopee ikenkeshireashita eiro imatiro irantero ikoakairiri Yioba. Iro kantaincha ikabintsanti iriori, iñakameetsatiri nintajeitiriri aisati maaroni koajeitatsiri inkemisanteri (Salmos 147:11; Itiancaneni Jesoshi 10:34, 35).

PIYOTASANOTERO YOTAANTSIKA

4. Irinti Abrahamani itsipabintsare Yioba

Iyenkitsare Abrahamani (ipajitani Abrama) obametee paita ojitari antsipabintsatyari Tasorentsi. Piyotakoteri Abrahamani sankenarentsiki Génesis 12:1-4 aisati pinkenketsatabakaajeitya:

• ¿Paita ikoakaakeriri Yioba Abrahamani?

• ¿Paita ikashiakaakeriri Yioba Abrahamani?

• Ikemantakarori Abrahamani ikantayetakeri Yioba, ¿paita yantakeri?

5. Ikoakairiri Yioba itsipabintsare

Akoakaakeri atsipabintsare irantayetero.

• Abiro, ¿paita pikoakotiriri pitsipabintsare?

Piñanatero 1 Joa 5:3 aisati pinkenketsatabakaajeitya:

• ¿Paita ikoakotiriri Yioba itsipabintsare?

Ankemisantantyariri Yioba ontimatiye ampashinitya jaoka akantari. Piñanatero Salmos 32:8 aisati pinkenketsatabakaajeitya:

• ¿Paita ikoantari Yioba impashinitya itsipabintsare?

6. Yantiri Yioba iramitakotantyariri itsipabintsare

SHIAKAANTSI: Yoipakaakobentajana Yioba (3:20)

• ¿Paita yamitakotakerori Yioba tsinane omatantyarori pomerentsi?

Piñanatero Salmos 34:18 aisati pinkenketsatabakaajeitya:

• ¿Paita ikashiakaakeriri Yioba maaroni itsipabintsare?

• ¿Irimpa Yioba pitsipabintsare kameetsatatsiri? ¿Paitakea?

7. Okameetsatasanoti ankenketsatakayeri Yioba

Ariorika pinkenketsatakaapiniteri pitsipabintsare ari pimatakero pintsipabintsasanotyari. Piñanatero Salmos 86:6, 11 impoiji pinkenketsatabakaajeitya:

• Pikoakerika pinkenketsatakayeri Yioba, ¿paita panteri?

• ¿Jaoka okantari iñabeetimpi Yioba?

EIRO PIPEAKOTAROTSI

Ikoake Yioba intsipabintsatempi abiro aisati yamitakotimpi pintsipabintsatantyariri iriori.

Paita piyotabakeri

• ¿Jaoka okantari Yioba yamitakotiri itsipabintsare?

• ¿Paita ikantantariri Yioba itsipabintsare impashinitya?

• ¿Ikoakempa Yioba irantero itsipabintsare komitimotariri? ¿Paita pikantantari oka?

PAMENERO PASHINIPEE

Ariorika pishaninkatyari Yioba, ¿jaoka pinkantyari?

“Jehová, un Dios que vale la pena conocer” (La Atalaya, 15 de febrero de 2003)

Amatero antsipabintsatyari Tasorentsi.

“¿Cómo puedo hacerme amigo de Dios?” (Lo que los jóvenes preguntan. Respuestas prácticas [volumen 2], capítulo 35)

Piyotero jaoka okantakari yobabisakotantakarori Yioba tsinane.

“¡Yo no quería morirme!” (La Atalaya, núm. 1 2017)

Pinkemeri aparopee adolescente kantakotiriri Yioba.

¿Paita ojitari antsipabintsatyari Tasorentsi? (1:46)