YOTAANTSI 35
¿Jaoka pinkoyeerori pintime kameetsa?
Maaroni kitaiteripee ankoyeanontya paita anteri. Timatsi ankoyeanontya jaoka antimeri, jaoka ayeriri kireki aisati ankoyeanontya aabakemparika. Ariorika ankoakero kameetsa aitake ankimoshirete aisati ankimoshiretakayeri Yioba.
1. ¿Jaoka onkantyari Bibiria amitakotempi pinkoyeero kameetsatatsiri?
Tekera pinkoyeanontyaji pijibate pamaneri Yioba iramitakotantempiri. Paitapeerika pantayeteri pamenero Bibiria piyotantyarori paita ikantiri Yioba (piñanatero Proverbios 2:3-6). Aparopee obametaantsi otimi Bibiriaki intsipaite piyotabakero. Piñerorika oka, aitake pinkemisantero.
Terika piñeroji Bibiriaki obametaantsi kantempine jaoka pinkantyari, ikantimpi Tasorentsi Yioba: “Niotacayempiro jaoca pincanteari pisavicanteari cameetsa” (Salmos 32:8). ¿Jaoka onkantyari iriyotakayempi Tasorentsi? Ari piñakero piñanaterorika Bibiria, piñero obametaantsi piyotantyarori ikenkeshiretiri Yioba aisati jaoka ikantanentari. Ayotero oka obametaantsi ariorika añanatakoteri abishimotakeriri kemisantajeitatsiniri peerani. Ayotakerorika iñakameetsatiri Yioba, aitake ankoanake antero kameetsatatsiri.
2. Tekera pantero pikoiri, ¿paita pinkenkeshiriempari?
Obametee Bibiria “quenqueshireachari cameetsa, ioti paita iranteri” (Proverbios 14:15). Tekera pantero pikoakeri, okameetsati pinkenkeshiriempa onkameetsaterika pantayeteri. Impoiji abisati pisampitya: “¿Paita obametakotanari Bibiria nantayeteri? Nonkoyeanontyarika oka, ¿nontimempa kameetsa? ¿Jaoka inkantanentyari noshaninka nanterorika oka? ¿Oimoshirenkerimpa Yioba?” (Deuteronomio 32:29).
Iriotake Tasorentsi kantatsiri paita oni kameetsatatsiri aisati kaari kameetsatatsi. Ayotasanoterorika yobametantiri Yioba, aisati ankemisanterorika ikantakantane, aitake ankenkeshireanakempa kameetsa. Akenkeshireane irotake kamanteeri antayeterorika kameetsayetatsiri orampa kaari kameetsatatsi (Oromasati 2:14, 15). Kameetsari akenkeshireane amitakotee ankoyeero kameetsatatsiri.
PIYOTASANOTERO YOTAANTSIKA
Tsame ayotakotero paita okameetsatantari obametee Bibiria, aisati jaoka onkantyari ankenkeshiriempa kameetsa ankoantyarori kameetsatatsiri.
3. Pishinetakotya amitakotempi Bibiria
Akoakerika ankoyeanontya kameetsa antayeteri, ¿jaoka onkantyari amitakotee Bibiria? Pamenero SHIAKAANTSI aisati pinkenketsatabakaajeitya:
¿Paita ishinetakoteeri Tasorentsi anteri?
¿Paitakea ishinetanteeri Tasorentsi ankoyeanontya?
¿Paita amitakotaantsi ipakeeri Yioba ankoyeantyarori kameetsatatsiri?
Piyotantyarori kempetachari obameteeri Bibiria piñanatero Ejesosati 5:15, 16. Impoiji pinkenketsatabakempa, ¿jaoka onkantyari ‘pinkeariobentero’...
... piñanatero Bibiria maaroni kitaiteripeeki?
... pimpashinitanajea kameetsari shirampari, tsinane, apa, ina, ebankari aisati jananeki?
... pijatapinite apatotaantsiki?
4. Pobameetsatero pikenkeshireane pinkoantyarori kameetsatatsiri
Pikemabakerorika ikantakantane Yioba, eiro okomitimotimpitsi pinkoyeero kameetsatatsiri. ¿Paita panteri terika añeroji ikantakantane Yioba? Pamenero SHIAKAANTSI aisati pinkenketsatabakaajeitya:
¿Jaoka okantari obameetsatantakarori tsio okenkeshireane kameetsa?
