¿Jaoka ikantari Yioba?

Ariorika pinkenkeshireeri Yioba, ¿jaoka ikantari iriori? ¿Pikantimpa iriotake Tasorentsi antyarite, itimi areejiki ikempetari impokiro? Iriotake shintsitasanotatsiri, iro kantaincha ¿otimimpa inintanti? ¿Jaoka ikantasanotari Yioba? Ikamantee Yioba jaoka ikantari, aisati ikanti ikenkeshireakotimpi abiro.

1. ¿Paita kaari añantari Tasorentsi?

“Te ontimeji ivatsa Tasorentsi, irointi Ishire” (Joa 4:24). Tasorentsi Yioba te ontimeji ibatsa, itonki. Isaiki anta inkiteki, eiro añiritsi iriori aisati eiro añirotsi itiminta.

2. ¿Piyotirompa jaoka ikantari Yioba?

Te piñeriji Tasorentsi iro kantaincha itimi, iritake ikameetsatasanoti. Ayoteririka ari amatero aninteri. Ora Bibiria okanti: “Inintasanotiro Tasorentsi cameetsatatsiri, aisati eiro yojoquiritsi quemisantasanotiriri” (Salmos 37:28). Aisati okanti “yashi yoiro icavintsanti”, ineshinonkajeitiri atiri ashinonkainkari (Santiaco 5:11). Yora Yioba “quiso yoiri oashiretachari, aisati jitacantashitachari tecatsi oavisaacoterine; iroavisaacotantajeariri” (Salmos 34:18). ¿Pikoimpa abiro pinkimoshiretakayeri Yioba irompa pikoi pobashiretakayeari? Yora antirori kaari kameetsatatsi yobashiretakaari Yioba aisati ikantimonentakari (Salmos 78:40, 41). Iro kantaincha antirori kameetsatatsiri ikimoshiretakairi (piñanatero Proverbios 27:11).

3. ¿Jaoka okantari yoinijanta Yioba inintee?

Otimimotiri Yioba osheki kameetsatatsiri, iro kantaincha anaakotanti “yashi yoiro inintajeitaquee” (1 Joa 4:8). Yobetsikane Tasorentsi jero iriñane yoinijee inintasanojeitee iriori (piñanatero Itiancaneni Jesoshi 14:17). Pinkenkeshiriempa yobetsikanakee Tasorentsi, amatero ankemisantero pampoyeantsi, amenero potsoyetachari aisati abayetaro poshinirintsipee. Ikoi Yioba antime kimoshire.

PIYOTASANOTERO YOTAANTSIKA

4. Ishire Tasorentsi amitakotanti

Arori aakero ako antabeetantyari, aisati Yioba yaakero ishire yantantarori paitapeerika. Ora Bibiria te onkantakoteji ishire Tasorentsi oshiari atiri, irointi okanti irotake ishintsinka Tasorentsi yantantarori maaroni. Piñanatero Irocashi 11:13 aisati Itiancaneni Jesoshi 2:17, impoiji pinkenketsatabakaajeitya:

• Ipiri Tasorentsi ishire maaroni amaniriri, ¿pikantimpa ishire Tasorentsi oshiakantaro kempe atiri, orampa irotake ishintsinka Tasorentsi? ¿Paita pikenkeshireantarori oka?

Otimimotiri Yioba ishire irotake yantantarori kameetsayetatsiri. Piñanatero Salmos 33:6 aisati 2 Petero 1:20, 21, impoiji pinkenketsatabakaajeitya:

• ¿Jaoka okantakari yaantakarori Yioba ishire?

5. Otimimotiri Yioba kameetsayetatsiri anebeetakotariri

Ikemisantiri Moiseshi Betsikanakeriri, iro kantaincha ikoake iriyotasanoteri iriori. Irotake ikantantakariri: “Piotacayenaro ora picoiri pantayeteri, noshiretasanotantanaquempiri” (Éxodo 33:13). Yakakeri Yioba Moiseshi jaoka ikantakotari iriori. Piñanatero Éxodo 34:4-6 aisati pinkenketsatabakaajeitya:

• ¿Paita okantayetari kameetsayetatsiri ikantakeriri Yioba Moiseshi?

• Abiro, ¿paita pinebetakotariri Yioba?

6. Ikenkeshireakotiri Yioba atiripee

Yora hebreopee irintini ishaninkani Yioba, iriojei iperanayeetakari nampitsiki Egipto. Iñantakariri Yioba yashinonkaaka ishaninkani, ¿jaoka ikantanentari? Pinkemero AUDIO aisati poijatero orampa piñanatero Éxodo 3:1-10. Impoiji pinkenketsatabakaajeitya:

AUDIO: Okatsitimonentakeri Yioba iñakero ashinonkaaka inampi (2:45)

• Okatsitimonentakeri Yioba inampi, ¿paita obametimpiri oka? (Pamenero ñakaarontsi orijaniki 7 aisati 8).

• ¿Keariompa ikoake Yioba iramitakoteri atiri? ¿Irimaterompa? ¿Paita pikantantari oka?

7. Timayetatsiri kipatsiki yoinijanta jaoka ikantari Yioba

Maaroni yobetsikanakeri Yioba yoinijanta jaoka ikantari iriori. Pamenero SHIAKAANTSI. Impoiji piñanatero Oromasati 1:20 aisati pinkenketsatabakaajeitya:

SHIAKAANTSI: Maaroni yobetsikayetakeri Yioba yoinijanta inintanti: itsempeki atiri (1:57)

• Ariorika pamenero yobetsikayetakeri Yioba, ¿paita piyotakotiriri iriori?

EIRO PIPEAKOTAROTSI

Te ontimeji Yioba ibatsa irointi ishire irotake kaari amatantaro añeri. Otimimotiri Yioba kameetsayetatsiri iro kantaincha anaakotanti inintee.

Paita piyotabakeri

• ¿Paita kaari amatantaro añeri Yioba?

• ¿Paita ojitari ishire Tasorentsi?

• Pinkante jaoka ikantari Yioba.

PAMENERO PASHINIPEE

Piyotero cuatro ikantakotari Yioba piyotantyariri jaoka ikantari iriori.

“¿Cómo es Dios?” (La Atalaya, núm. 1 2019)

Piyotero itimirika Yioba maaroni nampitsipeeki.

“¿Está Dios en todas partes? ¿Es omnipresente?” (Oka sankenarentsi otimi jw.org)

Piyotero paita oshiantarori ishire Tasorentsi “irako”.

“¿Qué es el espíritu santo?” (Oka sankenarentsi otimi jw.org)

Aparoni kaari amenatsi ikantashita te irininteriji Tasorentsi iriori, iro kantaincha ipashinitanaja.

“Ahora siento que puedo ayudar a los demás” (La Atalaya, 1 de octubre de 2015)