¿Okameetsatimpa pinkanteri atiri “piyotakayena paita nanteri”? Piñanatero Ijorioririnte 5:14 aisati pinkenketsatabakaajeitya:
Pikoabeta iriotakayempi atiri paita panteri, iro kantaincha ¿paita okameetsatantari pinkoyeanontya abirori?
¿Paita amitakoteene abameetsatero akenkeshireane?
Ora pikenkeshireane oshiakantaro mapa, irotake oinijayempirone pintimantyari kameetsa.
5. Ampinkatsatero ikenkeshireane itsipapee
Onashita akenkeshireane, te onkempetyaji akoakeri. ¿Jaoka onkantyari ampinkatsatero ikenkeshireane itsipapee? Tsame ayotero apite kempetachari.
Kempetachari 1: Aparoni tsinane kemisantatsiri onebetaro opotsotiro oki aisati opotsotiro otsera. Areetaka otiminta ayemisantaroronte kaari ñakameetsatiro ompotsotya.
Piñanatero Oromasati 15:1 aisati 1 Corintosati 10:23, 24. Impoiji pinkenketsatabakaajeitya:
Piñanatabakero sankenarentsika, ¿paita anteri tsinane potsotachari aakameetsatantyarori tsinane kaari potsotacha? ¿Paita panteri terika iriñakameetsateroji piyemisantaririnte pinebetari abiro?
Kempetachari 2: Aparoni kemisantatsiri iyoti irimatero irirero kachojari kapichaji, iro kantaincha te inkoyeji irirero. Impoiji iriori ijatake yobeshireabakaajeitanta ayemisantaririnte aisati yameniri aparopee ayemisantaririnte iriro kachojari.
Piñanatero Irocashi 6:37 aisati Oromasati 14:1, 10. Impoiji pinkenketsatabakaajeitya:
Piñanatabakero sankenarentsika, ¿paita iranteri kemisantatsiri iraakameetsatantyariri ayemisantaririnte irirori kachojari? ¿Paita panteri abiro terika piñakameetsateroji inebetari piyemisantaririnte?
¿Paita panteri pinkoyeantyarori kameetsatatsiri?
1. Pamaneri Yioba iriotakayempi okameetsatirika pantayeteri (Santiaco 1:5).
2. Pinkoyeero okamanteeri Bibiria aisati sankenarentsi timatsiri jw piyotantyarori ikoakaimpiri Tasorentsi. Aisati pinkanteri pashini kemisantaperotatsiri iramitakotempi.
3. Pinkenkeshiriero paita abisatsine panterorika pikoakeri, jaoka pinkantanentyari abiro aisati jaoka inkantanentyari pikarajeitiri.
APAROPEE ATIRI IKANTI: “Pantero maaroni pikoakeri. ¡Eiro pikemisantirotsi ikantimpiri atiripee!”.
Tekera pantero pikoakeri, ¿paita okameetsatantari pinkenkeshireakoteri pishaninka aisati Yioba?
EIRO PIPEAKOTAROTSI
Pinkoyeanontantyarori kameetsatatsiri, pijibate pinkenkeshireero jaoka inkantanentyari Yioba, aisati jaoka inkantanentyari pikarajeitiri.
Paita piyotabakeri
¿Jaoka onkantyari piyotero ikoakaimpiri Tasorentsi?
¿Paita pashini amitakotempine pinkenkeshirea kempe Tasorentsi?
Onashitarika inebetari pishaninka, ¿jaoka onkantyari paakameetsateri?
PAMENERO PASHINIPEE
¿Jaoka onkantyari pinkoyeero iñakameetsatiri Yioba?
“Tomemos decisiones que honren a Dios” (La Atalaya, 15 de abril de 2011)
Pinkemero jaoka okantari yobametee Yioba.
Piyotero paita amitakotakeriri shirampari ikoyeakero kameetsatatsiri.
Piyotero jaoka onkantyari pinkemisanteri Tasorentsi terika añeroji ikantimpiri.
“¿Hace falta siempre un mandato bíblico?” (La Atalaya, 1 de diciembre de 2003)